ວັນທີ 3 ພະຈິກນີ້, ທ່ານຫູເຈິ້ງເຢ້,ລັດຖະມົນຕີຊ່ອຍວ່າການກະຊວງການຕ່າງປະເທດຈີນທີ່ຮັບຜິດຊອບວຽກງານອາຊີກ່າວວ່າ,ການພົວພັນລະຫວ່າງຈີນກັບ ປະເທດໃກ້ຄຽງໃນອາຊີໄດ້ມີການປ່ຽນແປງທີ່ມີຄວາມຫມາຍປະຫວັດສາດ ຈຸດພິເສດຕົ້ນຕໍຂອງການປ່ຽນແປງດັ່ງກ່າວກໍ່ແມ່ນການພົວພັນຖານບ້ານໃກ້ເຮືອນຄຽງທີ່ດີຕໍ່ກັນແລະໄວ້ເນື້ອເຊື່ອໃຈກັນ, ຮ່ວມມືກັນແບບຕ່າງຝ່າຍຕ່າງມີຜົນປະໂຫຍດ.
ທ່ານຫູເຈິ້ງເຢ້ແມ່ນກ່າວໃນເວລາໃຫ້ສຳພາດຕໍ່ສື່ມວນຊົນຢູ່ປັກກິ່ງ. ປະຈຸບັນ, ໃນສາກົນໄດ້ມີຄຳວິຈານຈຳນວນຫນຶ່ງກ່ຽວກັບການພົວພັນລະຫວ່າງຈີນກັບບາງປະເທດໃກ້ຄຽງໃນອາຊີ,ບາງຄົນຍັງກ່າວວ່າ ການພົວພັນລະຫວ່າງຈີນກັບບາງປະເທດໃກ້ຄຽງນັບມື້ນັບເຄັ່ງຕຶງຂຶ້ນ,ບາງປະເທດໃກ້ຄຽງຍັງກັງວົນນຳຈີນ.
ທ່ານຫູເຈິ້ງເຢ້ກ່າວວ່າ,ປີນີ້,ຈີນກັບປະເທດໃກ້ຄຽງເຊັ່ນ:ອິນເດຍ,ອິນໂດເນເຊຍ,ຫວຽດນາມ,ມຽນມາແລະປະເທດອື່ນໆໄດ້ຈັດຕັ້ງ＂ປີມິດຕະພາບ,ແລະຈັດກິດຈະກຳລະລຶກທີ່ມີຫຼາຍຮູບຫຼາຍແບບ,ເພື່ອສະເຫຼີມສະຫຼອງການສ້າງສາຍພົວພັນທາງການທູດຂອງສອງປະເທດຄົບຮອບ 60 ປີຢ່າງຄຶກຄື້ນ. ທ່ານອູປາງກົວະ,ປະທານຄະນະປະຈຳສະພາປະຊາຊົນຈີນທີ່ຈະຢ້ຽມຢາມອິນໂດເນເຊຍໃນໄວໆນີ້ ຈະເຮັດໃຫ້ການພົວພັນລະຫວ່າງສອງປະເທດຍົກສູງຂຶ້ນສູ່ລະດັບໃຫມ່.
ທ່ານຫູເຈິ້ງເຢ້ກ່າວວ່າ,ປີນີ້,ການພົວພັນຈີນ-ອາຊຽນໄດ້ສືບຕໍ່ອັນເກົ່າ ຂະຫຍາຍອັນໃຫມ່. ໃນກອງປະຊຸມສຸດຍອດຈີນ-ອາຊຽນເທື່ອທີ 13ທີ່ຫາກໍ່ສິ້ນສຸດລົງ,ທ່ານເວີ່ນເຈ່ຍປາວ,ນາຍົກລັດຖະມົນຕີຈີນແລະຜູ່ນຳຂອງປະເທດຕ່າງໆໃນອາຊຽນເປັນເອກສາກັນເຫັນວ່າ ການພົວພັນລະຫວ່າງຈີນກັບອາຊຽນແມ່ນການພົວພັນທາງຍຸດທະສາດທີ່ຕິດແທດຕົວຈິງທີ່ສຸດ,ຫຼາຍຮູບຫຼາຍສີທີ່ສຸດ,ຮອບດ້ານທີ່ສຸດ,ມີຊີວິດຊີວາຫຼາຍທີ່ສຸດແລະໄດ້ຮັບຜົນສຳເລັດຫຼາຍ ທີ່ສຸດ, ພວກທ່ານເປັນເອກະສັນກັນເຫັນວ່າ ຮ່ວມກັນຈັດຕັ້ງປະຕິບັດແຜນການປະຕິບັດງານ 5 ປີຄັ້ງທີ 2 ເປັນຢ່າງດີ.
