ຍີ່ປຸ່ນຮຽກຮ້ອງໃຫ້ຖານທັບອາເມລິກາປະຈຳຍີ່ປຸ່ນຍ້າຍການເຝິກຊ້ອມຈຳນວນໜຶ່ງໄປບ່ອນອື່ນ
(GMT+08:00) 2011-01-06 15:20:23 cri
ໃນກອງປະຊຸມຂ່າວທີ່ຈັດຂຶ້ນໃນຕອນເຊົ້າວັນທີ5ມັງກອນນີ້, ທ່ານກິຕາຊາວາ ໂຕຊີມິ, ລັດຖະມົນຕີວ່າການກະຊວງປ້ອງກັນປະເທດຍີ່ປຸ່ນກ່າວວ່າ, ຈະປຶກສາຫາລືກັບອາເມລິກາກ່ຽວກັບການຍ້າຍການເຝິກຊ້ອມຍົນຮົບຈຳນວນໜຶ່ງຂອງຖານທັບກາເດນາຂອງອາເມລິກາປະຈຳແຂວງໂອກິນາວາຍີ່ປຸ່ນໄປບ່ອນອື່ນ. ທ່ານກິຕາຊາວາ ໂຕຊີມິກ່າວວ່າ, ເພື່ອຫຼຸດຜ່ອນຜົນກະທົບທີ່ກອງທະຫານປະຈຳຍີ່ປຸ່ນສ້າງຂຶ້ນຕໍ່ປະຊາຊົນແຂວງໂອກິນາວາ, ລັດຖະບານຍີ່ປຸ່ນພວມປຶກສາຫາລືກ່ຽວກັບຍ້າຍການເຝິກຊ້ອມຍົນເຮລີກົດແຕສວນໜຶ່ງຂອງຖານທັບຟູເຕັນມາໄປເຂດອື່ນຂອງຍີ່ປຸ່ນ, ແລະຈະປຶກສາຫາລືກັບອາເມລິກາກ່ຽວກັບເລື່ອງນີ້. ຫາງສຽງເຫັນວ່າ, ການກະທຳດັ່ງກ່າວຂອງຍີ່ປຸ່ນແມ່ນຢາກຫຼຸດຜ່ອນຜົນກະທົບຂອງຖານທັບທີ່ມີຕໍ່ແຂວງໂອກິນາວາ, ເພື່ອໃຫ້ອົງການປົກຄອງທ້ອງຖິ່ນຮ່ວມມືໃນບັນຫາຟູເຕັນມາ.
ຖານທັບກາເດນາຂອງກອງທະຫານອາເມລິກາຕັ້ງຢູ່ພາກກາງຂອງເກາະໂອກິນາວາ, ແມ່ນຖານທັບອາກາດທີ່ສຳຄັນແຫ່ງໜຶ່ງຂອງກອງທັບອາເມລິກາຢູ່ອາຊີ, ມີຍົນຮົບປະມານ100ລຳ. ຍົນຮົບອາເມລິກາຢູ່ຖານທັບແຫ່ງນີ້ບິນ24ຊົ່ວໂມງຢ່າງບໍ່ຢຸດເຊົາ, ໄດ້ສ້າງຜົນກະທົບຕໍ່ຮ່າງກາຍແລະຈິດໃຈຂອງປະຊາຊົນທີ່ອາໄສຢູ່ເຂດອ້ອມຂ້າງຢ່າງຮຸນແຮງ. ໃນເດືອນພຶດສະພາປີ2006, ໃນເວລາທີ່ຍີ່ປຸ່ນແລະອາເມລິກາຈັດວາງແຜນການປັບປຸງກອງທະຫານອາເມລິກາປະຈຳຍີ່ປຸ່ນ, ລັດຖະບານສອງປະເທດກໍ່ໄດ້ຕົກລົງກັນກ່ຽວກັບຍ້າຍການເຝິກຊ້ອມຍົນຮົບຈຳນວນໜຶ່ງຂອງຖານທັບກາເດນາ. ເລີ່ມແຕ່ປີ2007, ການເຝິກຊ້ອມບາງສ່ວນຂອງຖານທັບກາເດນາກໍ່ຖືກຍ້າຍໄປຖານທັບອາກາດຂອງກອງທັບປ້ອງກັນຕົວຍີ່ປຸ່ນອື່ນໆທັງໝົດ6ແຫ່ງ, ເຊັ່ນ, ຖານທັບຈິໂຕເຊທີ່ຢູ່ເກາະຮັອກໄກໂດເປັນຕົ້ນ, ແລະເຝິກຊ້ອມຮ່ວມກັນກັບກອງທັບປ້ອງກັນຕົວຍີ່ປຸ່ນ. ໃນເດືອນພຶດສະພາປີ2010, ໃນສັນຍາລະຫວ່າງຍີ່ປຸ່ນກັບອາເມລິກາໄດ້ກຳນົດຢ່າງຈະແຈ້ງຕື່ມອີກວ່າ, ໃນບັນຫາການຍົກຍ້າຍການເຝິກຊ້ອມຂອງຖານທັບກາເດນາ, ຈະປຶກສາກ່ຽວກັບເຂດທີ່ຢູ່ນອກຍີ່ປຸ່ນ, ເຊັ່ນ, ເຂດກົວຮານແລະບ່ອນອື່ນໆ, ວັນທີ1ມັງກອນນີ້, ສື່ມວນຊົນຍີ່ປຸ່ນເປີດເຜີຍວ່າ, ເຈົ້າໜ້າທີ່ຫຼາຍຄົນຂອງລັດຖະບານຍີ່ປຸ່ນຢືນຢັນວ່າ, ຍີ່ປຸ່ນແລະອາເມລິກາໄດ້ຕົກລົງກັນກ່ຽວກັບການຍົກຍ້າຍການເຝິກຊ້ອມ, ຄາດວ່າຈະປະຕິບັດພາຍໃນປີນີ້. ວັນທີ13ມັງກອນນີ້, ທ່ານໂຣເບິດ ເກັສ, ລັດຖະມົນຕີວ່າການກະຊວງປ້ອກກັນປະເທດອາເມລິກາໄປຢ້ຽມຢາມຍີ່ປຸ່ນ, ແລະພົບປະເຈລະຈາກັບທ່ານກິຕາຊາວາ ໂຕຊີມີ, ລັດຖະມົນຕີວ່າການກະຊວງປ້ອງກັນປະເທດຍີ່ປຸ່ນ, ແລະຈະຕົກລົງກັນກ່ຽວກັບເລື່ອງນີ້ສຸດທ້າຍ. ຖ້າວ່າການຍົກຍ້າຍການເຝິກຊ້ອມການເປັນຈິງ, ນີ້ຈະແມ່ນການເຝິກຊ້ອມຂອງກອງທະຫານອາເມລິກາປະຈຳໂອກິນາວາຖືກຍົກຍ້າຍໄປສະຖານທີ່ນອກປະເທດຍີ່ປຸ່ນເປັນຄັ້ງທຳອິດ.
