ເຄື່ອງນຸ່ງຫົ່ມ ໝວກເກີບທີ່ລາຄາຖືກ, ກັບໄຟທີ່ມີກຳໄລບໍ່ຮອດ 0.1 ຢວນ. ໃນສາຍຕາຂອງປະຊາຊົນຊາວໂລກ "ຈີນຜະລິດ"ກໍ່ໝາຍເຖິງ"ຜະລິດຕະພັນຂັ້ນ ຕົ້ນ". ໃນຫຼາຍປີມານີ້,ຄຽງຄູ່ກັບຍານອະວະກາດ"ເຊີນໂຈ່ວ"ບິນຂຶ້ນສູ່ອະວະກາດ, ລົດໄຟຄວາມໄວສູງໄດ້ສ້າງສະຖິຕິໂລກໃໝ່ຢ່າງບໍ່ຢຸດຢັ້ງ, ພ້ອມທັງລົດຍົນພະລັງງານສະອາດຊະນິດຕ່າງໆ ແລະ ເຫຼັກກ້າທີ່ບາງຄືເຈ້ຍໄດ້ຜະລິດອອກຢ່າງບໍ່ຂາດສາຍ, ທົ່ວໂລກພວມໃຊ້ສາຍຕາໃໝ່ມາສັງເກດ"ຈີນຜະລິດ".
ການຊຸກຍູ້"ຈີນຜະລິດ"ໄປຮອດລະດັບສູງສຸດຂອງຂະແໜງອຸດສາຫະກຳການຜະລິດໃນສາກົນນັ້ນແມ່ນລັດວິສາຫະກິດລະດັບສູນກາງຈີນທີ່ກວມຫຼາຍກວ່າ 40% ຂອງGDPຈີນ. ແຕ່ລະປີ, ລັດວິສາຫະກິດລະດັບສູນກາງຈີນກໍ່ລົງທຶນຫຼາຍສົມຄວນໃນຂົງເຂດຄົ້ນຄວ້າພັດທະນາ ແລະ ປະດິດສ້າງ. ແຕ່ ປີ2006 ຫາ ປີ2009, ຄ່າໃຊ້ຈ່າຍໃນການຄົ້ນຄວ້າພັດທະນາຂອງລັດວິສາຫະກິດລະດັບສູນກາງຈີນສະເລ່ຍແລ້ວໄດ້ເພິ່ມຂຶນ 27,9% ຕໍ່ປີ. ລັດວິສາຫະກິດລະດັບສູນກາງຈີນມີສິດທິບັດສິ່ງປະດິດສ້າງ 2 ໝື່ນ 1 ພັນ 266 ລາຍ, ຈັງຫວະເພິ່ມຂຶ້ນຂອງການຮ້ອງຂໍສິດທິບັດຂອງວິສາຫະກິດຈຳນວນໜຶ່ງ ສູງກວ່າ 50% ຕໍ່ປີ.
ຈີນແມ່ນປະເທດໃຫຍ່ທີ່ຜະລິດຂາງ ແລະ ເຫຼັກກ້າ,ແຕ່ອັດຕາກຳໄລຂອງອຸດສາຫະກຳຂາງ ແລະ ເຫຼັກກ້າຈີນພັດຖືກຈຳກັດດ້ວຍຫີນແຮ່ເຫຼັກທີ່ມີລາຄາສູງ. ໃນປີ2010, ອັດຕາກຳໄລຂອງອຸດສາຫະກຳຂາງ ແລະ ເຫຼັກກ້າຂອງຈີນມີແຕ່ 2,91%ເທົ່ານັ້ນ, ແຕ່ກຳໄລຂອງກຸ່ມບໍລິສັດຣີໂອ ຕີນໂຕ ເຊິ່ງເປັນບໍລິສັດຫີນແຮ່ເຫຼັກຂະໜາດໃຫຍ່ທີ່ສຸດໃນໂລກກໍ່ຫຼາຍກວ່າລວມຍອດກຳໄລຂອງວິສາຫະກິດຂາ ແລະ ເຫຼັກກ້າ80%ຂອງຈີນ.
