ວັນທີ1 ມັງກອນນີ້ແມ່ນເຂດການຄ້າເສລີຈີນ-ອາຊຽນສ້າງສຳເລັດຢ່າງຮອບດ້ານຄົບຮອບ 1 ປີ. ທ່ານຊຸ່ນຢວນຈ່ຽງ,ຮອງຫົວຫນ້າກົມການພົວພັນເສດຖະກິດການຄ້າສາກົນຂອງກະຊວງການຄ້າຈີນກ່າວວ່າ,ນັບແຕ່ເຂດການຄ້າເສລີຈີນ-ອາຊຽນສ້າງສຳເລັດຫນຶ່ງປີເປັນຕົ້ນມາ, ການກໍ່ສ້າງໄດ້ຮັບຜົນສຳເລັດຢ່າງຊັດເຈນ,ແລະສ້າງໂອກາດໃຫມ່ຫຼາຍກວ່າເກົ່າໃຫ້ແກ່ການຍົກລະດັບການຮ່ວມມືດ້ານເສດຖະກິດການຄ້າລະຫວ່າງ ສອງຝ່າຍຕື່ມອີກແລະເລັ່ງລັດບາດກ້າວການຮ່ວມມືໃຫ້ໄວຂຶ້ນ.
ປີ 2010,ຈິນກັບອາຊຽນໄດ້ດຳເນີນກິດຈະກຳຈຳນວນຫຼວງຫຼາຍກ່ຽວກັບເສດ ຖະກິດການຄ້າພາຍໃຕ້ຫົວຂໍ້ທີ່ວ່າ"ເຂດການຄ້າເສລີຈີນ-ອາຊຽນ", ນອກຈາກງານວາງສະແດງສິນຄ້າຈີນ-ອາຊຽນແລ້ວ,ຍັງໄດ້ຈັດເວທີປຶກສາຫາລືກ່ຽວກັບເຂດການຄ້າເສລີຈີນ-ອາຊຽນ,ເປີດເວັບໄຊທາງການຂອງເຂດການຄ້າເສລີຈີນ-ອາຊຽນຢ່າງເປັນທາງການ,ແລະໄດ້ຈັດເວທີປຶກສາຫາລືກ່ຽວກັບວິສາຫະກິດຂະຫນາດກາງແລະນ້ອຍຂອງຈີນອາຊຽນ. ການທີ່ດຳເນີນກິດຈະກດ້ານຳເສດຖະກິດການຄ້າເຫຼົ່ານີ້ໄດ້ຊຸກຍູ້ການຮ່ວມມືດ້ານການທຸລະກິດລະຫວ່າງສອງຝ່າຍ,ແລະຊຸກຍູ້ການກໍ່ສ້າງເຂດການຄ້າເສລີຈີນອາຊຽນ,ແລ້ວກາຍເປັນຈຸດສຸມແລະຈຸດເດັ່ນນັບແຕ່ເຂດການຄ້າເສລີຈີນ-ອາຊຽນສ້າງສຳເລັດຫນຶ່ງປີເປັນຕົ້ນມາ.ທ່ານກ່າວວ່າ:
"ກິດຈະກຳດ້ານເສດຖະກິດການຄ້າພາຍໃຕ້ຫົວຂໍ້ກ່ຽວກັບການຮ່ວມມືໃນເຂດການຄ້າເສລີຈີນອາຊຽນໄດ້ຈັດຂຶ້ນເລື້ອຍໆ, ຕົວຢ່າງຄືເດືອນມັງກອນ 2010 ໄດ້ຈັດເວທີປຶກສາຫາລືກ່ຽວກັບການຄ້າເສລີຈີນອາຊຽນຢູ່ນະຄອນນານນິງຂອງເຂດກວາງຊີ, ນີ້ແມ່ນພາກສ່ວນຄຸ້ມຄອງດ້ານເສດຖະກິດການຄ້າຂອງ 11 ປະເທດເປັນເຈົ້າພາບຮ່ວມກັນ,ເຊິ່ງມີລະດັບສູງແລະມີເນື້ອໃນທີ່ຕິດແທ້ຕົວຈິງ, ນີ້ມີບົດບາດຊຸກຍູ້ທີ່ສຳຄັນຕໍ່ການພັດທະນາຫຼັງຈາກເຂດການຄ້າເສລີຈີນອາຊຽນສ້າງສຳເລັດແລ້ວ."ທ່ານຊຸ່ນຢວນຈ່ຽງກ່າວວ່າ,ໃນຕໍ່ຫນ້າ,ຈີນຈະມີແຜນການຮ່ວມມືກັບປະເທດຕ່າງໆໃນອາຊຽນ,ເພີ່ມການໂຄສະນາເຜີຍແຜ່ຕໍ່ວິສາຫະກິດຢູ່ພາຍໃນປະເທດແລະຕ່າງປະເທດໃຫ້ຫຼາຍຂຶ້ນ,ເພື່ອຍົກອັດຕານຳໃຊ້ນະໂຍບາຍໃຫ້ຂໍ້ສະດວກພິເສດຂອງເຂດການຄ້າເສລີຈີນອາຊຽນໃຫ້ສູງຂຶ້ນ. ທ່ານຍັງກ່າວເນັ້ນວ່າ,ການທີ່ເຮັດໃຫ້ລະບຽບການຜ່ານດ່ານພາສີສະດວກກວ່າເກົ່າ ແມ່ນຈຸດສຸມຂອງວຽກງານໃນຕໍ່ຫນ້າ.ອັນນີ້ຈະເຮັດໃຫ້ວິສາຫະກິດຜ່ານດ່ານພາສີສະດວກກວ່າເກົ່າ.
