ວັນທີ 31 ຕຸລານີ້, ພາຍໃຕ້ຫົວຂໍ້ວ່າ "ການປະດິດສ້າງໃໝ່ແລະການພັດທະນາແບບຍືນຍົງຂອງຕົວເມືອງ", ເວທີປຶກສາຫາລືສຸດຍອດຂອງງານວາງສະແດງໂລກຊຽງໄຮປີ 2010 ຈັດຂຶ້ນຢູ່ຊຽງໄຮ. ໃນເວລາກ່າວຄຳປາໄສໃນພິທີໄຂ, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນກ່າວວ່າ, ງານວາງສະແດງໂລກຊຽງໄຮໄດ້ຂຽນໜ້າຮຸ່ງເຮືອງໃນປະຫວັດສາດການວາງສະແດງຂອງໂລກ. ທ່ານຍັງກ່າວຢ້ຳວ່າ, ຈີນຈະເດີນຕາມເສັ້ນທາງພັດທະນາຢ່າງສັນຕິແລະເປີດປະຕູສູ່ພາຍນອກຢ່າງໝັ້ນໜຽວບໍ່ປ່ຽນແປງ, ລົງເລິກການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດກັບປະເທດຕ່າງໆ.
ງານວາງສະແດງໂລກຊຽງໄຮປີ 2010 ໄດ້ອັດລົງໃນວັນທີ 31 ຕຸລານີ້. ນີ້ແມ່ນເທື່ອທຳອິດທີ່ປະເທດທີ່ພວມພັດທະນາຈັດງານວາງສະແດງໂລກ, ລວມມີ 246 ປະເທດແລະອົງການຈັດຕັ້ງສາກົນເຂົ້າຮ່ວມ. ໃນເຄິ່ງປີມານີ້, ມີຫຼາຍກວ່າ 70 ລ້ານເທື່ອຄົນຈາກຈີນແລະຕ່າງປະເທດໄດ້ເຂົ້າຊົມ, ນີ້ໄດ້ສ້າງສະຖິຕິໃໝ່ໃນປະຫວັດສາດຂອງງານວາງສະແດງໂລກ, ເຮັດໃຫ້ງານວາງສະແດງເທື່ອນີ້ກາຍເປັນງານວາງສະແດງໂລກທີ່ສຳເລັດຜົນ, ດີເດັ່ນແລະລືມບໍ່ລົງ. ທ່ານເວີ່ນເຈ່ຍປາວກ່າວວ່າ:
"ງານວາງສະແດງໂລກຄັ້ງນີ້ມີຫົວຂໍ້ວ່າ 'ຕົວເມືອງທີ່ດີກວ່າ, ຊີວິດທີ່ດີກວ່າ', ໄດ້ສະແດງໃຫ້ເຫັນເຖິງຜົນສຳເລັດຂອງວັດທະນະທຳສະໄໝປະຈຸບັນທີ່ມີຫຼາຍສີສັນ, ໄດ້ເຕົ້າໂຮມສະຕິປັນຍາໃນດ້ານການຊອກຄົ້ນການພັດທະນາຕົວເມືອງຂອງມວນມະນຸດ, ໄດ້ສ້າງສະຖິຕິຂອງງານວາງສະແດງໂລກຫຼາຍລາຍ, ໄດ້ຂຽນບົດຮຸ່ງເຮືອງໃນປະຫວັດສາດການວາງສະແດງຂອງໂລກ."
ໃນຖານະເປັນເວທີປຶກສາຫາລືທີ່ມີລະດັບສູງກວ່າໝູ່ໃນເວທີປຶກສາຕ່າງໆຂອງງານວາງສະແດງໂລກ, ເວທີປຶກສາຫາລືສຸດຍອດເທື່ອນີ້ມີຫົວຂໍ້ວ່າ "ການປະດິດສ້າງໃໝ່ແລະການພັດທະນາແບບຍືນຍົງຂອງຕົວເມືອງ", ຈະປຶກສາຫາລືມະຫາພາກກ່ຽວກັບບັນຫາໃນການພັດທະນາຕົວເມືອງທີ່ທົ່ວໂລກຮ່ວມກັນປະເຊີນໜ້າກັບ. ໃນກອງປະຊຸມ, ທ່ານນາຍົກເວີ່ນເຈ່ຍປາວຮຽກຮ້ອງໃຫ້ປະຊາຊົນປະເທດຕ່າງໆຮ່ວມກັນຊຸກຍູ້ການພັດທະນາຕົວເມືອງແບບກົມກຽວກັນ.