ສະນັ້ນ, ສື່ມວນຊົນຍີ່ປຸ່ນເຫັນໂດຍທົ່ວໄປວ່າ, ການກະທຳຂອງລັດຖະບານຍີ່ປຸ່ນແມ່ນນະໂຍບາຍພິເສດເພື່ອໃຫ້ອົງການປົກຄອງທ້ອງຖິ່ນຜ່ອນສັ້ນຜ່ອນຍາວຕໍ່ບັນຫາຟູເຕັນມາ. ປະຈຸບັນ, ເຖິງວ່າລັດຖະບານຍີ່ປຸ່ນແລະອາເມລິກາໄດ້ເຊັນສັນຍາກ່ຽວກັບບັນຫາການຍ້າຍຖານທັບຟູເຕັນມາໄປສູ່ບ່ອນອື່ນ, ແຕ່ໃນແຂວງໂອກີນາວາ, ບໍ່ວ່າຈະເປັນຜູ້ນຳຫຼືປະຊາຊົນ, ລ້ວນແຕ່ປະຕິເສດບໍ່ຍອມຮັບແຜນການ ຍົກຍ້າຍດັ່ງກ່າວ, ບັນຫານີ້ກໍ່ເລີຍຖືກໂຈາະໄວ້. ລັດຖະບານຍີ່ປຸ່ນຫວັງວ່າ, ຜ່ານການຍ້າຍການຝຶກຊ້ອມຈຳນວນໜຶ່ງ, ຈະຊ່ວຍຫຼຸດຜ່ອນຜົນກະທົບຕໍ່ປະຊາຊົນທ້ອງຖິ່ນ, ແລະເຮັດໃຫ້ອົງການປົກຄອງທ້ອງຖິ່ນຜ່ອນສັ້ນຜ່ອນຍາວຕໍ່ບັນຫາຟູເຕັນມາ, ແລ້ວຍອມຮັບສັນຍາຍີ່ປຸ່ນອາເມລິກາ.
ນັກວິຈານຊີ້ອອກວ່າ, ນະໂຍບາຍພິເສດດັ່ງກ່າວຈະບໍ່ມີຜົນປະໂຫຍດ. ຢູ່ຖານທັບຄາເດນາ, ນອກຈາກກອງທະຫານປະຈໍາແລ້ວ, ແຕ່ລະມື້ຍັງມີຍົນອື່ນໆຂຶ້ນ-ລົງ ຢ່າງຫຼວງຫຼາຍ, ໄດ້ສ້າງຄວາມເນື່ອງນັນສຽງດັງລົບກວນປະຊາຊົນທີ່ຢູ່ບໍລິເວນໃກ້ຄຽງ, ສະນັ້ນ, ການຍ້າຍການຝຶກຊ້ອມບາງສ່ວນຈະບໍ່ສາມາດແກ້ໄຂບັນຫາໄດ້ຢ່າງແທ້ຈິງ. ປະຈຸບັນ, ເຖິງວ່າອົງການປົກຄອງແຂວງໂອກີນາວາບໍ່ໄດ້ສະແດງຄວາມເຫັນຢ່າງຈະແຈ້ງຕໍ່ການກະທຳດັ່ງກ່າວຂອງລັດຖະບານຍີ່ປຸ່ນ, ແຕ່ອີງຕາມການລາຍງານຂ່າວຂອງສື່ມວນຊົນອົງການປົກຄອງແຂວງໂອກີນາວາ, ທ່ານນາ ຄາອິມາ ຮີໂຣຄາຊູ, ເຈົ້າແຂວງແຂວງໂອກີນາວາໄດ້ຕົກລົງຈະດຳເນີນແຜນການຍົກຍ້າຍຖານທັບຟູເຕັນມາຂອງກອງທັບອາເມລິກາປະຈຳຍີ່ປຸ່ນອອກຈາກແຂວງພາຍໃນປີນີ້ໂດຍໄວ. ນອກນີ້, ລັດຖະບານຍີ່ປຸ່ນຍັງຢາກຍ້າຍການຝຶກຊ້ອມໃນແຂວງໂອກີນາວາຂອງກອງທັບອາເມລິກາປະຈຳຍີ່ປຸ່ນອອກຈາກແຂວງຕື່ມອີກ, ແລະຈະປຶກສາຫາລືກັບອາເມລິກາ. ແຕ່ລັດຖະບານອາເມລິກາບໍ່ພໍໃຈຕໍ່ການກະ ທຳດັ່ງກ່າວຂອງຍີ່ປຸ່ນ, ຍ້ອນບັນຫາຖານທັບຟູເຕັນມາຍັງບໍ່ທັນໄດ້ຮັບການແກ້ໄຂ. ຄາດວ່າການປະສານງານຂອງສອງຝ່າຍຈະດຳເນີນໄປຢ່າງບໍ່ສະດວກ.
