ຜູ່ຊ່ຽວຊ່ານເຫັນວ່າລັດຖະມົນຕີປ້ອງກັນປະເດທອາເມລິກາມາຢ້ຽມຢາມຈີນໄດ້ສົ່ງສັນຍານທີ່ດີ
(GMT+08:00) 2011-01-10 17:24:16 cri
ທີ່ນີ້,ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ເຄົາລົບ. ໂດຍຕອບສະໜອງຄຳເຊີນຂອງທ່ານລຽງກວ່າງເລ້ ທີ່ປຶກສາແຫ່ງລັດ ທັງເປັນລັດຖະມົນຕີວ່າການກະຊວງປ້ອງກັນປະເທດຈີນ, ທ່ານໂຣເບີດ ເກສ໌ ລັດຖະມົນຕີວ່າການກະຂວງປ້ອງກັນປະເທດອາເມລິກາໄດ້ເດີນທາງເຖິງປັກກິ່ງໃນຕອນຄ່ຳວັນທີ 9 ມັງກອນນີ້ເພື່ອຢ້າມຢາມຈີນເປັນເວລາ 4 ວັນ. ນີ້ແມ່ນຜູ່ນຳຂັ້ນສູງສອງປະເທດຈີນ-ອາເມລິກາພົບປະກັນຢ່າງເປັນທາງການເປັນເທື່ອທຳອິດ ຫຼັງຈາກອາເມລິກາຂາຍອາວຸດໃຫ້ໄຕ້ຫວັນໃນຕົ້ນປີ2010 ແລະເຮັດໃຫ້ການໄປມາຫາສູ່ກັນລະຫວ່າງເຈົ້າໜ້າທີ່ຊັ້ນຂັ້ນສູງສອງກອງທັບຖືກເລື່ອນເວລາດົນນານ. ຜູ່ຊ່ຽວຊານກ່າວວ່າ, ເວົ້າສຳລັບການຂະຫຍາຍການພົວພັນລະຫວ່າງຈີນ ກັບ ອາເມລິກາແລ້ວ,ການຢ້ຽມຢາມຂອງທ່ານໂຣເບີດເທື່ອນີ້ໄດ້ສົ່ງ"ສັນຍານອັນທີ່ດີ",ແຕ່ຖ້າຢາກເຮັດໃຫ້ການພົວພັນລະຫວ່າງສອງກ້ອງທັບຂະຫຍາຍຕົວຢ່າງປອດໃສ ແລະ ໝັ້ນທ່ຽງ, ສອງຝ່າຍຍັງຕ້ອງຮ່ວມກັນທຳຄວາມພະຍາຍາມອີກເປັນເວລາດົນນານ, ເພິ່ມທະວີຄວາມໄວ້ເນື້ອເຊື່ອໃຈກັນ, ແລະ ແກ້ໄຂຂໍ້ຂັດແຍ່ງຢ່າງເໝາະສົມ.
ຫາງສຽງສາກົນເຫັນໂດຍທົ່ວໄປວ່າ, ກ່ອນທ່ານຫູຈີນທາວ ປະທານປະເທດຈີນຈະໄປຢ້ຽມຢາມອາເມລິກາ, ທ່ານໂຣເບີດ ເກສ໌ມາຢ້ຽມຢາມຈີນ ບໍ່ແມ່ນ"ການຢ້ຽມຢາມຂອງຝ່າຍທະຫານ"ເທົ່ານັ້ນ, ທ່ານແມ່ນຕາງໜ້າລັດຖະບານໂອບາມາມາຢ້ຽມຢາມປະເທດຈີນ. ໃນເວລາໃຫ້ສຳພາດຕໍ່ນັກຂ່າວCRI, ທ່ານຢາງມີງເຈ໋ ຫົວໜ້າຫ້ອງການຄົ້ນຄວ້າການຄວບຄຸມທາງການທະຫານ ແລະ ຄວາມປອດໄພຂອງສະຖາບັນຄົ້ນຄວ້າການພົວພັນສາກົນຍຸກປັດຈຸບັນຈີນກ່າວວ່າ,
