ວັນທີ23ທັນວານີ້, ອົງການປົກຄອງປັກກິ່ງໄດ້ຈັດງານຖະແຫຼງຂ່າວ, ແລະປະກາດຂໍ້ກຳນົດໃຫມ່ເພື່ອຫລຸດຜ່ອນການຈໍລະຈອນຕິດຂັດ, ຂໍ້ກຳນົດໃຫມ່ໄດ້ເພີ່ມການຄຸ້ມຄອງລົດຍົນ. ຕໍ່ໄປເຊີນຟັງລາຍລະອຽດ.
ກ່ອນຫນ້ານີ້, ອົງການປົກຄອງປັກກິ່ງໄດ້ສະເຫນີຄວາມເຫັນກ່ຽວກັບການຊຸກຍູ້ການຈໍລະຈອນນະຄອນຫລວງພັດທະນາຕາມວິທະຍາສາດຕື່ມອີກ, ເພີ່ມຄວາມແຮງຜ່ອນຄາຍການຈໍລະຈອນຕິດຂັດແລະແຜນການປັບປຸງລາຄາຈອດລົດນອກເຂດຊຸມຊົນ, ແລະໄດ້ສັງລວມຄວາມຄິດຄວາມເຫັນຂອງປະຊາຊົນໃນຫວ່າງມໍ່ໆມານີ້. ມື້ນີ້, ຂໍ້ກຳນົດໃຫມ່ເພື່ອ ຫລຸດຜ່ອນການຈໍລະຈອນຕິດຂັດນະຄອນຫລວງປັກກິ່ງເລີ່ມປະຕິບັດຢ່າງເປັນທາງການ. ມາດຕະການໃຫມ່ເຫຼົ່ານີ້, ແນໃສ່ຜ່ອນຄາຍສະພາບຈໍລະຈອນຕິດຂັດທີ່ນັບມື້ນັບຫນັກຫນ່ວງຂຶ້ນຂອງປັກກິ່ງ.
ອີງຕາມຂໍ້ກຳນົດໃຫມ່, ປັກກິ່ງໄດ້ເພີ່ມທະວີການຄຸ້ມຄອງລົດຍົນຕື່ມອີກ. ໃນນັ້ນ, ການປ່ຽນແປງໃຫຍ່ທີ່ສຸດກໍແມ່ນມາດຕະການຄວບຄຸມຈຳນວນລົດເກັ໋ງ. ປີ2011, ການເພີ່ມຂຶ້ນຂອງຈຳນວນລົດຍົນປັກກິ່ງຈະບໍ່ໃຫ້ເກີນ2ແສນ4ໝື່ນຄັນ, ຫລືແຕ່ລະເດືອນບໍ່ໃຫ້ເກີນ2ໝື່ນຄັນ. ສຳລັບວິສາຫະກິດ, ອົງການວິຊາການ, ອົງການຈັດຕັ້ງສັງຄົມແລະບຸກຄົນທີ່ມີເງື່ອນໄຂຊື້ລົດຄົບຖ້ວນ, ຈະອີງຕາມຫລັກການເປີດເຜີຍແລະຍຸດຕິທຳ, ຈັບສະຫລາກເອົາປ້າຍທະບຽນລົດໂດຍບໍ່ເສຍເງິນ. ທ່ານລິວສ້ຽວມິງ, ປະທານຄະນະກຳມະການຄົມມະນາຄົມປັກກິ່ງກ່າວວ່າ:
"ຂັ້ນຕອນຈັບສະຫລາກເອົາປ້າຍທະບຽບລົດແມ່ນເປີດເຜີຍຕໍ່ສັງຄົມ, ທຸກຄົນທີ່ມີເງື່ອນໄຂຄົບຖ້ວນລ້ວນແຕ່ມີໂອກາດເທົ່າທຽມກັນ. ບໍ່ວ່າອົງການຫລືບຸກຄົນທີ່ພວກເຮົາເລືອກນັ້ນ, ເງື່ອນໄຂສະໝັກແລະຂັ້ນຕອນຈັບສະຫລາກລ້ວນແຕ່ເປີດເຜີຍຕໍ່ສັງຄົມ, ທຸກຄົນສາມາດໄປເບິ່ງໄດ້. ນອກນີ້, ຂັ້ນຕອນຈັບສະຫລາກເອົາປ້າຍທະບຽນລົດ, ຍັງມີຫ້ອງການຢັ້ງຢືນທາງກົນຫມາຍຕິດຕາມກວດກາ, ຫລັງຈາກການຈັບສະຫລາກ, ຈະເອົາຜົນການ ຈັບສະຫລາກຂຶ້ນເວັບໄຊທັນທີ, ທຸກຄົນສາມາດໄປຊອກເບິ່ງຢູ່ເວັບໄຊ້, ຂັ້ນ ຕອນນີ້ຍັງມີກົນໄກຕິດຕາມກວດກາອີກດ້ວຍເຊິ່ງທຸກຄົນສາມາດໄປແຈ້ງ ການກະທຳຜິດຕໍ່ຂັ້ນເທິງ, ຂ້າພະເຈົ້າເຊື່ອວ່າຂັ້ນຕອນນີ້ແມ່ນມີຄວາມຍຸດ ຕິທຳ, ເຄັ່ງຄັດ, ເປີດເຜີຍແລະຕາມຫລັກການວິທະຍາສາດ.
