ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງເຄົາລົບ, ວັນທີ 14 ມັງກອນນີ້, ທະນາຄານໂລກໄດ້ຈຳໜ່າຍພັນທະບັດເງິນຢວນຈີນທີ່ກຳນົດເວລາ 2 ປີ ຈຳນວນ 500 ລ້ານຢວນ ເຊິ່ງເທົ່າກັບ 78 ລ້ານໂດລາ ເປັນຄັ້ງທຳອິດຢູ່ຮົງກົງ. ໃນເວລາໃຫ້ສຳພາດຕໍ່ນັກຂ່າວວິທະຍຸ CRI, ຜູ້ຊ່ຽວຊານສຶກສາບັນຫາການເງິນຈີນກ່າວວ່າ, ນີ້ໄດ້ສະແດງໃຫ້ເຫັນວ່າ, ທະນາຄານໂລກມີຄວາມໝັ້ນໃຈຕໍ່ຄວາມໝັ້ນທ່ຽງຂອງລາຄາເງິນຢວນແລະອະນາຄົດການພັດທະນາຂອງເສດຖະກິດຈີນ. ພາຍໃຕ້ສະພາບທີ່ເງິນຢວນຫັນເປັນເງິນສາກົນ, ການຈຳໜ່າຍພັນທະບັດເງິນຢວນຂອງທະນາຄານໂລກຈະສົ່ງຜົນດີໃຫ້ເງິນຢວນທີ່ເປັນຍອມຮັບຈາກຕ່າງປະເທດຫຼາຍກວ່າເກົ່າ.
ພັນທະບັດເງິນຢວນທີ່ທະນາຄານໂລກຈຳໜ່າຍເທື່ອນີ້ ຈະໃຊ້ໜີ້ໃນວັນທີ 14 ມັງກອນ 2013, ອັດຕາດອກເບ້ຍແມ່ນ 0,95%, ຈ່າຍດອກເບ້ຍປີລະສອງເທື່ອ. ທະນາຄານໂລກໄດ້ຖະແຫຼງວ່າ, ນີ້ເປັນຂີດໝາຍສະແດງໃຫ້ເຫັນວ່າ, ທະນາຄານໂລກມີຄວາມສົນໃຈຫຼາຍຕໍ່ການສະໜັບສະໜູນການພັດທະນາຕະ ຫຼາດເງິນຢວນ.
ທ່ານຕິ່ງຈື້ເຈຍ, ຄະນະບໍດີຄະນະການເງິນມະຫາວິທະຍາໄລເສດຖະກິດການຄ້າກັບຕ່າງປະເທດຈີນ ກ່າວວ່າ: "ທະນາຄານໂລກຈຳໜ່າຍພັນທະບັດເງິນຢວນ ແມ່ນຍ້ອນວ່າລາຄາເງິນຢວນມີຄວາມໝັ້ນທ່ຽງດີ, ແມ່ນເງິນຕາທີ່ຄ່າແຂງຕະຫຼອດໃນຕະຫຼາດເງິນຕາຕ່າງປະເທດຂອງໂລກ, ແລະແມ່ນເງິນຕາທີ່ກຳລັງພັດທະນາຢ່າງໜັກແໜ້ນ, ຈຶ່ງເຮັດໃຫ້ປະເທດຕ່າງໆໃນໂລກມີຄວາມຕ້ອງການເງິນຢວນ."
ສື່ມວນຊົນຫຼາຍປະເທດກໍ່ເຫັນວ່າ, ທະນາຄານໂລກຈຳໜ່າຍພັນທະບັດເງິນຢວນ,ແມ່ນຜົນການສະທ້ອນທີ່ນັກລົງທຶນຕ່າງປະເທດມີຄວາມຕ້ອງການຕໍ່ຜະລິດຕະພັນເງິນຢວນນັບມື້ນັບສູງຂຶ້ນຕື່ມ.ໃນຖານະທີ່ເປັນສູນທົດລອງຂອງຕະຫຼາດເງິນຕາຕົ້ນທາງຂອງເງິນຢວນ, ຂະໜາດຂອງພັນທະບັດເງິນຢວນໃນຮົງກົງປະຈຸບັນບໍ່ໃຫຍ່ປານໃດ,ແຕ່ການເຕີບໂຕໄວຫຼາຍ,ປີກາຍນີ້, ບໍລິສັດແມັກໂດໂນວແລະບໍລິສັດຂ້າມຊາດແຫ່ງຕ່າງໆ, ທະນາຄານພັດທະນາອາຊີແລະລັດຖະບານຈີນລ້ວນແຕ່ໄດ້ຈຳໜ່າຍພັນທະບັດເງິນຢວນນັບມາຮອດທ້າຍເດືອນພະຈິກ2010, ຍອດເຫຼືອເງິນຝາກທີ່ເປັນເງິນຢວນຢູ່ຮົງກົງມີເຖິງ 291ຕື້700ລ້ານຢວນ,ກາຍເປັນເຂດທີ່ສຳຄັນຂອງວຽກງານສະສາງເງິນຢວນດ້ານການຄ້າລະຫວ່າງຊາດ.
