ເວົ້າສຳລັບອາຊຽນແລ້ວ ປີ 2010 ແມ່ນປີຫນຶ່ງທີ່ຫນ້າຈາລຶກໄວ້,ກອງປະຊຸມສຸດຍອດອາຊຽນຄັ້ງທີ 17 ທີ່ໄຂຂຶ້ນຢູ່ນະຄອນຫລວງຮ່າໂນຍຂອງຫວຽດນາມໄດ້ຜ່ານແຜນແມ່ບົດກ່ຽວກັບການເຊື່ອມໂຍງເຂົ້າກັນຂອງອາຊຽນ, ເປັນຂີດຫມາຍສະແດງໃຫ້ເຫັນວ່າຂະບວນວິວັດເຮັດໃຫ້ອາຊຽນເຊື່ອມໂຍງເຂົ້າເປັນອັນຫນຶ່ງອັນດຽວກັນໄດ້ຢ່ວງບາດກ້າວໃຫມ່ທີ່ສຳຄັນ.ແຜນແມ່ບົດດັ່ງກ່າວລວມມີ 700 ກວ່າແຜນການແລະໂຄງການ, ອາຊຽນຫວັງຢາກໃຫ້ປະເທດສະມາຊິກພ້ອມກັບປະເທດຄູ່ເຈລະຈາຕັ້ງຫນ້າເຂົ້າຮ່ວມແຜນການແລະໂຄງການເຫລົ່ານີ້ດ້ວຍການລົງທຶນຫລາຍຝ່າຍ,ເພື່ອຊຸກຍູ້ການເຊື່ອມໂຍງເຂົ້າກັນພາຍໃນອາຊຽນແລະອາຊຽນກັບປະເທດຄູ່ເຈລະຈາຢ່າງແທ້ຈິງ.ສຳລັບເລື່ອງນີ້, ອາຊຽນຈະສ້າງຄະນະກຳມະການປະສານງານການເຊື່ອມໂຍງເຂົ້າກັນ,ເພື່ອປະສານງານແລະຕິດຕາມຄຸ້ມຄອງຕະຫລອດຂະບວນການປະຕິບັດແຜນແມ່ບົດດັ່ງກ່າວ.ນອກນີ້, ໃນກອງປະຊຸມສຸດຍອດອາຊຽນຄັ້ງທີ 16 ແລະກອງປະຊຸມຕ່າງໆທີ່ໄຂຂຶ້ນຢູ່ນະຄອນຫລວງຮ່າໂນຍໃນເດືອນເມສາປີນີ້,ປະເທດສະມາຊິກອາຊຽນຕົກລົງຈະແກ້ໄຂຄວາມຂັດແຍ່ງກັນພາຍໃນດ້ວຍຫລັກການພາຍໃນຂອບກົດບັດອາຊຽນ;ໄດ້ຜ່ານຖະແຫລງການກ່ຽວກັບການພັດທະນາຊັບພະຍາກອນມະນຸດແລະຝີມືຂອງຜູ່ອອກແຮງງານ, ເພື່ອຊຸກຍູ້ໃຫ້ເສດຖະກິດຟື້ນຕົວຄືນແລະການພັດທະນາແບບຍືນຍົງ;ໄດ້ປະກາດຖະແຫລງການຮ່າໂນຍທີ່ຫວັງຈະປັບປຸງສະຫວັດດີການຂອງແມ່ຍິງແລະເດັກນ້ອຍ;ຜ່ານເອກະສານຮ່ວມມືກັນຊອກຫາແລະກູ້ໄພເທິງທະເລ.ເອກະສານເຫລົ່ານີ້ຈະມີຜົນດີຕໍ່ການຊຸກຍູ້ການຜັນຂະຫຍາຍກົດບັດອາຊຽນ,ແລະໃຫ້ການຄ້ຳປະກັນທາງກົດຫມາຍແກ່ການສ້າງອາຊຽນໃຫ້ເຊື່ອມໂຍງເຂົ້າເປັນອັນຫນຶ່ງອັນດຽວກັນ.
ການເພີ່ມທະວີແລະຂະຫຍາຍການພົວພັນກັບຕ່າງປະເທດແມ່ນສິ່ງສຳຄັນຂອງອາຊຽນໃນການສ້າງສາແລະການຮ່ວມມືກັບຕ່າງປະເທດຕະຫຼອດມາ.ໃນໄລຍະກອງປະຊຸມສຸດຍອດຂອງອາຊຽນທີ່ຈັດຂຶ້ນໃນເດືອນຕຸລາປີນີ້,ການຮ່ວມມືດ້ານເສດຖະກິດການຄ້າແລະການເງິນໄດ້ກາຍເປັນຈຸດສຸມທີ່ອາຊຽນແລະປະເທດຄູ່ເຈລະຈາສົນໃຈຮ່ວມກັນ. ໃນໄລຍະຈັດກອງປະຊຸມສຸດຍອດ,ອາຊຽນກັບຈີນ,ຍີ່ປຸ່ນແລະສ.ເກົາຫຼີໄດ້ຈັດກອງປະຊຸມ"ອາຊຽນບວກ 3 ",ແລະຈັດກອງປະຊຸມອາຊຽນບວກຫນຶ່ງ ເຊັ່ນ: ກັບຈີນ,ຍີ່ປຸ່ນ,ສ.ເກົາຫຼີ,ອິນເດຍ,ອົສຕຼາລີ,ນູແວັນເຊລັງ,ຣັດເຊຍແລະປະເທດອື່ນໆ. ຜູ່ນຳຈີນແລະອາຊຽນໄດ້ລົງນາມໃນຖະແຫຼງການຮ່ວມກ່ຽວກັບການພັດທະນາແບບຍືນຍົງ,ແລະປະກາດການຮ່ວມມື13ຂໍ້ເພື່ອລົງເລິກການຮ່ວມມືລະຫວ່າງສອງຝ່າຍ. ທ່ານເວີ່ນເຈ່ຍປາວ,ນາຍົກລັດຖະມົນຕີຈີນກ່າວວ່າ,ຈີນຍິນດີຮ່ວມກັບປະເທດສະມາຊິກໃນອາຊຽນສ້າງເຂດການຮ່ວມມືດ້ານເສດຖະກິດການຄ້າແຫ່ງຫນຶ່ງພາຍໃນ 5 ປີ, ພະຍາຍາມເຮັດໃຫ້ຍອດມູນຄ່າການຄ້າລະຫວ່າງຈີນກັບອາຊຽນບັນລຸ 500 ຕື້ໂດລາພາຍໃນ 2015.
