ຈີນຕັ້ງຫນ້າຊອກຫາວິທີຢູ່ຮ່ວມກັນກັບຊາວໂລກ
(GMT+08:00) 2010-11-09 15:20:44 cri
ໃນເມື່ອຈີນນັບມື້ນັບກາຍເປັນຜູ່ເຂົ້າຮ່ວມແລະຜູ່ລິເລີ່ມລະບົບສາກົນທີ່ສຳຄັນ, ເມື່ອຄຳວ່າ"ປະເທດຈີນ"ໄດ້ກາຍເປັນຄຳສັບທີ່ຄົນທັງຫລາຍຫລີກລ້ຽງບໍ່ໄດ້ໃນເວລາລົມເຖິງໂລກຫນ່ວຍນີ້, ຈີນຈະຢູ່ຮ່ວມກັບໂລກແນວໃດ?ກໍ່ກາຍເປັນບັນຫາທີ່ຄົນທັງຫລາຍໃຫ້ຄວາມສົນໃຈ.ວັນທີ 6 ແລະວັນທີ 7 ພະຈິກນີ້,ເວທີປາໃສຄົ້ນຄວ້າຈີນຂອງໂລກຄັ້ງທີ 4 ໄດ້ຈັດຂຶ້ນຢູ່ນະຄອນຊຽງໄຮ້,ນັກວິຊາການເກືອບ 300 ຄົນທີ່ມາຈາກແຫ່ງຕ່າງໆທົ່ວໂລກໄດ້ແລກປ່ຽນຄວາມເຫັນກັນກ່ຽວກັບບັນຫານີ້.
ບໍ່ວ່າຢູ່ສະຖານທີ່ໃດ, ຄົນທັງຫລາຍກໍ່ເລີ່ມລົມເຖິງຈີນເລື້ອຍໆ. ຄືວ່າຈີນໄດ້ຊົງຕົວຢູ່ທຸກບ່ອນໃນເວລາພັບຕາດຽວ.ນາງໂມຣີ ຄາຊູໂກະ,ນັກວິຊາການຍີ່ປຸ່ນເຫັນວ່າ, ເມື່ອທຽບກັບການທີ່ຈີນໄດ້ເຜີຍແຜ່ກວ້າງອອກໄປແລ້ວ, ຄົນທັງຫລາຍຍັງບໍ່ຮູ້ດີກ່ຽວກັບຈີນເທື່ອ.ນາງເວົ້າວ່າ:
ຕົວຢ່າງຄືຫມູ່ຂອງຂ້ອຍ, ປະຊາຊົນທຳມະດາ,ບໍ່ຮູ້ສະພາບການຂອງຈີນເລີຍ.ປະຊາຊົນຂອງສອງປະເທດຖ້າບໍ່ໄວ້ໃຈກັນ, ການພົວພັນລະຫວ່າງສອງປະເທດນີ້ກໍ່ມັກຈະເກີດມີຄວາມຂັດແຍ່ງຕະຫລອດ.ໃນຖານະທີ່ເປັນນັກຄົ້ນຄວ້າກ່ຽວກັບຈີນ, ກ່ອນອື່ນຄວນລົບລ້າງຄວາມບໍ່ໄວ້ໃຈກັນອອກໄປ,ນີ້ແມ່ນເລື່ອງສຳຄັນທີ່ສຸດ.
ປີ 2004 ໄດ້ຈັດເວທີປາໄສຄົ້ນຄວ້າຈີນຂອງໂລກຄັ້ງທຳອິດ,ຫລັງຈາກນັ້ນທຸກໆສອງປີກໍ່ຈັດເທື່ອຫນຶ່ງ, ກາຍເປັນເວທີແລກປ່ຽນດ້ານວິຊາການສາກົນລະດັບສູງສຳລັບໃຫ້ນັກວິຊາການຈີນແລະຕ່າງປະເທດເຜີຍແຜ່ຫມາກຜົນໃນການຄົ້ນຄວ້າກ່ຽວກັບຈີນ.
ຫົວຂໍ້ຫລັກຂອງເວທີປາໄສຄັ້ງນີ້ແມ່ນ: ຢູ່ຮ່ວມກັນ,ເຕີບໂຕຮ່ວມກັນ,ຈີນກັບໂລກເຊື່ອມໂຍງເຂົ້າກັນ.ໃນເວທີປາໄສ, ນັກຄົ້ນຄວ້າກ່ຽວກັບຈີນ 4 ທ່ານທີ່ມາຈາກຕ່າງປະເທດເຊັ່ນນາງໂມຣີ ຄາຊູໂກະ ແລະທ່ານອື່ນໆໄດ້ຮັບລາງວັນປະກອບສ່ວນໃນການຄົ້ນຄວ້າກ່ຽວກັບຈີນທີ່ລັດຖະບານຈີນມອບ ໃຫ້, ເພື່ອຊົມເຊີຍຜົນງານຂອງເຂົ້າເຈົ້າໃນຂົງເຂດຄົ້ນຄວ້າຈີນ.
