ຕາມຂ່າວCRI:ທີ່ນີ້ວິທະຍຸສາກົນແຫ່ງປະເທດຈີນ,ທ່ານຜູ່ຟັງທີ່ໂຄລົບ.ຕອນບ່າຍວັນທີ24ມັງກອນນີ້,ໃນທ່າມກາງສຽງກອງຍາວທີ່ບັນເລັງໂດຍຜູ່ບ່າວເຜົ່າໄທລື້,ທ່ານສຸລິນ ພິດສຸວັນ,ເລຂາທິການໃຫຍ່ອາຊຽນພ້ອມດ້ວຍລັດຖະມົນຕີວ່າການກະຊວງການຕ່າງປະເທດຂອງບັນດາປະເທດອາຊຽນແລະຜູ່ແທນລະດັບສູງຫຼາຍທ່ານທີ່ໄປຈີນເພື່ອເຂົ້າຮ່ວມການພົບປະລະຫວ່າງລັດຖະມົນຕີການຕ່າງປະເທດຈີນກັບອາຊຽນແລະສຳຫຼວດກວດກາທາງຫຼວງຄຸ່ນມີງບາງກອກຫຼືR3ນັ້ນໄດ້ເດີນທາງໄປຮອດດ່ານບໍ່ຫານຂອງຢຸນນານຈີນ.ທ່ານຫູເຈີ້ງເຢ້,ຜູ່ຊ່ວຍລັດຖະມົນຕີວ່າການກະຊວງການຕ່າງປະເທດຈີນໄດ້ຈັດພິທີຕ້ອນຮັບ.
ໃນວັນທີ24ມັງກອນນີ້,ລັດຖະມົນຕີກະຊວງການຕ່າງປະເທດຂອງປະເທດຕ່າງໆໃນອາຊຽນໄດ້ອອກເດີນທາງຈາກນະຄອນຊຽງຣາຍຂອງໄທ,ດ້ວຍລົດໃນໄລຍະທາງ300ກວ່າກິໂລແມັດ,ຜ່ານລາວໄປຮອດບໍ່ຫານ.ເມື່ອເຂົ້າຮອດດ່ານແລ້ວ,ທ່ານຫູເຈີ້ງເຢ້ໄດ້ນຳພາບັນດາທ່ານລັດຖະມົນຕີຂີ່ລົດໄປຊຽງຮຸ່ງ,ເທດສະບານກິ່ງແຂວງສິບສອງພັ່ນນາ,ເພື່ອສຳຫຼວດ ກວດກາທາງຫຼວງຄຸ່ນມີງບາງກອກຕອນທາງຜ່ານຈີນ.
ທາງຫຼວງຄຸ່ນມີງບາງກອກກໍ່ເອີ້ນວ່າເສັ້ນທາງສາກົນຄຸ່ນມີງບາງກອກ,ເລີ່ມແຕ່ເມືອງຄຸ່ນມີງ,ຜ່ານເມືອງຢູ້ຊີ່,ຊືເໝົາ,ກິ່ງແຂວງສິບສອງພັ່ນນາ,ເນັ່ງເຂົ້າໄປຫາແຂວງຫຼວງນ້ຳທາ,ຫ້ວຍຊາຍ,ແຂວງບໍ່ແກ້ວຂອງລາວ,ແລ້ວເຊື່ອມຕໍ່ເຂົ້າຫາເມືອງຊຽງຂອງຂອງໄທ.ຢູ່ໃນດິນ ໄທ,ແມ່ນຜ່ານຊຽງຣາຍແລະຊຽງໃໝ່,ຍາວໄປຮອດນະຄອນຫຼວງບາງກອກ,ແລະຈະ ເຊື່ອມຕໍ່ກັບຕາໜ່າງທາງຫຼວງຂອງມະເລເຊຍແລະສິງກະໂປ.ທາງຫຼວງຄຸ່ນມີງບາງກອກຍາວທັງໝົດປະມານ1750ກິໂລແມັດ.ທາງຫຼວງສາຍນີ້ຕອນທາງທີ່ຜ່ານຈີນຍາວ688ກິໂລແມັດ,ແມ່ນໄດ້ສ້າງເປັນທາງດ່ວນແລ້ວ;ຕອນທາງທີ່ຜ່ານລາວທີ່ມີຄວາມຍາວ247ກິໂລແມັດກໍ່ໄດ້ບັນລຸທາງຫຼວງມາດຕະຖານລະດັບສອງຂອງອາຊຽນ;ສ່ວນຕອນທາງທີ່ຜ່ານໄທທີ່ມີຄວາມຍາວ813ກິໂລແມັດກໍ່ໄດ້ສ້າງເປັນທາງດ່ວນຫຼືທາງຫຼວງລະດັບສູງໝົດ.
