ຕາມຂ່າວຈາກໜັງສືພິມປະຊາຊົນລາຍວັນ:ໃນວັນທີ9ກຸມພານີ້,ທ່ານເວີ່ນເຈ່ຍປາວ,ນາຍົກລັດຖະມົນຕີຈີນຮຽກໄຂກອງປະຊຸມປະຈຳ,ເພື່ອວິໄຈສະພາບການຜະລິດທັນຍາຫານໃນປະຈຸບັນນີ້,ບົນພື້ນຖານນະໂຍບາຍຄ້ຳຊູທີ່ມີຢູ່ແລ້ວ,ເພີ່ມອີກ10ມາດຕະການອັນສຳຄັນເພື່ອເພີ່ມການຄ້ຳຊູຕໍ່ການຜະລິດທັນຍາຫານຕື່ມອີກ.10ມາດຕະການນີ້ລວມທັງການສະໜອງເງິນອຸດໜູນຕໍ່ເຂດປະສົບໄພແຫ້ງແລ້ງທີ່ຜະລິດທັນຍາຫານ,ເພີ່ມການອຸດໜູນຕໍ່ ເຂດທີ່ປະສົບໄພແຫ້ງແລ້ງນັ້ນກວ້າງຂວາງກວ່າເກົ່າ,ເພີ່ມການກໍ່ສ້າງພື້ນຖານໂຄງລ່າງດ້ານການຕ້ານໄພແຫ້ງແລ້ງ,ແລະຍົກສູງລາຄາຕ່ຳສຸດທີ່ຮັບຊື້ເຂົ້າເປັນຕົ້ນ.ເຈົ້າໜ້າທີ່ທີ່ກ່ຽວຂ້ອງຂອງກະຊວງກະສິກຳຈີນກ່າວວ່າ,ທັງໝົດເຫຼົ່ານີ້ໄດ້ສະແດງໃຫ້ເຫັນວ່າ ລັດຖະບານມີຄວາມເອົາໃຈໃສ່ໃນລະດັບສູງຕໍ່ການຜະລິດທັນຍາຫານແລະກະສິກຳ,ເຊິ່ງຈະເກີດມີຜົນສຳທ້ອນອັນສຳຄັນທີ່ສຸດຕໍ່ການເຮັດໃຫ້ການຜະລິດທັນຍາຫານໃນລະດູຮ້ອນແລະການຜະລິດກະສິກຳໃນຕະຫຼອດປີໄດ້ຮັບຜົນເກັບກ່ຽວອັນອຸດົມສົມບູນ.
ນັບແຕ່ເດືອນຕຸລາປີ2010ເປັນຕົ້ນມາ,ເຂດສ່ວນໃຫຍ່ຂອງພາກເໜືອຈີນ,ເຂດລະຫວ່າງ ແມ່ນ້ຳເຫຼືອງກັບແມ່ນ້ຳຮວຍເຮີ,ແລະພາກເໜືອຂອງເຂດລະຫວ່າງແມ່ນ້ຳຢາງຊີກຽງກັບ ແມ່ນ້ຳຮວຍເຮີມີຝົນຕົກໜ້ອຍຢ່າງລຽນຕິດ,ເຂດຕົ້ນຕໍທີ່ຜະລິດເຂົ້າເບຼໃນລະດູໜາວ,ຄື:ຊ່ານຕົ່ງ,ເຮີນານ,ເຮີເປີຍ,ຊ່ານຊີ່,ອ່ານຮຸ່ຍແລະຈ່ຽງຊູ່ໄດ້ເກີດໄພແຫ້ງແລ້ງຢ່າງໜັກໜ່ວງ,ປະຈຸບັນນີ້,ໄດ້ເກີດມີວີແວວທີ່ຈະປະສົບໄພແຫ້ງແລ້ງແຕ່ລະດູໜາວຮອດລະດູໃບໄມ້ປົ່ງຢ່າງລຽນຕິດ.