ການພັດທະນາພະລັງງານຂອງຈີນຈະຖືການຫັນປ່ຽນຮູບການພັດທະນາພະລັງງານ, ອອກແຮງປັບປຸງໂຄງປະກອບພະລັງງານ,ຄວບຄຸມປະລິມານການບໍລິໂພກພະລັງງານຢ່າງເຫມາະສົມເປັນທິດທາງຊີ້ນຳ,ເພື່ອຊຸກຍູ້ການປະຕິຮູບຮູບການການຜະລິດແລະນຳໃຊ້ພະລັງງານ.
ໃນກອງປະຊຸມວຽກງານພະລັງງານທົ່ວປະເທດທີ່ຈັດຂຶ້ນໃນວັນທີ6ທັນວານີ້, ທ່ານຈ່າງຜິງ,ປະທານຄະນະກຳມະການພັດທະນາແລະປະຕິຮູບແຫ່ງລັດຈີນກ່າວວ່າ,ເປົ້າຫມາຍຂອງຈີນທີ່ຫຼຸດການສິ້ນເປືອງພະລັງານຕໍ່GDPແຕ່ລະຫົວຫນ່ວຍໃນໄລຍະປະ ຕິບັດແຜນການ5ປີຄັ້ງທີ11ໄດ້ປະກົດຜົນເປັນຈິງໂດຍພື້ນຖານແລ້ວ,ເຊິ່ງໃກ້ກັບຄື 20%, ແຕ່ຂໍ້ມູນຫຼ້າສຸດຍັງບໍ່ໄດ້ສະຫຼຸບເທື່ອ. ນີ້ແມ່ນຈີນປະກາດຢ່າງເປີດເຜີຍເປັນເທື່ອທຳອິດກ່ຽວກັບການບັນລຸເປົ້າຫມາຍທີ່ຫຼຸດການສິ້ນເປືອງພະລັງງານຕໍ່GDPແຕ່ລະຫົວຫນ່ວຍໄດ້ຫຼຸດຫນ້ອຍກວ່າປີ2005 20%.
ໃນຖານະທີ່ເປັນປະເທດທີ່ພວມພັດທະນາທີ່ມີຄວາມຮັບຜິດຊອບ,ຈີນໄດ້ເອົາໃຈໃສ່ໃນລະດັບສູງຕໍ່ບັນຫາການປ່ຽນແປງຂອງດິນຟ້າອາກາດແລະບັນຫາສິ່ງແວດລ້ອມ. ໃນໄລຍະປະຕິບັດແຜນການ5ປີຄັ້ງທີ11,ຈີນໄດ້ໃຊ້ມາດຕະການຫຼາຍປະການເພື່ອປັບປຸງແລະຍົກລະດັບໂຄງປະກອບພະລັງງານໃຫ້ດີຂຶ້ນ,ເພື່ອບັນລຸເປົ້າຫມາຍທີ່ປະຢັດພະລັງງານແລະຫຼຸດການລະບາຍມົນລະພິດ.
ໃນໄລຍະປະຕິບັດແຜນການ 5ປີຄັ້ງທີ11,ອຸດສາຫະກຳພະລັງງານໄຟຟ້າຂອງຈີນໄດ້ປິດແລະຢຸດການຜະລິດຂອງໂຮງໄຟຟ້າຂະຫນາດນ້ອຍທີ່ສິ້ນເປືອງຖ່ານຫີນຫຼາຍແລະລະບາຍມົນລະພິດຢ່າງຫນັກຫນ່ວງ,ກໍ່ສ້າງໂຮງງານຜະລິດໄຟຟ້າທີ່ມີປະສິດທິພາບສູງແລະອະນຸລັກສິ່ງແວດລ້ອມ, ໃນ 5 ປີມານີ້,ແລະປະຢັດຖ່ານຫີນດິບໄດ້ທັງຫມົດຫຼາຍກວ່າ 300 ລ້ານໂຕນ.
