ຫຼັງຈາກການແຂ່ງຂັນເປັນເວລາສິບກວ່າວັນ, ຕອນຄ່ຳວັນທີ27ພະຈິກນີ້, ງານເອຊຽນເກມຄັ້ງທີ16ທີ່ຈັດຢູ່ນະຄອນກວາງໂຈ່ວຈີນໄດ້ອັດລົງແລ້ວ. ສົມເດັດເຊັກ ຕາລານ ອັນ ອາເມັດ ອັນ ຊາບາ, ປະທານຄະນະກຳມະການໂອລິມປິກອາຊີໄດ້ເຂົ້າຮ່ວມພິທີອັດ, ແລະປະກາດງານເອຊຽນເກມກວາງໂຈ່ວອັດລົງ, ທ່ານນາງລິວອຽນຕົ່ງ, ກຳມະການກົມການເມືອງສູນກາງພັກຄອມມູນິດຈີນ, ທີ່ປຶກສາແຫ່ງລັດຈີນແລະທ່ານອື່ນໆກໍ່ໄດ້ເຂົ້າຮ່ວມພິທີອັດງານ.
ໃນເວລາກ່າວຄຳປາໄສ, ສົມເດັດອາເຮິເມັດໄດ້ສະແດງຄວາມຂອບໃຈຕໍ່ລັດຖະບານແລະປະຊາຊົນຈີນ, ເພື່ອນມິດວົງການຕ່າງໆຈາກອາຊີແລະທົ່ວໂລກທີ່ສະໜັບສະໜູນງານເອຊຽນເກມ. ສົມເດັດຊົງກ່າວວ່າ, ງານເອຊຽນເກມກວາງໂຈ່ວແມ່ນເອຊຽນເກມຄັ້ງໜຶ່ງທີ່ມີລະດັບສູງແລະເອກະລັກ, ວຽກງານກະກຽມຂອງປະຊາຊົນກວາງໂຈ່ວໄດ້ຮັບຜົນສຳເລັດຢ່າງຈົບງາມ. ສົມເດັດຫວັງວ່າຊາວໜຸ່ມແລະນັກກິລາຂອງທົ່ວທະວີບອາຊີເຕົ້າໂຮມກັນຢູ່ສ.ເກົາຫຼີໃນປີ2014, ສືບຕໍ່ສ້າງຜົນງານໃໝ່ໃນເອຊຽນເກມ.
ຫຼັງຈາກນັ້ນ, ຜູ້ຕາງໜ້າເມືອງອິນຊົນຂອງສ.ເກົາຫຼີທີ່ເປັນເຈົ້າພາບຈັດເອຊຽນເກມປີ2014ໄດ້ຮັບເອົາທຸງຂອງຄະນະກຳມະການໂອລິມປິກອາຊີ.