ປີນີ້ແມ່ນປີທຳອິດທີ່ເຂດການຄ້າເສລີຈີນອາຊຽນສ້າງສຳເລັດຢ່າງຮອບດ້ານ. ໃນຖານະທີ່ເປັນເຂດການຄ້າເສລີໃຫຍ່ທີ່ສຸດຂອງປະເທດທີ່ພວມພັດທະນາໃນປະຈຸບັນ, ເຂດການຄ້າເສລີຈີນອາຊຽນໄດ້ເຮັດໃຫ້ສອງຝ່າຍເພີ່ມເງິນທຶນ,ເຕັກນິກແລະນັກວິຊາການແລະອື່ນໆເພີ່ມຂຶ້ນຢ່າງຊັນເຈນ,ເພື່ອສ້າງສະພາບແວດລ້ອມອັນດີງາມທີ່ບໍ່ເຄີຍມີມາກ່ອນໃນປະຫວັດສາດໃຫ້ແກ່ການເປີດກວ້າງການຮ່ວມມືດ້ານການຄ້າແລະການລົງທຶນ.
ທ່ານຫູເຈິ້ງເຢ້ກ່າວວ່າ,ໃນດ້ານການສ້າງພື້ນຖານໂຄງລ່າງແລະຕິດຕໍ່ພົວພັນກັນ,ຈີນໄດ້ຕັ້ງຫນ້າສະຫນັບສະຫນູນ＂ແຜນແມ່ບົດກ່ຽວກັບການ ເຊື່ອມຕໍ່ອາຊຽນ＂,ສຸມກຳລັງເພື່ອຮ່ວມກັບປະເທດອາຊີຕາເວັນອອກ,ຮ່ວມກັນຊຸກຍູ້ການສ້າງທາງຫຼວງ,ທາງລົດໄຟ, ທາງເດີນເຮືອ,ທ່າກຳປັ່ນແລະອື່ນໆໃນພາກພື້ນນີ້,ເພີ່ມທະວີການເຂົ້າຮ່ວມແລະຮ່ວມມືຂອງກົນໄກຕ່າງໆເຊັ່ນ:ການຮ່ວມມືເສດຖະກິດອະນຸພາກພື້ນແມ່ນ້ຳຂອງຫຼືGMSແລະການພັດທະນາຮ່ວມມືໃນແມ່ນ້ຳຕ່າງໆຂອງອາຊຽນ.
ເວລາເວົ້າເຖິງສະພາບການໃນທະເລຈີນໃຕ້, ທ່ານຫູເຈິ້ງເຢ້ກ່າວວ່າ, ປັດຈຸບັນນີ້, ສະຖານະການໃນເຂດນີ້ມີສະຖຽນລະພາບໂດຍລວມ, ແຕ່ຍັງມີປັດໄຈທີ່ບໍ່ແນ່ນອນແຝງຊ້ອນຢູ່. ຮັກສາສະຖຽນລະພາບແລະສັນຕິພາບຂອງທະເລຈີນໃຕ້, ບໍ່ເຮັດໃຫ້ຄວາມຂັດແຍ່ງທະເລຈີນໃຕ້ຂະຫຍາຍອອກແລະສັບສົນເຂົ້າ, ຈົນກາຍເປັນບັນຫາສາກົນ, ຫຼີກເວັ້ນບໍ່ສ້າງຄວາມຂັດແຍ່ງແລະຄວາມເຄັ່ງຕຶງຢູ່ຂົງເຂດນີ້. ເຮັດແນວນີ້ຈະສອດຄ່ອງກັບຜົນປະໂຫຍດລວມຂອງຈີນແລະບັນດາປະເທດໃນພາກພື້ນນີ້. ຈີນເຫັນວ່າ, ຄວນໃຫ້ປະເທດທີ່ກ່ຽວຂ້ອງໂດຍກົງດຳເນີນການເຈລະຈາສອງຝ່າຍເພື່ອແກ້ໄຂຄວາມຂັດແຍ່ງໃນທະເລຈີນໃຕ້. ແລະຄວນຈະປະຄວາມຂັດແຍ່ງໄວ້ກ່ອນ, ແລ້ວຫັນມາຮ່ວມກັນພັດທະນາ. ຈີນຍິນດີຮ່ວມກັບປະເທດຕ່າງໆປະຕິບັດຖະແຫຼງການການກະທຳທຸກຝ່າຍໃນທະເລຈີນໃຕ້, ເພີ່ມທະວີຄວາມເຊື່ອໝັ້ນເຊິ່ງກັນແລະກັນ, ຊຸກຍູ້ການຮ່ວມມືກັນ.ທ່ານຫູເຈິ້ງເຢ້ຍັງກ່າວວ່າ, ການພັດທະນາແມ່ນພາລະໜ້າທີ່ທີ່ຈີນແລະປະເທດອາຊີຮ່ວມກັນປະເຊີນໜ້າ, ແມ່ນບັນຫາທີ່ສຳຄັນທີ່ສຸດສໍາລັບຈີນແລະປະເທດອາຊີ. ຈີນຍຶດໝັ້ນຍຸດທະສາດເປີດກວ້າງທີ່ຕ່າງຝ່າຍຕ່າງມີຜົນປະໂຫຍດ, ຈະຮ່ວມມືກັບປະເທດອາຊີ,ຊ່ວຍເຫຼືອເຊິ່ງກັນແລະກັນ, ພ້ອມກັນຊຸກຍູ້ການຟື້ນຟູແລະພັດທະນາເສດຖະກິດອາຊີ.