ພ້ອມກັນນັ້ນ,ໃນ 5 ປີມານີ້,ຈີນໄດ້ພັດທະນາພະລັງງານທີ່ບໍ່ແມ່ນຊາກທີ່ກັບກາຍເປັນຫີນຢ່າງແຂງແຮງ,ປະລິມານຜະລິດໄຟຟ້ານ້ຳຕົກ,ໄຟຟ້ານິວເຄຼຍແລະໄຟຟ້າດ້ວຍພະລັງງານລົມລວມແລ້ວໄດ້ຫຼາຍກວ່າ 3000 ຕື້ກິໂລວັດໂມງ, ເຂົ້າແທນຖ່ານຫີນດິບ 1 ຕື້ 500 ລ້ານໂຕນ,ຫຼຸດການລະບາຍກາກບອນດີອອກສິດເກືອບ 3 ຕື້ໂຕນ.ນອກນີ້,ຈີນຍັງໄດ້ເລັ່ງລັດການພັດທະນາແລະນຳໃຊ້ອາຍແກັສທຳມະຊາດໃຫ້ໄວຂຶ້ນແລະຍົກລະດັບຄຸນນະພາບນ້ຳມັນສຳເລັດຮູບໃຫ້ສູງຂຶ້ນ,ຫຼຸດອັດຕາຄວາມເສຍຫາຍຕາຂ່າຍໄຟຟ້າໃຫ້ຕ່ຳລົງ, ດຳເນີນການຈັດວາງການປະຢັດພະລັງງານແລະການຊື້ຂາຍສິດທິຜະລິດໄຟຟ້າ,ເພື່ອເສີມຂະຫຍາຍບົດບາດທີ່ດີຕໍ່ການປະຢັດພະລັງງານແລະຫຼຸດການລະບາຍມົນລະພິດ.
ໃນກອງປະຊຸມ,ທ່ານຈ່າງກົວປາວ,ຫົວໜ້າກົມພະລັງງານແຫ່ງຊາດຈີນກ່າວວ່າ,ການຄວບຄຸມປະລິມານການສິ້ນເປືອງພະລັງງານຢ່າງສົມເຫດສົມຜົນ,ແມ່ນໜ້າທີ່ສຳຄັນຂອງວຽກງານພະລັງງານໃນແຜນການ 5 ປີຄັ້ງທີ 12.ການສຳເລັດໜ້າທີ່ນີ້ຫຍຸ້ງຍາກຫຼາຍແລະມີສິ່ງທ້າທາຍຫຼາຍ.ເວົ້າໂດຍພື້ນຖານແລ້ວ,ຕ້ອງອາໄສການຫັນປ່ຽນຮູບການພັດທະນາເສດຖະກິດ,ຍົກອັດຕາເຕັກນິກຂອງການເຕີບໂຕເສດຖະກິດໃຫ້ສູງຂຶ້ນ,ຫຼຸດການສິ້ນເປືອງພະລັງງານຂອງແຕ່ລະຫົວໜ່ວຍGDPແລະການລະບາຍກາກບອນດີອອັກຊິດ,ພະຍາຍາມປະຢັດພະລັງງານແລະເພີ່ມສະມັດຕະພາບການຜະລິດ.
