ຕອນເຊົ້າວັນທີ 10 ມັງກອນນີ້, ນະຄອນຫຼວງປັກກິ່ງ, ນະຄອນທຽນສິນ, ແຂວງຊ່ານຊີ, ແຂວງຈ່ຽງຊູ່, ແຂວງກວາງຕຸ້ງ, ແຂວງເສສວນຂອງຈີນ ຈັດກິດຈະກຳທຳລາຍຜະລິດຕະພັນທີລ່ວງລະເມີດສິດຊັບສິນທາງປັນຍາພ້ອມກັນ, ທັງໝົດໄດ້ທຳລາຍ 5 ລ້ານ 2 ແສນ 1 ໝື່ນເຄື່ອງ.
ເພື່ອຕໍ່ຕ້ານການກະທຳລ່ວງລະເມີດສິດຊັບສິນທາງປັນຍາ, ມາຮອດທ້າຍປີ 2010, ຫຼາຍພາກສ່ວນຂອງນະຄອນຫຼວງປັກກິ່ງ, ເຊິ່ງມີພະແນກສິດຊັບສິນທາງປັນຍາ, ພະແນກປ້ອງກັນຄວາມສະຫງົບ, ພະແນກບໍລິຫານລິສາຫະກິດອຸດສາຫະກຳການຄ້າ, ພາສີເປັນຕົ້ນ, ໄດ້ສົ່ງພະນັກງານປະຕິບັດກົດໝາຍ 2 ແສນກວ່າຄົນ, ກວດກາອົງການຈັດຕັ້ງ 4 ໝື່ນກວ່າແຫ່ງ, ເຊັ່ນ: ຕະຫຼາດຂາຍປຶ້ມ, ເອເລັກໂຕຼນິກ, ວິສາຫະກິດຂາຍຍ່ອຍ, ຮ້ານຂາຍຢາເປັນຕົ້ນ, ກວດກາຜະລິດຕະພັນສົ່ງອອກງວດໃຫຍ່ 4000 ກວ່າເທື່ອ, ດຳເນີນຄະດີ 156 ກວ່າຄະດີ. ນາງເຊິງຮົງ, ຮອງເຈົ້າຄອງນະຄອນຫຼວງປັກກິ່ງ, ທັງເປັນຫົວໜ້າໜ່ວຍງານຊີ້ນຳການເຄື່ອນໄຫວຕໍ່ຕ້ານການລ່ວງລະເມີດສິດຊັບສິນທາງປັນຍາແລະຈຳໜ່າຍສິນຄ້າລອກແບບ, ຢູ່ບ່ອນທຳລາຍ, ນາງໄດ້ແຈ້ງສະພາບການກ່ຽວກັບການເຄື່ອນໄຫວຕໍ່ຕ້ານການລ່ວງລະເມີດສິດຊັບສິນທາງປັນຍາຂອງນະຄອນຫຼວງປັກກິ່ງສູ່ຟັງ, ນາງກ່າວວ່າ:
"ພາກສ່ວນແລະເຂດຕ່າງໆຂອງນະຄອນຫຼວງປັກກິ່ງອອກແຮງຮ່ວມມືກັນສຸດຂີດ, ສ້າງຕາໜ່າງຂ່າວລັບແລະຂໍ້ມູນຂ່າວສານທີ່ຮ່ວມກັນ, ສ້າງກົນໄກແລກປ່ຽນແລະຮ່ວມມືທີ່ດີ. ສົ່ງເສີມບົດບາດຂອງການແຈ້ງຂໍ້ມູນຂ່າວສານຂອງປະຊາຊົນຢ່າງເຕັມທີ່. ຕາມຂໍ້ມູນເບື້ອງຕົ້ນ, ມູນຄ່າຂອງຄະດີມີເຖິງ 80 ລ້ານກວ່າຢວນ, ໄດ້ຈັບຜູ້ຕ້ອງຫາທີ່ລະເມີດກົດໝາຍວ່າດ້ວຍສິດຊັບສິນທາງປັນຍາແລະຜະລິດ, ຈຳໜ່າຍສິນຄ້າລອກແບບ 300 ກວ່າຄົນ, ໄດ້ຕໍ່ຕ້ານພວກກະທຳຜິດຢ່າງບັງເກີດຜົນ, ເຮັດໃຫ້ສະພາບແວດລ້ອມ ຕະຫຼາດສິນຄ້າຂອງນະຄອນຫຼວງປອດໃສຂຶ້ນ.