ທ່ານຕິ່ງຈື້ເຈີກ່າວວ່າ, ທະນາຄານໂລກຈຳໜ່າຍເງິນຢວນຢູ່ຮົງກົງ, ມີຜົນສະທ້ອນອັນສຳຄັນຕໍ່ວຽກງານເພີ່ມເງິນຢວນຈີນຂຶ້ນຕື່ມຢູ່ຮົງກົງແລະການໝູນວຽນໃນລະຫວ່າງຊາດຂອງເງິນຢວນຈີນ.ທ່ານກ່າວວວ່າ:
"ມັນຈະຊຸກຍູ້ການພັດທະນາຕະຫຼາດເງິນຕາຕົ້ນທາງຂອງເງິນຢວນໃນຮົງກົງ.ທະນາຄານໂລກກໍ່ຈະສະໜອງເງິນກູ້ໃຫ້ແກ່ປະເທດທີ່ພວມພັດທະນາ, ເພື່ອຊຸກຍູ້ການພັດທະນາເສດຖະກິດຂອງປະເທດທີ່ພວມພັດທະນາ."
ສອງປີມານີ້, ຂະບວນການເງິນຢວນຈີນຫັນເປັນເງິນສາກົນນັບມື້ນັບໄວຂຶ້ນ. ເດືອນທັນວາປີກາຍນີ້, ເງິນຢວນກັບເງິນຣຸບໄດ້ຊື້ຂາຍຢູ່ຕະຫຼາດເງິນຕາຕ່າງປະເທດຂອງຣັດເຊຍ, ນີ້ແມ່ນເທື່ອທຳອິດທີ່ເງິນຢວນຕິດປ້າຍຊື້ຂາຍຢູ່ຕ່າງປະເທດ, ບ່ອນທົດລອງຊຳລະບັນຊີດ້ວຍເງິນຢວນໃນການຄ້າກັບປະເທດຕ່າງໆໄດ້ຂະຫຍາຍໄປທຸກປະເທດແລະເຂດແຄ້ວນ, ພາຍໃນປະເທດມີ 20 ແຂວງ. ວັນທີ 13 ມັງກອນນີ້, ທະນາຄານກາງຈີນປະກາດເອກະສານຕໍ່ພາຍນອກ, ໂດຍກ່າວວ່າ, ທະນາຄານແລະບໍລິສັດຢູ່ບ່ອນທົດລອງຊຳລະບັນຊີດ້ວຍເງິນຢວນໃນການຄ້າກັບປະເທດຕ່າງໆ ສາມາດຊຳລະບັນຊີການລົງທຶນໂດຍກົງດ້ວຍເງິນຢວນ.
ທ່ານຕີ່ງຈື້ເຈຍເຫັນວ່າ, ການຈຳໜ່າຍພັນທະບັດເທື່ອນີ້ກໍ່ໄດ້ສະແດງໃຫ້ເຫັນເຖິງທະນາຄານໂລກຍອມຮັບຕໍ່ອະນາຄົດຂອງເສດຖະກິດຈີນ.
"ຂ້າພະເຈົ້າຄຶດວ່າ, ຄວນເອົາການຈຳໜ່າຍພັນທະບັດຂອງທະນາຄານໂລກພົວພັນກັບຖານະປະເທດໃຫຍ່ຂອງຈີນ. ທີ່ຈິງແລ້ວ, ມັນໄດ້ຮັບຮູ້ເງິນຢວນຈີນແລະເສດຖະກິດຈີນ, ແລະກໍ່ເຫັນໄປໃນແງ່ດີຕໍ່ອະນາຄົດຂອງເງິນຢວນ, ບໍ່ແມ່ນການຈະເຮັດໃຫ້ອັດຕາແລກປ່ຽນເງິນຕາຕ່າງປະເທດຂອງເງິນຢວນສູງຂຶ້ນ."