ໃນໄລຍະແຜນການ 5 ປີຄັ້ງທີ 12,ນອກຈາກບາງແຂວງແລະນະຄອນທີ່ຢູ່ແຄມທະເລພາກຕາເວັນອອກຈີນໄດ້ປັບຄາດໝາຍການເຕີບໂຕຂອງGDPໃຫ້ຕ່ຳລົງຍ້ອນການຫັນປ່ຽນຮູບແບບແລ້ວ,ມີແຂວງແລະນະຄອນຫຼາຍສົມຄວນໄດ້ວາງຄາດໝາຍທີ່ເຮັດໃຫ້GDPເພີ່ມຂຶ້ນ 1 ເທົ່າ.ທ່ານຈາງພີງ,ປະທານຄະນະກຳມະການການພັດທະນາແລະປະຕິຮູບແຫ່ງລັດຈີນຊີ້ອອກວ່າ,ໃນເວລາບັນດາແຂວງວາງຄາດໝາຍເຕີບໂຕເສດຖະກິດ,ຕ້ອງເປັນເອກະພາບກັນກັບລັດຖະບານກາງ,ຕ້ອງຮັບປະກັນໃຫ້ມີຈັງຫວະເຕີບໂຕອ່າວໄວ,ຍັງຕ້ອງພິຈາລະນາເຖິງພາລະຫາບແບກຂອງພະລັງງານແລະຊັບພະຍາກອນ.
ປີ 2011,ຈີນຈະວາງທິດທາງຊີ້ນຳການປະຢັດພະລັງງານຂອງຂະແໜງການພະລັງງານ,ກຽມສ້າງສູນຄົ້ນຄວ້າພັດທະນາການປະຢັດພະລັງງານແລະນຳໃຊ້ຊັບພະຍາກອນແຫ່ງຊາດ.ຈຸດໜັກແມ່ນເຮັດວຽກສາທິດດ້ານການປະຢັດພະລັງງານ,ຫຼຸດການລະບາຍມົນລະພິດແລະການນຳໃຊ້ຊັບພະຍາກອນໂດຍສັງລວມໃນຂົງເຂດຖ່ານຫີນສະອາດ,ການກັ່ນນ້ຳມັນ,ໄຟຟ້າທີ່ຜະລິດດ້ວຍຖ່ານຫີນ,ໄຟຟ້ານີວເຄຼຍແລະພະລັງງານໝູນວຽນ.
ຈີນຈະຖືການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເປັນຈຸດເລີ່ມຕົ້ນແລະເປົ້າໝາຍຂອງການຫັນປ່ຽນຮູບການພັດທະນາພະລັງງານ.ເພີ່ມງົບປະມານສູນກາງໃຊ້ເຂົ້າໃນການປະຕິບັດໂຄງການປັບປຸງຕາໜ່າງໄຟຟ້າຢູ່ຊົນນະບົດຮອບໃໝ່,ຮັບປະກັນໃຫ້ຊາວກະສິກອນມີໄຟຟ້າໃຊ້.ພ້ອມກັນນັ້ນ,ກໍ່ຂະຫຍາຍຕາໜ່າງໄຟຟ້າໄປສູ່ເຂດທີ່ຍັງບໍ່ມີໄຟຟ້າໃຊ້.
ຈີນຍັງຈະສືບຕໍ່ສະໜັບສະໜູນການສ້າງບໍ່ອາຍແກັດຊີວະພາບຢູ່ຊົນນະບົດ,ເຜີຍແຜ່ເຕັກນິກນຳໃຊ້ພະລັງງານໄຟຟ້າດ້ວຍແສງຕາເວັນຢູ່ຊົນນະບົດ.ນອກນັ້ນ,ຈີນຈະເພີ່ມການສ້າງສາດ້ານພະລັງງານຢູ່ເຂດຊົນເຜົ່າ,ເພີ່ມການສ້າງຕາໜ່າງໄຟຟ້າຢູ່ເຂດຕິເບດແລະເຂດຊີ່ນຈ່ຽງ,ສ້າງໂຄງການທີ່ເຊື່ອມຕໍ່ຕາໜ່າງໄຟຟ້າເຂດຕິເບດ,ເຂດຊີ່ນຈ່ຽງກັບພາກຕາເວັນຕົກສຽງເໜືອຂອງຈີນ,ສ້າງທໍ່ສົ່ງອາຍແກັດທຳມະຊາດເກີຣມູ--ລາຊາ,ເພື່ອໃຫ້ປະຊາຊົນເຂດຕິເບດມີອາຍແກັດທຳມະຊາດໃຊ້.