ໃນກອງປະຊຸມສຸດຍອດອາຊຽນຄັ້ງທີ17ທີ່ໄຂຂຶ້ນໃນເດືອນຕຸລາປີ2010ໄດ້ຜ່ານຮັບຮອງ"ແຜນແມ່ບົດທີ່ເຮັດໃຫ້ອາຊຽນເຊື່ອມໂຍງກັນ".ທາງຫຼວງຄຸ່ນມີງບາງກອກແມ່ນໜຶ່ງໃນເສັ້ນທາງເທິງບົກ4ສາຍທີ່ເຊື່ອມຕໍ່ແຂວງຢຸນນານຂອງຈີນກັບປະເທດຕ່າງໆຂອງອາຊີອາຄະເນແລະອາຊີໃຕ້,ແມ່ນໜຶ່ງໃນບັນດາໂຄງການຮ່ວມມືສຳຄັນທີ່ສ້າງສາພື້ນ ຖານໂຄງລ່າງຂອງຈີນແລະອາຊຽນໃຫ້ເຊື່ອມຕໍ່ກັນ,ຍັງແມ່ນເສັ້ນທາງຄົມມະນາຄົມອັນສຳຄັນທີ່ເຊື່ອມຕໍ່ຈີນກັບອາຊີອາຄະເນ.
ຂົວຂ້າມແມ່ນ້ຳຂອງທີ່ເຊື່ອມຕໍ່ເມືອງຫ້ວຍຊາຍຂອງລາວແລະເມືອງຊຽງຂອງຂອງໄທຈະສ້າງສຳເລັດໃນປີ2012,ຮອດເວລານັ້ນ,ທາງຫຼວງແຕ່ຄຸນມີງຫານະຄອນຫຼວງບາງກອກຫຼື ເສັ້ນທາງR3ຈະແລ່ນລົດໄດ້ຕະຫຼອດສາຍ, ການເດີນທາງຈະໃຊ້ເວລາສັ້ນເຂົ້າກວ່າເກົ່າ. ຖ້າເດີນທາງຈາກເມືອງຄຸນມີງໄປຫາເມືອງບໍ່ຫານຊາຍແດນລາວຈີນຈະໃຊ້ເວລາພຽງແຕ່10ກວ່າຊົ່ວໂມງເທົ່ານັ້ນ, ຈາກເມືອງຄຸນມີງໄປຫານະຄອນຫຼວງບາງກອກຈາກ48ຊົ່ວໂມງໃນແຕ່ກ່ອນສັ້ນເຂົ້າເປັນ20ກວ່າຊົ່ວໂມງ, ສະນັ້ນ, ຈະມີບົດບາດຢ່າງຕັ້ງໜ້າໃນການຊຸກຍູ້ການພັດທະນາເສດຖະກິດແລະການໄປມາຫາສູ່ກັນລະຫວ່າງປະຊາຊົນຈີນກັບອາຊຽນຕື່ມອີກ. ຫຼັງຈາກເສັ້ນທາງR3ເປີດໃຊ້ບໍລິການຢ່າງຮອບດ້ານແລ້ວ, ແຕ່ລະປີຈະມີ ສິນຄ້າທີ່ມີມູນຄ່າຫຼາຍກວ່າ400ຕື້ໂດລາຖືກຂົນສົ່ງໄປມາບົນເສັ້ນທາງສາຍນີ້, ຍັງຈະດຶງດູດນັກທ່ອງທ່ຽວຫຼາຍລ້ານເທື່ອຄົນ, ຊຸກຍູ້ການພັດທະນາດ້ານການທ່ອງທ່ຽວຂອງປະເທດຕ່າງໆ.