ຕາມສະຖານີອຸຕຸນິຍົມຄາດຄະເນວ່າ,ກ່ອນເດືອນເມສາປີນີ້,ເຂດພາກເໜືອຈີນແລະເຂດລະຫວ່າງແມ່ນ້ຳເຫຼືອງກັບແມ່ນ້ຳຮວຍເຮີຍັງຈະມີຝົນຕົກໜ້ອຍກວ່າໄລຍະດຽວກັນຂອງປີທຳມະດາ.ໃນຂະນະດຽວກັນນີ້,ເຂົ້າເບຼໄດ້ເຂົ້າສູ່ໄລຍະສຳຄັນຂອງການເຕີບໃຫຍ່,ມີຄວາມຕ້ອງການເພີ່ມຂຶ້ນຫຼາຍຕໍ່ປະລິມານນ້ຳແລະຝຸ່ນ.ຖ້າວ່າບໍ່ໃຊ້ມາດຕະ ການທີ່ບັງເກີດຜົນ,ຈະມີຜົນກະທົບຢ່າງຮ້າຍແຮງຕໍ່ຜົນເກັບກ່ຽວເຂົ້າເບຼ.ໃນວັນທີ8ກຸມພານີ້,ອົງການອາຫານແລະການກະເສດສະຫະປະຊາຊາດຫຼືຟາວກ່າວເຕືອນວ່າ,ໄພແຫ້ງແລ້ງຢ່າງໜັກໜ່ວງທີ່ຈີນປະສົບນັ້ນອາດຈະເກີດມີຜົນກະທົບຕໍ່ຕະຫຼາດທັນຍາຫານຂອງໂລກ.
ຕົ້ນປີ2011, ຂໍ້ຕົກລົງກ່ຽວກັບການເລັ່ງລັດການປະຕິຮູບພັດທະນາດ້ານຊົນລະ ປະທານຂອງລັດຖະບານແລະສູນກາງພັກກອມມູນິດຈີນ>ເຊິ່ງເປັນເອກະສານເລກ1ຂອງສູນກາງໃນປີນີ້ໄດ້ເຜີຍແຜ່ອອກມາ. ເອກະສານດັ່ງກ່າວໄດ້ເອົາການກໍ່ສ້າງສິ່ງກໍ່ສ້າງຊົນລະປະທານໄວ້ຢູ່ໃນຖານະທີ່ສຳຄັນທີ່ສຸດໃນການພັດທະນາກະສິກຳ. ເອກະສານສະເໜີອອກຢ່າງຈະແຈ້ງວ່າ, ສະພາບອ່ອນແອດ້ານຊົນລະປະທານທີ່ຕ້ອງການເພີ່ມທະວີຢ່າງພົ້ນເດັ່ນລວມມີ5ດ້ານ, ຄື: ອັນທີໜຶ່ງແມ່ນການກໍ່ສ້າງດ້ານຊົນລະປະທານທົ່ງນາ, ອັນທີສອງແມ່ນການຄຸ້ມຄອງນ້ຳຂະໜາດກາງແລະນ້ອຍກັບການປັບປຸງອ່າງເກັບນ້ຳຂະໜາດນ້ອຍທີ່ມີຄວາມສຽງ. ອັນທີສາມແມ່ນແກ້ໄຂບັນຫາຂາດນ້ຳຍ້ອນຂາດໂຄງການສະໜອງນ້ຳໃນພາກຕາເວັນຕົກສຽງໃຕ້ແລະເຂດອື່ນໆ, ອັນທີສີ່ແມ່ນການກໍ່ສ້າງຄວາມສາມາດໃນການຕ້ານແລ້ງຕ້ານຖ້ວມ, ອັນສຸດທ້າຍແມ່ນແກ້ໄຂບັນຫາຄວາມປອດໄພດ້ານນ້ຳກິນໃນຊົນນະບົດ. 5ດ້ານທີ່ອ່ອນແອດັ່ງກ່າວລ້ວນແຕ່ແມ່ນພົວພັນກັບຊີວິດການເປັນຢູ່ຂອງປະຊາຊົນຢ່າງສະໜິດແໜ້ນ.