ການຄົ້ນຄວ້າກ່ຽວກັບຈີນ, ລວມທັງຄົ້ນຄວ້າຈີນໃນສະໄຫມບູຮານ, ຍິ່ງຄວນຖືການຄົ້ນຄວ້າຈີນໃນປັດຈຸບັນເປັນສຳຄັນ.ທ່ານອີກໍ ໂຣກາເຊັຟ,ຜູ່ຊ່ຽວຊານຄົ້ນຄວ້າຈີນທີ່ມີຊື່ສຽງຂອງຣັດເຊຍເຫັນວ່າ, ການຄົ້ນຄວ້າກ່ຽວກັບຈີນນັບມື້ນັບໄດ້ຮັບຄວາມສົນໃຈ, ແມ່ນຍ້ອນວ່າຈີນມີບົດບາດນັບມື້ນັບຫລາຍໃນໂລກ.ທ່ານກ່າວວ່າ:
ຄຽງຄູ່ກັບເສດຖະກິດຈີນເຕີບໂຕຂຶ້ນ, ຈີນກໍ່ມີບົດບາດຫລາຍຂຶ້ນໃນໂລກ,ວັດທະນະທຳຈີນໄດ້ດຶງດູດຄົນນັບມື້ນັບຫລາຍສົນໃຈນຳ.ໃນທ້າຍຊຸມປີ 1980,ຢູ່ອະດີດສະຫະພາບໂຊວຽດ,ມີໂຮງຮຽນຊັ້ນສູງແລະອົງການຄົ້ນຄວ້າວິທະຍາສາດທີ່ອົບຮົມນັກວິຊາການທາງດ້ານການຄົ້ນຄວ້າຈີນນັ້ນມີພຽງສິບກວ່າແຫ່ງ,ດຽວນີ້ກໍ່ຫລາຍກວ່າ 50 ແຫ່ງແລ້ວ.
ຕັ້ງແຕ່ດຳເນີນການປະຕິຮູບແລະໄຂປະຕູສູພາຍນອກເປັນຕົ້ນມາ, ການພັດທະນາຂອງຈີນຍິ່ງໄດ້ຮັບຄວາມສົນໃຈຈາກໂລກຫລາຍ.ປັດຈຸບັນ, ຈີນໄດ້ກາຍເປັນອົງກອນເສດຖະກິດໃຫຍ່ທີສອງຂອງໂລກ,ແມ່ນຜູ່ເຂົ້າຮ່ວມແລະຜູ່ລິເລີ່ມທີ່ສຳຄັນໃນການສ້າງລະບົບສາກົນທີ່ປົກປັກຮັກສາສັນຕິພາບ,ຈີນໄດ້ນຳພາປະຊາຊົນ 1/5 ໃນໂລກຈາກການກິນອິ່ມນຸ່ງອຸ່ນກ້າວໄປສູ່ການພໍຢູ່ພໍກິນແລະມີສ່ວນແຮໄວ້ແລ້ວ.ສະນັ້ນ, ກໍ່ມີຄົນນັບມື້ນັບຫລາຍເລີ່ມສົນໃຈນຳຮູບແບບພັດທະນາຂອງຈີນ.ທ່ານເຈິ່ງຢົງນຽນ,ຫົວຫນ້າສະຖາບັນຄົ້ນຄວ້າອາຊີຕາເວັນອອກຂອງມະຫາວິທະຍາໄລແຫ່ງຊາດສິງກະໂປເຫັນວ່າ, ການກ່າວເຖິງ"ຮູບແບບຂອງຈີນ"ແມ່ນເພື່ອຢາກບັນລະຍາຍເສັ້ນທາງການພັດທະນາຂອງຈີນໃຫ້ດີກວ່າເກົ່າ.
ຄຽງຄູ່ກັບບົດບາດຂອງຈີນນັບມື້ນັບສູງຂຶ້ນ,ກໍ່ມີບາງຄົນໃນສາກົນເປັນຫ່ວງວ່າການພັດທະນາຂອງຈີນອາດຈະກາຍເປັນການຂົ່ມຂູ່ຕໍ່ປະເທດທີ່ຢູ່ອ້ອມຂ້າງ.ກ່ຽວກັບຄຳເວົ້ານີ້, ທ່ານວາງເຊີນ,ຫົວຫນ້າຫ້ອງການຖະແຫລງຂ່າວຂອງລັດຖະບານຈີນກ່າວວ່າ, ຈີນຈະຍຶດຫມັ້ນການພັດທະນາໂດຍສັນຕິຕະຫລອດໄປ,ເພາະວ່າການພັດທະນາໂດຍສັນຕິແມ່ນທາງເລືອກແລະຄຳຫມັ້ນສັນຍາອັນຫນັກແຫນ້ນຂອງລັດຖະບານແລະປະຊາຊົນຈີນ.ທ່ານກ່າວວ່າ:
ການພັດທະນາຂອງຈີນພວມເດີນຕາມເສັ້ນທາງສັນຕິພາບເສັ້ນໃຫມ່ທີ່ຕ່າງກັບປະເທດໃຫຍ່ອື່ນໆ.ພວກເຮົາຍຶດຫມັ້ນສ້າງສະພາບແວດລ້ອມທາງສາກົນທີ່ມີສັນຕິພາບເພື່ອໃຫ້ຕົນເອງໄດ້ພັດທະນາ,ທັງຊຸກຍູ້ສັນຕິພາບຂອງໂລກດ້ວຍການພັດທະນາຂອງຕົນ.ຍຶດຫມັ້ນເດີນຕາມເສັ້ນທາງພັດທະນາໂດຍສັນຕິ,ບໍ່ແມ່ນນະໂຍບາຍຊົ່ວຄາວຂອງຈີນ,ແຕ່ແມ່ນທາງເລືອກແລະຄຳຫມັ້ນສັນຍາອັນຫນັກແຫນ້ນຂອງລັດຖະບານແລະປະຊາຊົນຈີນ.
