ປະທານາທິບໍດີປາກີສະຖານແລະສື່ມວນຊົນມະເລເຊຍຍ້ອງຍໍວຽກງານຈັດຕັ້ງຂອງເອຊຽນເກມກວາງໂຈວ
(GMT+08:00) 2010-11-14 16:37:28 cri
ແຕ່ເອຊຽນເກມກວາງໂຈວເລີ່ມດຳເນີນການແຂ່ງຂັນມານີ້, ວຽກງານຈັດຕັ້ງຂອງເຈົ້າພາບກໍ່ໄດ້ຮັບຄວາມຍ້ອງຍໍຈາກຜູ້ນຳແລະສື່ມວນຊົນຂອງຕ່າງປະເທດ.
ວັນທີ 13 ພະຈິກນີ້, ປະທານາທິບໍດີປາກີສະຖານກ່າວວ່າ, ກວາງໂຈວໄດ້ສະແດງໃຫ້ເຫັນງານມະຫະກຳເອຊຽນເກມທີ່ສຳເລັດຜົນ, ຊຶ່ງຈະບອກໃຫ້ໂລກຮູ້ວ່າ, ຈີນບໍ່ພຽງແຕ່ມີກຳລັງແຮງຕົວຈິງດ້ານເສດຖະກິດອັນມະຫາສານເທົ່ານັ້ນ, ຍັງມີວັດທະນະທຳດັ້ງເດີມແລະໜາແໜ້ນທີ່ດີເດັ່ນ.
ວັນດຽວກັນ, ໜັງສືພິມ"ຊິນໂຈວລາຍວັນ" ຊຶ່ງເປັນໜັງສືພິມທີ່ຈຳໜ່າຍຫຼາຍກວ່າໝູ່ໃນມະເລເຊຍໄດ້ພິມບົດຄວາມທີ່ມີຫົວຂໍ້ວ່າ"ຂໍສະແດງຄວາມເຄົາລົບຕໍ່ຄະນະຈັດເອຊຽນເກມກວາງໂຈວ", ໂດຍໄດ້ຍ້ອງຍໍວ່າ, ວຽກງານການຈັດຕັ້ງຂອງເອຊຽນເກມດີເດັ່ນ, ການບໍລິການທາງດ້ານຂ່າວສານກໍ່ລະອຽດຮອບຄອບ.
ບົດຄວາມຂຽນວ່າ, ພິທີຈູດທວນໄຟຂອງເອຊຽນເກມຄັ້ງນີ້ແມ່ນຈຸດດີເດັ່ນຂອງພິທີໄຂ, ທ້າວເຫີຊົງ, ນັກກິລາໂດດນ້ຳທີ່ມີຊື່ສຽງຂອງກວາງໂຈວໄດ້ພາຫຼານນ້ອຍໜ້າຮັກ 2 ຄົນຈູດໝາກກະໂພກທີ່ຕັ້ງໄວ້ຢູ່ໜ້າດິນ, ໃນເວລາໄຟໝາກກະໂພກພົ້ນຂຶ້ນ, ທວນໄຟເອຊຽນເກມກໍ່ຖືກຈູດໃນທັນທີ, ພິທີຫຼານນ້ອຍຈູດທວນໄຟນີ້ມີເອກະລັກພິເສດຂອງຈີນ, ກໍ່ໄດ້ເຮັດໃຫ້ຄົນຮູ້ສຶກໄດ້ກັບຄືນຍາມເດັກ.