ວັນທີ9 ກຸມພານີ້,ລັດຖະບານຈີນກໍໄດ້ອອກມາດຕະການໃໝ່ທີ່ເພີ່ມທະວີການສະໜັບສະໜູນການຜະລິດກະສິກຳ.ຜູ່ຮັບຜິດຊອບກ່ຽວຂ້ອງຂອງກະຊວງກະສິກຳຈີນກ່າວວ່າ,"ພາຍໃຕ້ສະພາບການທີ່ບໍ່ດີໃນປັດຈຸບັນ,ລັດຖະບານອອກມາດຕະການສະໜັບສະໜູນແມ່ນທັນເວລາທີ່ສຸດ,ຈະມີຜົນດີຕໍ່ການຊີ້ນຳຊາວນາເພີ່ມທະວີການລົງທຶນ,ເພີ່ມທະວີການຄຸ້ມຄອງທົ່ງນາ."ທ່ານກ່າວວ່າ,ຕ້ອງຊີ້ນຳຈັດຕັ້ງຊາວນາໃຊ້ທຶນອຸດໜູນໃນການຕ້ານໄພແຫ້ງແລ້ງຢ່າງແທ້ຈິງ.ໃນຂະນະດຽວກັນ,ອອກແຮງຈັດຕັ້ງຜູ່ຊ່ຽວຊານແລະນັກວິຊາການດ້ານກະສິກຳໄປຊົນນະບົດ,ເຮັດໃຫ້ແຕ່ລະບ້ານມີນັກວິຊາການເພື່ອຊີ້ນຳຊາວຕ້ານໄພແຫ້ງແລ້ງແລະຄຸ້ມຄອງທົ່ງນາເປັນຢ່າງດີ.ນອກນີ້,ຍັງຈະໃຊ້ມາດຕະການແທ້ຈິງ,ຄວບຄຸມສັດຕູພືດໂດຍອີງຕາມເງື່ອນໄຂດິນຟ້າອາກາດທີ່ພິເສດແລະຈຸດພິເສດຂອງສັດຕູພືດໃນປີນີ້.
ໂດຍແນໃສ່ເພື່ອແກ້ໄຂສະພາບແຫ້ງແລ້ງທີ່ຂ້ຽວຂາດ,ວັນທີ9 ກຸມພານີ້,ໃນກອງປະຊຸມເຮັດວຽກຕ້ານແຫ້ງແລ້ງແລະຊຸກຍູ້ການຄຸ້ມຄອງທົ່ງນາລະດູໃບໄມ້ປົ່ງທົ່ວປະເທດທີ່ໄຂຂຶ້ນໂດຍຜ່ານວິດີໂອ,ທ່ານຮານຊາງຟູ້ ລັດຖະມົນຕີວ່າການກະຊວງກະສິກຳຈີນກ່າວວ່າ,ການຜະລິດເຂົ້າແລະພືດນ້ຳມັນໃນລະດູຮ້ອນແມ່ນວຽກງານສຳຄັນທີ່ໜຶ່ງຂອງການຜະລິດກະສິກຳໃນປີນີ້,ມັນພົວກ່ຽວພັນເຖິງຊີວິດການເປັນຢູ່ພື້ນຖານຂອງປະຊາຊົນແລະສະຖານະການພັດທະນາສັງຄົມເສດຖະກິດ,ແມ່ນສຳຄັນທີ່ສຸດຕໍ່ການເພີ່ມຄວາມໝັ້ນໃຈໃນສັງຄົມ,ຜ່ອນຄາຍຄວາມກົດດັນທີ່ຈະເກີດໄພເງິນເຟີ້,ເຮັດໃຫ້ການຜະລິດທັນຍາຫານໝັ້ນທ່ຽງໃນຕະຫຼອດປີ.
