 |
|
|
|||
| |
 |
|
||||||
 |
||
|
||
|
||
|
||
|
||
|
ວັນທີ 12 ມັງກອນນີ້. ທ່ານໂຣເບີດ ເກດສ໌ ລັດຖະມົນຕີວ່າການກະຊວງປ້ອງກັນປະເທດອາເມລິກາໄດ້ສິ້ນສຸດການຢ້ຽມຢາມຢ່າງເປັນທາງການຕໍ່ຈີນແລ້ວ, ໃນເວລາໃຫ້ສຳພາດຕໍ່ນັກຂ່າວ, ທ່ານພົນຕີກວນໂຢວເຟີ່ຍ, ຮອງຫົວໜ້າຫ້ອງການວຽກງານຕ່າງປະເທດກະຊວງປ້ອງກັນປະເທດຈີນ ກ່າວວ່າ, ສອງກອງທັບຈີນອາເມລິກາຄວນພະຍາຍາມຮ່ວມກັນ, ເປີດກວ້າງຜົນປະໂຫຍດຮ່ວມກັນ, ຄຳນຶງເຖິງແລະເຄົາລົບຜົນປະໂຫຍດໃຈກາງ ແລະ ຄວາມເອົາໃຈໃສ່ທີ່ສຸດຂອງກັນແລະກັນ, ກຳຈັດຄວາມຂັດແຍ່ງ ແລະ ຄວາມເຫັນທີ່ບໍ່ຄືກັນລະຫວ່າງສອງຝ່າຍ ເພື່ອຮັບປະກັນໃຫ້ການພົວພັນລະຫວ່າງສອງກອງທັບຂະຫຍາຍຕົວຕາມວົງຈອນທີ່ປອດໃສແລະໝັ້ນທ່ຽງ.
ກ່ຽວກັບໝາກຜົນການຢ້ຽມຢາມຂອງທ່ານເກດສ໌ເທື່ອນີ້, ທ່ານກວນໂຢວເຟີ່ຍ ກ່າວວ່າ: "ສອງຝ່າຍເຫັນວ່າ, ການແລກປ່ຽນທີ່ມີຂຶ້ນຢ່າງຕໍ່ເນື່ອງແລະໄວ້ວາງໃຈກັນໄດ້ລະຫວ່າງສອງກອງທັບ ມີຜົນດີຕໍ່ການຫຼຸດຜ່ອນການສັນນິຖານທີ່ຜິດພາດ ແລະ ຄວາມເຂົ້າໃຈຜິດ. ສອງຝ່າຍເຫັນດີນຳກັນວ່າ, ການປຶກສາຫາລືກັນດ້ານການປ້ອງກັນປະເທດ, ການພົບປະເຮັດວຽກລະຫວ່າງກະຊວງປ້ອງກັນປະເທດ ແລະກົນໄກປຶກສາຫາລືກ່ຽວກັບຄວາມປອດໄພດ້ານການທະຫານເທິງທະເລລະຫວ່າງຈີນກັບອາເມລິກາ ແມ່ນຊ່ອງທາງສຳຄັນຂອງການສົນທະນາລະຫວ່າງສອງກອງທັບ. ສອງຝ່າຍຍັງເຫັນດີຈະສ້າງໜ່ວຍງານປະສົມ, ເພື່ອດຳເນີນການຄົ້ນຄວ້າຫຼັກການຊີ້ນຳ ແລະ ຂອບການຂະຫຍາຍການພົວພັນລະຫວ່າງສອງກອງທັບ".
ກ່ຽວກັບສະຖານະການແຫຼມເກົາຫຼີ, ທ່ານກວນໂຢວເຟີ່ຍ ກ່າວວ່າ, ສອງຝ່າຍໄດ້ປຶກສາຫາລືກັນຢ່າງກວ້າງຂວາງກ່ຽວກັບເລື່ອງດັ່ງກ່າວ ແລະເຫັນວ່າ ມີຄວາມຈຳເປັນທີ່ຕ້ອງເພີ່ມທະວີການແລກປ່ຽນກັນ ແລະ ພະຍາຍາມຮ່ວມກັນຕື່ມອີກ, ເພື່ອຊຸກຍູ້ໃຫ້ຝ່າຍທີ່ກ່ຽວຂ້ອງເພີ່ມທະວີການສົນທະນາ, ສຸມກຳລັງເຂົ້າໃນການປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.
ທ່ານກວນໂຢວເຟີ່ຍ ກ່າວວ່າ, ການຂາຍອາວຸດໃຫ້ໄຕ້ຫວັນ ແມ່ນບັນຫາອ່ອນໄຫວລະຫວ່າງຈີນກັບອາເມລິກາຕະຫຼອດມາ, ການພົວພັນລະຫວ່າງສອງກອງທັບຈີນອາເມລິກາມີການຂຶ້ນໆລົງໆ, ລ້ວນແຕ່ແມ່ນຍ້ອນອາເມລິກາຂາຍ ອາວຸດໃຫ້ໄຕ້ຫວັນ. ໃນການຢ້ຽມຢາມຈີນເທື່ອນີ້, ທ່ານເກດສ໌ກໍໄດ້ກ່າວວ່າ, ຝ່າຍອາເມລິກາກໍຮູ້ສຶກເຖິງຄວາມເປັນຫ່ວງຂອງຝ່າຍຈີນແລ້ວ, ແລະກໍເຫັນວ່ານີ້ແມ່ນບັນຫາອ່ອນໄຫວ.