ນອກຈາກເພີ່ມທະວີການຄຸ້ມຄອງຕໍ່ຈຳນວນລົດຍົນແລ້ວ, ປັກກິ່ງຍັງຈະສືບຕໍ່ປະຕິບັດແລະປັບປຸງມາດຕະການຄຸ້ມຄອງການອອກເດີນລົດຢູ່ບາງເຂດໃນມື້ເຂົ້າການ, ຕາມຂໍ້ກຳນົດໃໝ່, ລົດໂດຍສານທີ່ບໍ່ລົງທະບຽນຢູ່ປັກກິ່ງຫ້າມແລ່ນຢູ່ໃນທາງຮອບທີ 5 ໃນມື້ເຂົ້າການແລະເລິກການ. ນອກຈາກນັ້ນ, ຂໍ້ກຳນົດໃໝ່ຍັງໄດ້ປັບປຸງການເກັບຄ່າຈອດລົດ, ທົ່ວປັກກິ່ງໄດ້ແບ່ງເປັນເຂດ 3 ປະເພດ, ເກັບຄ່າຈອດລົດຕ່າງກັນ. ຢູ່ເຂດລົດຕິດຫຼາຍຈະເກັບຄ່າຈອດລົດ 10 ຢວນຕໍ່ຊົ່ວໂມງ. ສ່ວນເລື່ອງທີ່ຈະເກັບຄ່າລົດຕິດຢູ່ທາງລົດຕິດເລື້ອຍໆ, ຍັງພວມພິຈາລະນາຢູ່. ທ່ານໂຈ່ວເຈິ້ງຢູ, ຮອງເລຂາທິການອົງການປົກຄອງປັກກິ່ງກ່າວວ່າ:
"ຜ່ອນຄາຍສະພາບການລົດຕິດຂອງປັກກິ່ງຈະແມ່ນວຽກງານຍາວນານ. ແລ່ນລົດສະດວກຫຼືບໍ່ແມ່ນພົວພັນກັບຜົນປະໂຫຍດຕົວຈິງຂອງທຸກຄົນທີ່ເຮັດວຽກແລະອາໄສຢູ່ປັກກິ່ງ, ສະພາບລົດຕິດແມ່ນອົງການປົກຄອງແລະປະຊາຊົນປັກກິ່ງບໍ່ຢາກເຫັນ, ມາດຕະການຄຸ້ມຄອງທີ່ວາງອອກເທື່ອນີ້ກໍແມ່ນມາດຕະການໂດຍລວມເພື່ອຜ່ອນຄາຍລົດຕິດແລະລະບຽບການຂົນສົ່ງສາທາລະນະ, ແລະຮັບປະກັນໃຫ້ຜູ້ໃຊ້ລົດສ່ວນຫຼາຍມີສະພາບແວດລ້ອມທີ່ແລ່ນລົດຢ່າງປອດໄພແລະສະດວກສະບາຍ."
ໃນເວລາເພີ່ມທະວີການຄຸ້ມຄອງລົດຍົນ, ປັກກິ່ງຍັງຈະປັບປຸງການວາງຜັງເມືອງໃຫ້ດີຕື່ມອີກ, ລວມທັງຈັດວາງການບໍລິການສາທາລະນະເຊັ່ນການສຶກສາ, ການບໍລິຫານສາທາລະນະສຸກແລະອື່ນໆຢູ່ເຂດເມືອງໃໝ່, ເລັ່ງລັດສ້າງພື້ນຖານໂຄງລ່າງທາງຫຼວງ, ຍົກສູງຄວາມສາມາດຂົນສົ່ງ, ພັດທະນາລະບົບຂົນສົ່ງສາທາລະນະກ່ອນເປັນຕົ້ນ, ເພື່ອຜ່ອນຄາຍຄວາມກົດດັນດ້ານລົດຕິດຂອງຕົວເມືອງ.