ເຫຼັກກ້າທີ່ໃຊ້ໃນການຜະລິດລົດຍົນແມ່ນເຫຼັກກ້າລະດັບສູງ, ກໍແມ່ນຂີດໝາຍສຳຄັນທີ່ສະແດງເຖິງລະດັບເຕັກນິກອຸດສາຫະກຳເຫຼັກກ້າ ຂອງປະເທດໜຶ່ງ. ໃນຊຸມປີມໍ່ໆມານີ້, ຈີນໄດ້ເພີ່ມການລົງທຶນໃນການຄົ້ນຄວ້າຜະລິດເຫຼັກກ້າລົດຍົນ. ທ່ານຖຽນຈື້ຫຼິງ, ຮອງຜູ້ອຳນວຍການໃຫຍ່ກຸ່ມບໍລິສັດຄົ້ນຄວ້າ ວິທະຍາສາດເຕັກນິກເຫຼັກກ້າຈີນ ກ່າວວ່າ, ປີ 2010, ກຸ່ມບໍລິສັດດັ່ງກ່າວໄດ້ຄົ້ນຄວ້າເຕັກນິກຜະລິດເຫຼັກກ້າລົດຍົນລຸ້ນທີ 3 ທີ່ມີລະດັບນຳໜ້າທົ່ວໂລກ ຢ່າງສຳເລັດຜົນກ່ອນໝູ່ໃນທົ່ວໂລກ, ພາຍຫຼັງໃຊ້ເຫຼັກກ້າລົດຍົນລຸ້ນທີ 3 ແລ້ວ, ສາມາດຫຼຸດນ້ຳໜັກຂອງລົດຍົນໃຫ້ໜ້ອຍລົງຢ່າງຫຼວງຫຼາຍ, ແລະຍົກສູງຄວາມປອດໄພໃນເວລາລົດກຳກັນ. ເຕັກນິກດັ່ງກ່າວແມ່ນເຕັກນິກຂໍກະແຈໃນການຍົກສູງກຳລັງແຂ່ງຂັນໃນຕະຫຼາດລົດຍົນສາກົນ, ສາມາດຍົກລະດັບເຕັກນິກອຸດສາຫະກຳເຫຼັກກ້າຢ່າງຮອບດ້ານ, ຈີນກໍບໍ່ຈຳເປັນຕ້ອງຕິດຕາມແລະຮ່ຳຮຽນເຕັກນິກຜະລິດເຫຼັກກ້າລົດຍົນນຳຝ່າຍຕາເວັນຕົກເໝືອນດັ່ງຜ່ານມາເປັນເວລາດົນນານອີກ. ຈີນໄດ້ມີການສະໜັບສະໜູນດ້ານເຕັກນິກໃນການພັດ ທະນາປະເທດໃຫຍ່ໃຫ້ເປັນປະເທດເຂັ້ມແຂງດ້ານເຫຼັກກ້າ.
ການພັດທະນາປ່ຽນເຕັກນິກໃນຂົງເຂດໂທລະຄົມເຄື່ອນທີ່ມີການພັດ ທະນາຢ່າງວ່ອງໄວ, ຈະມີມາດຕະຖານເຕັກນິກໂທລະຄົມເຄື່ອນທີ່ຂອງຕົນຫຼືບໍ່ນັ້ນ, ບໍ່ພຽງແຕ່ແມ່ນຂີດໝາຍສຳຄັນທີ່ສະແດງເຖິງລະດັບການພັດທະນາອຸດສາຫະກຳຂໍ້ມູນຂ່າວສານຂອງປະເທດໜຶ່ງເທົ່ານັ້ນ, ຍັງພົວພັນເຖິງການພັດທະນາເສດຖະກິດແຫ່ງຊາດແລະຊີວິດການເປັນຢູ່ຂອງປະຊາຊົນ ຈົນກະທັ້ງຄວາມປອດໄພແຫ່ງຊາດອີກດ້ວຍ. ໃນສະໄໝ 1G, ເຄື່ອງອຸປະກອນໂທລະຄົມຂອງຈີນອາໄສການນຳເຂົ້າທັງໝົດ; ໃນສະໄໝ 2G, ວິສາຫະກິດປະເທດຝ່າຍຕາເວັນຕົກໄດ້ກວມໂກຕາຕະຫຼາດໂທລະຄົມຂອງຈີນຫຼາຍກວ່າ 80%, ຮອດສະໄໝ 3G, ໃນຕະຫຼາດＴＤ――ＳＣＤＭＡ, ອຸປະກອນໂທລະຄົມ 90% ແມ່ນວິສາຫະກິດຈີນເປັນຜູ້ສະໜອງ. ພາຍຫຼັງມີເຕັກໂນໂລຊີＴＤ――ＳＣＤＭＡ ເຊິ່ງເປັນສິດຊັບສິນທາງປັນຍາຂອງຈີນ, ຈີນກໍບໍ່ຕ້ອງຈ່າຍຄ່າລິຂະສິດທີ່ມີມູນຄ່າຈຳນວນຫຼວງຫຼາຍໃຫ້ຕ່າງປະເທດອີກ.
ທ່ານເສີນຊ່ານຈື່, ຮອງ CEO ທັງເປັນວິສະວະກອນໃຫຍ່ຂອງກຸ່ມບໍລິສັດໂທລະຄົມຕ້າຖາງຈີນ ກ່າວວ່າ, ເຕັກໂນໂລຊີ TD—LTE—A ຂອງກຸ່ມບໍລິສັດຕ້າຖາງກາຍເປັນມາດຕະຖານສາກົນຂອງໂທລະຄົມເຄື່ອນທີ່ລຸ້ນທີ 4 ຫຼື 4G ນັ້ນ ເປັນເລື່ອງທີ່ແນ່ນອນແລ້ວ. ຖ້າເຕັກໂນໂລຊີດັ່ງກ່າວກາຍເປັນມາດຕະຖານສາກົນຢ່າງແທ້ຈິງ, ອຸດສາຫະກຳໂທລະຄົມຂອງຈີນຈະພົ້ນຈາກການອາໄສເຕັກໂນໂລຊີຕ່າງປະເທດຢ່າງສິ້ນເຊິງ, ສະພາບການແກ່ງແຍ່ງທີ່ນັກທຸລະກິດປະເທດຝ່າຍຕາເວັນຕົກຜູກຂາດອຸດສາຫະກຳໂທລະຄົມຂອງໂລກນັ້ນ ຈະມີການປ່ຽນແປງ. ຮອດເວລານັ້ນ, ໃນຂະນະທີ່ນັກທຸລະກິດຈີນສົ່ງອອກຜະລິດຕະພັນຂໍ້ມູນຂ່າວສານເອເລັກໂຕຣນິກ, ຍັງຈະສົ່ງອອກເຕັກໂນໂລຊີຂອງຕົນອີກດ້ວຍ.