ທ່ານກວນໂຢວເຟີ່ຍ ກ່າວວ່າ, ຫວັງວ່າອາເມລິກາຈະມີຄວາມຈິງໃຈແລະໃຊ້ມາດຕະການເພື່ອກຳຈັດສິ່ງກີດຂວາງທີ່ເປັນອຸປະສັກຕໍ່ການຂະຫຍາຍການພົວພັນລະຫວ່າງສອງກອງທັບຈີນອາເມລິກາ.
"ການພົວພັນຈີນ-ອາເມລິກາໄດ້ຂຶ້ນໆລົງໆຫຼາຍເທື່ອ, ຈີນບໍ່ພຽງແຕ່ແມ່ນຝ່າຍທີ່ປະສົບຜົນຮ້າຍເທົ່ານັ້ນ, ຄວາມໄວ້ເນື້ອເຊື່ອໃຈລະຫວ່າງສອງກອງທັບກໍ່ປະສົບຄວາມເສຍຫາຍຄືກັນ, ການລົງເລິກຂະຫຍາຍການພົວພັນລະຫວ່າງສອງກອງທັບໄດ້ຖືກລົບກວນ ແລະ ກີດຂວາງ. ສະນັ້ນ, ອາເມລິກາຄວນສະແດງຄວາມກ້າຫານ ແລະ ໃຊ້ມາດຕະການຕ່າງໆ, ເພື່ອແກ້ໄຂອຸປະສັກກີດຂວາງ ແລະ ບັນຫາທີ່ສ້າງຜົນສະທ້ອນຕໍ່ການຂະຫຍາຍການພົວພັນລະຫວ່າງສອງກອງທັບເປັນເວລາຍາວນານ."
ນອກນີ້, ກ່ຽວກັບຄວາມເວົ້າທີ່ວົງການພາຍນອກກ່າວວ່າ ການທົດລອງບິນຂອງຍົນຮົບ"J-20"ຂອງຈີນແມ່ນແນໃສ່ການມາຢ້ຽມຢາມຈີນຂອງທ່ານເກສ໌, ທ່ານກວ່ານທ່ຽນໂຢຄຳຕອບວ່າ,
"ການທົດລອງເທື່ອນີ້ບໍ່ແນໃສ່ປະເທດໃດໆ,ແລະກໍ່ບໍ່ໄດ້ແນໃສ່ການຢ້ຽມຢາມຈີນຂອງທ່ານໂຣເບີດ ເກສ໌ເທື່ອນີ້, ແມ່ນການທົດລອງປົກກະຕິຕາມແຜນ, ຂ້າພະເຈົ້າຂໍກ່າວເນັ້ນວ່າ, ຈີນເດີນຕາມເສັ້ນທາງພັດທະນາໂດຍສັນຕິໂດຍຕະຫຼອດ, ປະຕິບັດນະໂຍບາຍປ້ອງກັນປະເທດຢູ່ໃນທ່າຮັບຢ່າງໝັ້ນໜຽວບໍ່ປ່ຽງແປງ, ຈີນຈະບໍ່ເປັນເຈົ້າອຳນາດ, ບໍ່ຂະຫຍາຍອຳນາດທາງທະຫານ,ບໍ່ແຂ່ງຂັນດ້ານອາວຸດ, ບໍ່ສ້າງໄພຂົ່ມຂູ່ທາງການທະຫານຕໍ່ປະເທດໃດໆ ຕະຫຼອດໄປ."
ໂດຍຕອບສະໜອງຕາມຄຳເຊີນຂອງທ່ານລຽງກວາງເລ້ ທີ່ປຶກສາແຫ່ງລັດ ທັງເປັນລັດຖະມົນຕີວ່າການກະຊວງປ້ອງກັນປະເທດຈີນ, ທ່ານໂຣເບີດ ເກສ໌ໄດ້ຢ້ຽມຢາມຈີນແຕ່ວັນທີ 9 ຫາ ວັນທີ 12 ມັງກອນນີ້. ໃນໄລຍະຢ້ຽມຢາມ, ການນຳຂັ້ນສູງຂອງລັດ ແລະ ກອງທັບຂອງຈີນ ເຊັ່ນ,ທ່ານຫູຈີນທາວ ປະທານປະເທດຈີນ, ປະທານຄະນະກຳມະການທາງການທະຫານສູນກາງຈີນ ແລະ ທ່ານອື່ນໆໄດ້ຕ້ອນຮັບພົບປະ ແລະ ເຈລະຈາກັບທ່ານເກສ໌, ເພື່ອແລກປ່ຽນຄວາມເຫັນກ່ຽວກັບການພົວພັນລະຫວ່າງສອງປະເທດ,ກອງທັບພ້ອມທັງບັນຫາພາກພື້ນແລະ ສາກົນ , ແລະ ເຫັນດີຮ່ວມກັນໃນຫຼາຍບັນຫາ. ທ່ານໂຣເບີດ ເກສ໌ຍັງໄດ້ຢ້ຽມຢາມກອງບັນຊາການປືນໃຫຍ່ທີສອງ ເຊິ່ງເປັນກອງຂີປະນາວຸດຍຸດທະສາດຂອງຈີນ.
ນີ້ແມ່ນທ່ານເກສ໌ຢ້ຽມຢາມປະເທດຈີນເປັນເທື່ອທີສອງ ນັບແຕ່ຂຶ້ນຮັບຕຳແໜ່ງນີ້ເປັນຕົ້ນມາ, ທ່ານຍັງເປັນລັດຖະມົນຕີວ່າການກະຊວງປ້ອງກັນປະເທດຜູ່ທີສາມຂອງອາເມລິກາທີ່ຢ້ຽມຢາມຈີນສອງເທື່ອ.
 |
 |
| © China Radio International.CRI. All Rights Reserved. 16A Shijingshan Road, Beijing, China. 100040 |