ວັນທີ 27 ພະຈິກນີ້, ຢູ່ນະຄອນກວາງໂຈ່ວ, ທ່ານນາງລິວຢຽນຕົງ, ກຳມະການກົມການເມືອງສູນກາງພັກກອມມູນິດຈີນ,ທີ່ປຶກສາແຫ່ງລັດຈີນໄດ້ພົບປະທ່ານສົມສະຫວາດ ເລັ່ງສະຫວັດ,ຮອງນາຍົກລັດຖະມົນຕີປະຈຳການຂອງລັດຖະບານລາວທີ່ໄປເຂົ້າຮ່ວມພິທີປິດງານກິລາອາຊີກວາງໂຈວ.
ນາງລິວຢຽນຕົງໄດ້ສະແດງຄວາມຂອບອົກຂອບໃຈຕໍ່ລັດຖະບານແລະປະຊາຊົນລາວທີ່ໄດ້ໃຫ້ການສະຫນັບສະຫນູນຕໍ່ງານເອຊຽນເກມກວາງ ໂຈ່ວ, ແລະສະແດງຄວາມຊົມເຊີຍຕໍ່ນັກກິລາລາວທີ່ໄດ້ຮັບຜົນງານທີ່ດີ.
ນາງລິວຢຽນຕົງຍັງກ່າວວ່າ, ຈີນຍ້ອງຍໍພັກແລະລັດຖະບານລາວທີ່ໄດ້ໃຫ້ການສະຫນັບສະຫນູນຢ່າງເດັດດ່ຽວຫນຽວແຫນ້ນຕະຫລອດມາແກ່ຈີນໃນບັນຫາທີ່ກ່ຽວພັນເຖິງຜົນປະໂຫຍດໃຈກາງຂອງຈີນ,ແລະຍິນດີຮ່ວມກັບປະເທດລາວ, ຜັນຂະຫຍາຍຄວາມຮັບຮູ້ຄືກັນທີ່ສຳຄັນ ກ່ຽວກັບການປັບປຸງແລະຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານຕື່ມອີກຂອງນາຍົກລັດຖະມົນຕີທັງສອງປະເທດໃນຫວ່າງກ່ອນນີ້ບໍ່ດົນ.ສອງຝ່າຍຄວນຖືໂອກາດທີ່ສ້າງສາຍພົວພັນທາງການທູດຄົບຮອບ 50 ປີໃນປີ 2011,ເພີ່ມທະວີການແລກປ່ຽນດ້ານວັດທະນະທຳ, ຊຸກຍູ້ການຮ່ວມມືຢ່າງແທ້ຈິງໃນຂົງເຂດເສດຖະກິດການຄ້າ, ການສ້າງສາພື້ນຖານໂຄງລ່າງ,ການສຶກສາ,ວັດທະນະທຳແລະກິລາ, ຮັກສາການແລກປ່ຽນແລະປະສານສົມ ທົບຢ່າງໃກ້ຊິດ, ປົກປັກຮັກສາຜົນປະໂຫຍດຮ່ວມກັນ, ເຮັດໃຫ້ມິດຕະພາບຈີນລາວຝັງເລິກຢູ່ໃນໃຈຄົນຍິ່ງຂຶ້ນ.
ທ່ານສົມສະຫວາດເລັ່ງສະຫວັດໄດ້ຊົມເຊີຍຕໍ່ງານເອຊຽນເກມກວາງ ໂຈ່ວທີ່ໄດ້ຮັບຜົນສຳເລັດຢ່າງຈົບງາມ.ທ່ານກ່າວວ່າ, ປະເທດລາວຕີລາຄາຢ່າງສູງຕໍ່ຈີນທີ່ໄດ້ເສີມຂະຫຍາຍບົດບາດສຳຄັນໃນວຽກງານສາກົນໂດຍສະເພາະແມ່ນວິກິດການການເງິນສາກົນ,ແລະເຫັນວ່າ, ການພັດທະນາແລະເຂັ້ມແຂງຂອງຈີນມີຜົນດີຕໍ່ການຊຸກຍູ້ສັນຕິພາບແລະການພັດທະນາຂອງໂລກ.