"ນັບແຕ່ເດືອນຕຸລາ 2010 ເປັນຕົ້ນມາ, ພາກສ່ວນທີ່ກ່ຽວຂ້ອງຂອງລັດຖະບານຈີນ ໄດ້ເພີ່ມຄວາມເຂັ້ມງວດເພື່ອຕໍ່ຕ້ານການລ່ວງລະເມີດສິດຊັບສິນທາງປັນຍາ, ຜະລິດແລະຈຳໜ່າຍສິນຄ້າລອກຮຽນແບບ. ກົມລິຂະສິດແຫ່ງຊາດ ແລະ ຫ້ອງການຕໍ່ຕ້ານແລະກຳຈັດສິ່ງລາມົກອະນາຈານຂອງຈີນ ກໍຈັດກອງປະຊຸມກ່ຽວກັບການປົກປ້ອງສິດຊັບສິນທາງປັນຍາແລະການປະຕິບັດກົດໝາຍໃນທົ່ວປະເທດຈີນ, ເພື່ອຈັດຕັ້ງປະຕິບັດຢ່າງເປັນເອກະພາບໃນການເຄື່ອນໄຫວຕໍ່ຕ້ານການ ລະເມີດລິຂະສິດ, ມາຮອດທ້າຍປີ 2010, ໄດ້ກວດພົບແລະຍຶດຜະລິດຕະພັນລອກຮຽນແບບ 6 ລ້ານກວ່າເຄື່ອງ, ແລະດຳເນີນຄະດີສຳຄັນ 28 ຄະດີ. ເມື່ອກ່າວເຖິງປະສິດທິຜົນທີ່ໄດ້ຮັບໃນໄລຍະຜ່ານມາ, ທ່ານອູ່ຊູ່ລິນ, ລັດຖະມົນຕີຊ່ວຍວ່າການສຳນັກຄຸ້ມຄອງໜັງສືພິມແລະການພິມຈຳໜ່າຍຈີນກ່າວວ່າ: "ອີງຕາມການຈັດຕັ້ງປະຕິບັດຢ່າງເປັນເອກະພາບຂອງລັດຖະບານ, ໃນການເຄື່ອນໄຫວຕໍ່ຕ້ານການລ່ວງລະເມີດສິດຊັບສິນທາງປັນຍາ ແລະ ຈຳໜ່າຍສິນຄ້າລອກຮຽນແບບ, ສຳນັກຄຸ້ມຄອງໜັງສືພິມແລະການພິມຈຳໜ່າຍ, ກົມລິຂະສິດແຫ່ງຊາດ ແລະ ຫ້ອງການຕໍ່ຕ້ານສິ່ງລາມົກອະນາຈານ ໄດ້ເພີ່ມທະວີການຈັດຕັ້ງປະຕິບັດວຽກງານ, ແລະໄດ້ຮັບຄວາມຄືບໜ້າທີ່ສຳຄັນ. ຄື: ໄດ້ສຳຫຼວດກວດກາຄະດີໃຫຍ່ທີ່ລ່ວງລະເມີດລິຂະສິດຂອງການປະພັນ, ເພີ່ມຄວາມເຂັ້ມງວດດ້ານຕຸລາການ; ເພີ່ມທະວີການຄຸ້ມຄອງແຫຼ່ງຜະລິດສິນຄ້າ, ເພີ່ມທະວີການກວດກາໜ້າທີ່ຮັບຜິດຊອບໃນວຽກງານຄຸ້ມຄອງ; ແລະດຳເນີນການກວດກາຢູ່ຕາມຕະຫຼາດຢ່າງຕັ້ງໜ້າ ເພື່ອເພີ່ມທະວີການຄຸ້ມຄອງ."
ການທຳລາຍສິ່ງພິມຈຳໜ່າຍທີ່ລະເມີດສິດຊັບສິນທາງປັນຍາແລະລອກຮຽນແບບເທື່ອນີ້ ແມ່ນການເຄື່ອນໄຫວທີ່ດຳເນີນເປັນເອກະພາບຢູ່ຫຼາຍແຂວງແລະກຳແພງນະຄອນທົ່ວປະເທດຄັ້ງທຳອິດໃນປີ 2011, ກ່ອນໜ້ານີ້, ນະຄອນເຊິ່ນເຈິ້ນແຂວງກວາງຕຸ້ງ ໄດ້ທຳລາຍຜະລິດຕະພັນພາບ-ສຽງທີ່ລອກຮຽນແບບ ມາກ່ອນແລ້ວ ຄືໃນເດືອນຕຸລາ 2010, ນະຄອນຊິ່ງຕາວແຂວງຊ່ານຕົ່ງ ກໍໄດ້ທຳລາຍສິ່ງພິມຈຳໜ່າຍທີ່ຜິດກົດໝາຍ, ເຊັ່ນ ຊີດີທີ່ລອກຮຽນແບບເປັນຕົ້ນ ແລະ ທັງຈັດກິດຈະກຳປະຕິຍານທີ່ຊື່ວ່າ "ປະຕິເສດສິ່ງລອກຮຽນແບບໂດຍເລີ່ມຈາກຕົວທ່ານເອງ" ໃນເດືອນທັນວາ 2010. ຢູ່ສະໜາມທຳລາຍທີ່ນະຄອນຫຼວງປັກກິ່ງ, ທ່ານອູ່ຊູ່ລິນ ກ່າວວ່າ, ການທຳລາຍສິ່ງພິມຈຳໜ່າຍທີ່ລ່ວງລະເມີດສິດຊັບສິນທາງປັນຍາ ແລະ ລອກຮຽນແບບທີ່ຈັດຂຶ້ນຢ່າງເປັນເອກະພາບໃນຫຼາຍແຂວງແລະກຳແພງນະຄອນທົ່ວປະເທດເທື່ອນີ້ສຳຄັນຫຼາຍ. ທ່ານກ່າວວ່າ: "ຄວາມໝາຍຂອງການເຄື່ອນໄຫວເທື່ອນີ້ແມ່ນ ດຳເນີນການເຄື່ອນໄຫວຕາມການຈັດວາງຂອງລັດຖະບານດ້ວຍການປະຕິບັດຕົວຈິງ, ອັນໄດ້ສະແດງໃຫ້ເຫັນອີກເທື່ອໜຶ່ງກ່ຽວກັບຫຼັກໝັ້ນອັນໜັກແໜ້ນແລະຄວາມຕັດສິນໃຈອັນເດັດຂາດຂອງລັດຖະບານຈີນໃນການຕ້ານການລະເມີດລິຂະສິດແລະປົກປ້ອງສິດຊັບສິນທາງປັນຍາ.