"ພໍເລິ່ມຕົ້ນປີໃໝ່, ຖ້າວ່າການແລກປ່ຽນທາງການທະຫານຂັ້ນສູງລະຫວ່າງສອງຝ່າຍສາມາດຟື້ນຟູຄືນ,ຢ່າງໜ້ອຍກໍ່ໄດ້ສົ່ງສັນຍານທີ່ດີຕໍ່ຈີນ ແລະ ອາເມລິກາຂະຫຍາຍການພົວພັນຍຸດທະສາດໃນກ້າວຕໍ່ໄປ." ໃນໄລຍະຢ້ຽມຢາມຈີນ, ຜູ່ນຳລັດແລະ ຜູ່ນຳກອງທັບຈີນ ເຊັ່ນ, ທ່ານຫູຈີນທາວ, ທ່ານຊີຈີ້ນພີງ, ທ່ານລຽງກວ່າງເລ້ ,ທ່ານຊີໄຊໂຮ້ຈະຕ້ອນຮັບແລະພົບປະທ່ານໂຣເບີດ ເກສ໌, ທ່ານເກສ໌ຍັງຈະຢ້າມຢາມກອງບັນຊາການປື້ນໃຫຍ່ເລກສອງ ເຊິ່ງເປັນກອງນີຂີປະນາວຸດຍຸດທະສາດຂອງຈີນ. ກ່ອນຈະເດີນທາງມາຢ້ຽມຢາມຈີນ, ຢູ່ທຳນຽບ 5 ແຈອາເມລິກາ, ທ່ານໂຣເບີດ ເກສ໌ກ່າວວ່າ, ການເປີດກວ້າງຂົງເຂດສົນທະນາແມ່ນສຳຄັນຫຼາຍຕໍ່ການພົວພັນທາງການທະຫານລະຫວ່າງສອງຝ່າຍທີ່ໝັ້ນຄົງຍາວນານ.
ເດືອນມັງກອນປີກາຍນີ້, ລັດຖະບານອາເມລິກາໄດ້ຂາຍອາວຸດທີ່ມີມູນຄ່າ 6 ຕື້ໂດລາໃຫ້ໄຕ້ຫວັນ, ບັນຫາໄຕ້ຫວັນກ່ຽວພັນເຖິງອະທິປະໄຕແລະຜືນແຜ່ນດິນອັນຄົບຖ້ວນຂອງຈີນ, ການກະທຳດັ່ງກ່າວຂອງອາເມລິກາເຮັດໃຫ້ການໄປມາຫາສູ່ກັນລະຫວ່າງການນຳຂັ້ນສູງສອງກອງທັບຈີນແລະອາເມລິກາຖືກເລື່ອນອອກໄປເປັນເວລາດົນນານ. ປີກາຍນີ້, ກອງທັບເຮືອອາເມລິກາດຳເນີນການລາດຕະເວນຢູ່ທະເລຈີນຕະເວັນອອກແລະທະເລຈີນໃຕ້ເລື້ອຍໆ, ຊຶ່ງໄດ້ສ້າງສິ່ງກີດຂວາງຕໍ່ການແລກປ່ຽນທາງການທະຫານລະຫວ່າງສອງຝ່າຍ. ທ້າຍປີກາຍນີ້, ອາເມລິກາກັບຍີ່ປຸ່ນ, ອາເມລິກາກັບສ.ເກົາຫຼີໄດ້ຈັດການຊ້ອມຣົບຮ່ວມຢ່າງຂະໜາດໃຫຍ່ຢູ່ທະເລເຫຼືອງຂອງຈີນ, ຕໍ່ເລື່ອງນີ້, ຈີນເຫັນຕະຫຼອດມາວ່າ, ພັນທະມິດສອງຝ່າຍດ້ານການທະຫານຂອງປະເທດທີ່ກ່ຽວຂ້ອງບໍ່ຄວນທຳລາຍຜົນປະໂຫຍດຝ່າຍທີ 3 ເຊິ່ງລວມທັງຈີນ.