ໃນກອງປະຊຸມສຸດຍອດອາຊຽນກັບຈີນ,ຍີ່ປຸ່ນແລະສ.ເກົາຫຼີ,ຜູ່ນຳທີ່ເຂົ້າຮ່ວມກອງປະຊຸມໄດ້ເປັນເອກະສັນກັນກ່າວວ່າ,ຈະໃຊ້ການເຄື່ອນໄຫວທີ່ບັງເກີດຜົນ,ຊຸກຍູ້ການຈັດຕັ້ງປະຕິບັດສັນຍາຕ່າງໆພາຍໃນຂອບອາຊຽນ+ 3,ເພີ່ມທະວີການຮ່ວມມືໃນຂະແຫນງການທະນາຄານແລະເງິນຕາ,ລົງເລິກການແລກປ່ຽນແລະຮ່ວມມືກັນໃນຂົງເຂດການຄ້າ,ການລົງທຶນ,ການທ່ອງທ່ຽວ,ການສ້າງພື້ນຖານໂຄງລ່າງດ້ານຄົມມະ ນາຄົມແລະອື່ນໆ.ໃນນັ້ນ,"ສັນຍາຂໍ້ລິເລີ່ມຊຽງໃຫມ່ແບບຫຼາຍຝ່າຍ"ທີ່ 10 ປະເທດໃນອາຊຽນກັບຈີນ,ຍີ່ປຸ່ນແລະສ.ເກົາຫຼີຮ່ວມກັນນັ້ນ ມີຄວາມຫມາຍສຳຄັນຕໍ່ການຮັກສາຄວາມຫມັ້ນທ່ຽງດ້ານການເງິນໃນພາກພື້ນ,ສາງຄັງສຳຮອງເງິນຕາຕ່າງ ປະເທດພາກພື້ນທີ່ມີມູນຄ່າເຖິງ 120 ຕື້ໂດລາ ບຸກຄົນສຳຄັນໃນວົງການການເງິນເອີ້ນມັນວ່າເປັນສາງເລືອດເງິນຕາຂອງທະວີບອາຊີ.
ເຖິງວ່າຂະບວນການເຊື່ອມໂຍງອາຊຽນເປັນອັນຫນຶ່ງອັນດຽວກັນໄດ້ຮັບຄວາມຄືບຫນ້າໃນລະດັບໃດຫນຶ່ງກໍ່ຕາມ,ແຕ່ຖ້າຢາກໃຫ້ບັນລຸເປົ້າຫມາຍທີ່ເຊື່ອມໂຍງອາຊຽນເຂົ້າເປັນອັນຫນຶ່ງອັນດຽວກັນໃນ 2015, ຝ່າຍຕ່າງໆຍັງຕ້ອງທຳຄວາມພະຍາ ຍາມຫຼາຍຂຶ້ນ. ປະເທດຕ່າງໆໃນອາຊຽນຄວນຫຼຸດຊ່ອງຫວ່າງໃນດ້ານການພັດ ທະນາ, ນຳໃຊ້ຊ່ອງທາງຕ່າງໆເຊັ່ນ:ການເລັ່ງລັດການຮ່ວມມືໃນອະນຸພາກພື້ນໃຫ້ໄວຂຶ້ນແລະພັດທະນາການຮ່ວມມືດ້ານເຕັກນິກແລະອື່ນໆ,ເພື່ອຊ່ອຍເຫຼືອໃຫ້ບາງປະເທດສະມາຊິກອາຊຽນທີ່ເສດຖະກິດດ້ອຍພັດທະນາ ສາມາດເຊື່ອມໂຍງເຂົ້າເປັນອັນຫນຶ່ງອັນດຽວກັນໄວກວ່າເກົ່າ.ນອກນີ້,＂ແຜນແມ່ບົດກ່ຽວກັບການເຊື່ອມຕໍ່ອາຊຽນ＂ຍັງຕ້ອງລະດົມທຶນຈຳນວນຫຼວງຫຼາຍ,ເພື່ອກໍ່ສ້າງພຶ້ນຖານໂຄງລ່າງຕ່າງໆເຊັ່ນ: ຖະຫນົນ,ຂົວແລະອື່ນໆ,ນີ້ກໍ່ຮຽກຮ້ອງໃຫ້ອາຊຽນໃນຂະນະທີ່ລະດົມທຶນຫຼາຍຝ່າຍນັ້ນຍັງຕ້ອງໃຊ້ມາດຕະການ ເພື່ອຮັບປະກັນການສະຫນອງທຶນກໍ່ສ້າງແກ່ປະເທດຕ່າງໆໃນອາຊຽນໂດຍໄວ