"ງານວາງສະແດງໂລກຊຽງໄຮຖືຕົວເມືອງເປັນຫົວຂໍ້ຫຼັກ,ນີ້ແມ່ນຄັ້ງທຳອິດ,ໄດ້ດຳເນີນການຊອກຄົ້ນທີ່ມີຫົວຄິດປະດິດສ້າງກ່ຽວກັບການແກ້ໄຂບັນຫາຍາກທີ່ມະນຸດປະເຊີນພ້ອມກັນ.ພວກເຮົາຄວນສະຫຼຸບໝາກຜົນດ້ານແນວຄຶດອັນລ້ຳຄ່າກ່ຽວກັບການພັດທະນາຕົວເມືອງໃນງານວາງສະແດງໂລກຊຽງໄຮຢ່າງຕັ້ງອົກຕັ້ງໃຈ,ພະຍາຍາມສ້າງຊີວິດຂອງຕົວເມືອງທີ່ດີງາມກວ່າເກົ່າ."
ທ່ານເວີ່ນເຈ່ຍປາວ,ນາຍົກລັດຖະມົນຕີຈີນຍັງກ່າວວ່າ,ການຈັດງານວາງສະແດງໂລກຢ່າງສຳເລັດຜົນນັ້ນ,ເຮັດໃຫ້ຈີນມີຄວາມໝັ້ນໃຈແລະຄວາມຕັດສິນໃຈທີ່ໝັ້ນໜຽວກວ່າເກົ່າໃນການຊຸກຍູ້ການປະຕິຮູບແລະໄຂປະຕູສູ່ພາຍນອກ.ຈີນຈະເດີນຕາມເສັ້ນທາງພັດທະນາໂດຍສັນຕິແລະໄຂປະຕູສູ່ພາຍນອກຢ່າງໝັ້ນໜຽວບໍ່ປ່ຽນແປງ,ຖອດຖອນບົດຮຽນຈາກໝາກຜົນອະລິຍະທຳທີ່ດີເລີດຂອງປະເທດຕ່າງໆໃນໂລກ,ລົງເລິກການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບປະເທດຕ່າງໆ.
ໃນພິທີໄຂເວທີປຶກສາຫາລື,ທ່ານບານກີມູນ,ເລຂາທິການໃຫຍ່ສະຫະປະຊາຊາດໄດ້ຕີລາຄາສູງຕໍ່ການຈັດງານວາງສະແດງໂລກຊຽງໄຮຢ່າງສຳເລັດຜົນ.ທ່ານບານກີມູນກ່າວວ່າ,ງານວາງສະແດງໂລກໄດ້ສົ່ງຄວາມໝັ້ນໃຈແລະຄວາມຫວັງໃຫ້ແກ່ໂລກ,ເພື່ອຮັບມືກັບສິ່ງທ້າທາຍນັບມື້ນັບຫຼາຍໃນຍຸກຫັນເປັນຕົວເມືອງ,ທ່ານກ່າວວ່າ:
"ຄົນທັງຫຼາຍຮູ້ແລ້ວວ່າ,ຕົວເມືອງປະຈຸບັນພວມປະເຊີນກັບຄວາມກົດດັນທີ່ໃຫຍ່ຫຼວງ,ແຕ່ງານວາງສະແດງໂລກຊຽງໄຮ 2010 ຂອງຈີນໄດ້ສະແດງໃຫ້ພວກເຮົາເຫັນແນວຄຶດອັນລ້ຳຄ່າ,ຊ່ວຍພວກເຮົາຮັບມືກັບສິ່ງທ້າທາຍເຫຼົ່ານີ້."
ທ່ານວິເຊັນດ໌ ໂກນຊາເລັສ,ເລຂາທິການໃຫຍ່ກົມງານວາງສະແດງສາກົນກໍ່ຍ້ອງຍໍໃນລະດັບສູງຕໍ່ງານວາງສະແດງໂລກຊຽງໄຮທີ່ໄດ້ປະກອບສ່ວນຢ່າງຫຼວງຫຼາຍເຂົ້າໃນການຊຸກຍູ້ການປະດິດສ້າງແລະການຮ່ວມມື,ທ່ານກ່າວວ່າ:
"ງານວາງສະແດງໂລກຊຽງໄຮໄດ້ຊຸກຍູ້ການປະດິດສ້າງແລະການຮ່ວມມືຢ່າງແຂງແຮງ,ໄດ້ສ້າງສວນງານວາງສະແດງໂລກທີ່ຮ່ວມມືຢ່າງສຸດອົກສຸດໃຈ,ຮ່ຳຮຽນເຊິ່ງກັນແລະກັນ,ຮ່ຳຮຽນນຳກັນແລະຕັ້ງໜ້າປະດິດສ້າງ."