ທ່ານສາສະດາຈານເມີ້ງຊຽງຊິ່ງ, ຜູ້ຊ່ຽວຊານກ່ຽວກັບບັນຫາຄວາມປອດໄພທາງຍຸດທະສາດຂອງມະຫາວິທະຍາໄລປ້ອງກັນປະເທດຈີນກ່າວວ່າ, ອາເມລິກາຕ້ອງຮັບຜິດຊອບຕໍ່ການຢຸດສະງັກຂອງການໄປມາຫາສູ່ກັນລະຫວ່າງການນຳຂັ້ນສູງລະຫວ່າງສອງກອງທັບຈີນກັບອາເມລິກາ. ທ່ານກ່າວວ່າ:
"ກ່ຽວກັບການແລກປ່ຽນດ້ານການທະຫານ, ສິ່ງທີ່ຈີນເອົາໃຈໃສ່ທີ່ສຸດຍັງຄົງແມ່ນຢາກໃຫ້ການພົວພັນລະຫວ່າງຈີນກັບອາເມລິກາສາມາດຂະຫຍາຍຕົວຢ່າງເປັນປົກກະຕິ, ໂດຍສະເພາະຢາກໃຫ້ການແລກປ່ຽນດ້ານການທະຫານລະຫວ່າງຈີນກັບອາເມລິກາສາມາດພັດທະນາຢ່າງປອດໃສແລະຕໍ່ເນື່ອງ. ແຕ່ບັນຫາທີ່ຕ້ອງແກ້ໄຂກ່ອນ, ແມ່ນບັນຫາທີ່ອາເມລິກາຂາຍອາວຸດໃຫ້ໄຕ້ຫວັນ, ອາເມລິກາໄດ້ກະທຳສິ່ງທີ່ແຕະຕ້ອງຈິດໃຈຂອງປະຊາຊົນຈີນໃນຜົນປະໂຫຍດໃຈກາງຂອງຈີນເລື້ອຍໆ."
ທ່ານຢາງມິງເຈຂອງສະຖາບັນຄົ້ນຄວ້າການພົວພັນສາກົນຍຸກປະຈຸບັນຂອງຈີນເຫັນວ່າ, ປະຈຸບັນ, ຈີນກຳລັງເສີມຂະຫຍາຍບົດບາດອັນຕັ້ງໜ້າທີ່ນັບມື້ນັບສຳຄັນບົນເວທີສາກົນ, ແຕ່ອາເມລິກາເຂົ້າໃຈຜິດຕໍ່ຍຸດທະສາດຄວາມປອດໄພຂອງຈີນ, ນີ້ແມ່ນບັນຫາສຳຄັນທີ່ສຸດທີ່ກະທົບເຖິງການຂະຫຍາຍການພົວພັນດ້ານການທະຫານລະຫວ່າງຈີນກັບອາເມລິກາ, ທ່ານກ່າວວ່າ:
"ໃນບາງບັນຫາ, ໂດຍສະເພາະແມ່ນບັນຫາທີ່ກ່ຽວພັນເຖິງອະທິປະໄຕແລະຜືນແຜ່ນດິນທີ່ຈີນເອົາໃຈໃສ່, ອາເມລິກາບໍ່ເຂົ້າໃຈຄວາມສົນໃຈດ້ານຄວາມປອດໄພແລະຜົນປະໂຫຍດໃຈກາງຂອງຈີນ, ສະນັ້ນ, ຈຶ່ງເກີດມີຫຼາຍບັນຫາ."
ກໍແມ່ນໃນເວລາທ່ານໂຣເບິດ ເກດສ໌ຈະໄປຢ້ຽມຢາມຈີນ, ກອງທັບອາເມລິກາໄດ້ສົ່ງກ່ຳປັ່ນບັນທຸກເຄື່ອງບິນພະລັງນິວເຄຼຍລຳທີ 2 ໄປເຂດອາຊີຕາເວັນອອກ. ສະນັ້ນ, ທ່ານຜູ້ຊ່ຽວຊານເມີ້ງຊຽງຊີ່ງກໍ່ຊີ້ອອກວ່າ, ໃນການຂະຫຍາຍການພົວພັນລະຫວ່າງສອງກອງທັບ, ອາເມລິກາທີ່ເປັນຝ່າຍ "ກໍ່ເລື່ອງກໍ່ລາວ" ເລື້ອຍໆນັ້ນ, ຄວນມີການກະທຳກ່ອນ, ເພື່ອຮັບປະກັນໃຫ້ການພົວພັນລະຫວ່າງສອງກອງທັບສາມາດກ້າວໄປໜ້າໃນດ້ານການສ້າງກົນໄກ, ແລະອາໄສກົນໄກດັ່ງກ່າວຊຸກຍູ້ການພົວພັນລະຫວ່າງສອງປະເທດໄດ້ຂະຫຍາຍຕົວ.