ໃນດ້ານການເຊື່ອມຕໍ່ກັນຢ່າງຮອບດ້ານທີ່ຈີນກັບອາຊຽນພະຍາຍາມຊຸກຍູ້ນັ້ນ, ເມືອງຄຸນມີງແມ່ນຢູ່ແຖວໜ້າ. ປະຈຸບັນ, ທາງລົດໄຟ"4ສາຍ"ທີ່ອອກສູ່ຕ່າງປະເທດຄືສາຍແຕ່ຈີນໄປຫວຽດນາມ, ຈີນໄປມຽນມາ, ແລະສາຍທີ່ຈີນໄປອາຊີໃຕ້ໂດຍຜ່ານມຽນມາທີ່ພວມປັບປຸງສ້າງໃໝ່ນັ້ນລ້ວນແຕ່ແມ່ນຖືເມືອງຄຸນມີງເປັນຈຸດຕົ້ນທາງ. ໃນດ້ານທາງຫຼວງ,ທາງຫຼວງທັງໝົດທີ່ແຂວງຢຸນນານໄປຫາອາຊີອາຄະເນລ້ວນແຕ່ຖືເມືອງຄຸນມີງເປັນຈຸດຕົ້ນທາງຄືກັນ, ຕາໜ່າງທາງຫຼວງລະດັບສູງທີ່ຖືເມືອງຄຸນມີງເປັນໃຈກາງໄດ້ສ້າງຕັ້ງຂຶ້ນໂດຍພື້ນຖານ,ສາມາດຕິດຕໍ່ກັບເຂດແຂວງກຳແພງນະຄອນພາຍໃນປະເທດຈີນແລະປະເທດອ້ອມຂ້າງໂດຍກົງ.ໃນດ້ານທາງນ້ຳ,ການເດີນເຮືອການຄ້າຕາມແມ່ນ້ຳລ້ານຊ້າງແມ່ນ້ຳຂອງທີ່ຜ່ານຈີນລາວມຽນມາແລະໄທຢ່າງເປັນທາງການນັ້ນໄດ້ເຂົ້າສູ່ປີທີ10ແລ້ວ. ໃນດ້ານການສື່ສານ, ໄດ້ສ້າງ"ເວບໄຊເຂດການຄ້າເສລີຈີນ-ຊຽນ". ນັບແຕ່ປີ2008ທີ່ເສັ້ນທາງR3ໄດ້ເປີດໃຊ້ບໍລິການມານີ້, ເມືອງຄຸນມີງໄດ້ຄົ້ນຄ້ວາແລະແກ້ໄຂບັນຫາຕ່າງໆທີ່ເກີດຂຶ້ນຕາມ"ເສັ້ນທາງຄຳ"ສາຍນີ້, ເຊັ່ນ:ບັນຫາຄວາມສາມາດການຂົນສົ່ງ,ຕົ້ນທຶນ,ຄວາມສະດວກແລະອື່ນໆ.ປະຈຸບັນນີ້, ຜົນປະໂຫຍດດ້ານເສດຖະກິດໂດຍກົງທີ່ເກີດຂຶ້ນຈາກເສັ້ນທາງສາຍນີ້ພວມເພີ່ມຂຶ້ນຄູ່ປີ.