"ກ່ຽວກັບການເຮັດໃຫ້ລະບຽບການສະດວກກວ່າເກົ່າ,ປະຈຸບັນ,ດ່ານພາສີຂອງສອງຝ່າຍໄດ້ເລີ່ມລົງມືເຮັດໃຫ້ລະບຽບການຂອງພວກເຮົາສົມບູນຂຶ້ນ,ນອກນັ້ນ,ໃນເວລາເຮັດວຽກລະອຽດ,ຖ້າສອງຝ່າຍມີຝ່າຍໃດເກີດມີບັນຫາ,ພວກເຮົາກໍ່ຕ້ອງແກ້ໄຂຢ່າງທັນການ.ຈີນກັບອາຊຽນຍັງມີຄະນະກຳມະການການເຈລະຈາ,ແມ່ນສ້າງຂຶ້ນໃນເວລາເຈລະຈາກັນກ່ຽວກັບສັນຍາໃນເມື່ອກ່ອນ.ບົດບາດສຳຄັນອັນໜຶ່ງຂອງຄະນະກຳມະການດັ່ງກ່າວກໍ່ແມ່ນຊ່ວຍແກ້ໄຂບັນຫາທີ່ເກີດຂຶ້ນໃນເວລາປະຕິບັດສັນຍາ.ລວມທັງບັນຫາທີ່ເກີດຂຶ້ນໃນການເຮັດໃຫ້ການຄ້າສະດວກຂຶ້ນກວ່າເກົ່າເຊິ່ງໄດ້ກ່າວມາແລ້ວ."
ທ່ານຊຸ່ນຢວນຈ່ຽງເຫັນວ່າ,ບັນຫາຜ່ານດ່ານກ່ຽວພັນເຖິງລະບອບຂອງປະເທດໜຶ່ງ,ຕ້ອງເຄົາລົບກົດລະບຽບຂອງແຕ່ລະປະເທດ;ພ້ອມກັນນັ້ນ,ກໍ່ກ່ຽວພັນເຖິງສະພາບແວດລ້ອມການຜ່ານດ່ານ,ແລະບັນຫາດ້ານຄຸນນະພາບຂອງພະນັກງານ.ເພື່ອເລື່ອງນີ້,ໃນຕໍ່ໜ້າ,ຈີນກັບອາຊຽນຈະຮ່ວມກັນເພີ່ມການປັບປຸງໃນດ້ານນີ້.
ຕອນທ້າຍ,ທ່ານຊຸ່ນຢວນຈ່ຽງຊີ້ອອກວ່າ,ຄວາມໝາຍຂອງໂອກາດໃໝ່ທີ່ເຂດການຄ້າເສລີຈີນ-ອາຊຽນສະໜອງໃຫ້ນັ້ນກໍ່ແມ່ນໄດ້ເປີດຕະຫຼາດຂອງສອງຝ່າຍ.ຄຽງຄູ່ກັບພາສີໄດ້ຫຼຸດຕ່ຳລົງ,ຂົງເຂດການຮ່ວມມືເສດຖະກິດການຄ້າລະຫວ່າງສອງຝ່າຍໄດ້ກວ້າງຂວາງກວ່າເກົ່າ,ສິນຄ້າ,ຄົນແລະການບໍລິການສາມາດເຂົ້າສູ່ຕະຫຼາດຂອງສອງຝ່າຍຢ່າງສະດວກແລະງ່າຍກວ່າເກົ່າ,ນີ້ຈະອຳນວຍໂອກາດໃໝ່ຫຼາຍກວ່າເກົ່າໃຫ້ແກ່ສອງຝ່າຍໃນດ້ານການຍົກລະດັບການຮ່ວມມືເສດຖະກິດການຄ້າໃຫ້ສູງຂຶ້ນແລະເລັ່ງລັດການຮ່ວມມືລະຫວ່າງສອງຝ່າຍ,ອະນາຄົດແຫ່ງການຮ່ວມມືຈະກວ້າງຂວາງກວ່າເກົ່າ,ທ່ວງທ່າພັດທະນາໃນຕໍ່ໜ້າກໍ່ຈະເຂັ້ມແຂງກວ່າເກົ່າ.
