ໂດຍຕອບສະຫນອງຕາມການເຊື້ອເຊີນຂອງອິນໂດເນເຊຍ, ປະເທດປະທານໝູນ ວຽນອາຊຽນ, ວັນທີ22ກຸມພານີ້, ລັດຖະມົນຕີການຕ່າງປະເທດຫລືຜູ້ຕາງຫນ້າລັດຖະມົນຕີຂອງ10ປະເທດອາຊຽນໄດ້ຈັດກອງປະຊຸມທີ່ບໍ່ເປັນທາງການຢູ່ທີ່ຈາກາຕາ, ເພື່ອປຶກສາຫາລືບັນ ຫາການປະທະກັນລະຫວ່າງໄທ-ກຳປູເຈຍໃນຫວ່າງມໍ່ໆມານີ້.
ຫາງສຽງທົ່ວໄປເຫັນວ່າ, ອິນໂດເນເຊຍສົ່ງຜູ້ສັງເກດການໄປໄທແລະກຳປູເຈຍຕາມການເຊື້ອເຊີນ, ແລະອິນໂດເນເຊຍຈະເຂົ້າຮ່ວມການໄກ່ເກ່ຍຄວາມຂັດແຍ່ງລະຫວ່າງໄທແລະກຳປູເຈຍນັ້ນ, ຖືວ່າເປັນຄວາມຄືບຫນ້າອັນພົ້ນເດັ່ນສອງປະການໃນກອງປະຊຸມຄັ້ງນີ້. ໃນກອງປະຊຸມ, ໄທແລະກຳປູເຈຍລ້ວນແຕ່ເຫັນດີແລະເຊື້ອເຊີນອິນໂດເນເຊຍສົ່ງຜູ້ສັງເກດການໄປເຂດທີ່ມີຄວາມຂັດແຍ່ງຢູ່ຊາຍແດນ2ປະເທດເພື່ອຕິດຕາມກວດກາການຢຸດຍິງໃນເບື້ອງໄທແລະເບື້ອງກຳປູເຈຍ. ທ່ານມາຕີ ນາຕາເລກາວາລັດຖະມົນຕີວ່າການກະຊວງການຕ່າງປະເທດອິນໂດເນເຊຍເຫັນວ່າ, ນີ້ແມ່ນໄທແລະກຳປູເຈຍບັນລຸການເຊັນສັນຍາແບບນີ້ເປັນຄັ້ງທຳອິດ, ອິນໂດເນເຊຍຈະຕາງຫນ້າອາຊຽນສົ່ງຜູ້ສັງເກດການໄປຕິດຕາມກວດກາການຢຸດຍິງຂອງ2ປະເທດ, ເພື່ອຮັບປະກັນການຢຸດຍິງໃຫ້ໄດ້ຮັບການປະຕິບັດຢ່າງແທ້ຈິງ. ທ່ານ ມາຕີກ່າວວ່າ, ອິນໂດເນເຊຍຈະສົ່ງຄະນະສັງເກດການບໍ່ປະກອບອາວຸດໄປຕິດຕາມກວດກາສະພາບການຢຸດຍິງຢູ່ຊາຍແດນໄທ-ກຳປູເຈຍ, ແຜນການລະອຽດຈະຕົກລົງຫລັງຈາກປຶກສາຫາລືກັນກັບ2ຝ່າຍໃນບໍ່ເທົ່າໃດວັນຂ້າງຫນ້າ. ທ່ານກ່າວວ່າ, ການສົ່ງຜູ້ສັງເກດການຄັ້ງນີ້ບໍ່ແມ່ນເພື່ອເສີມຂະຫຍາຍບົດບາດແລະຮັບຜິດຊອບແທນ2ປະເທດ, ແຕ່ແມ່ນເພື່ອສະຫນອງການຊ່ວຍເຫລືອແລະ ການສະຫນັບສະຫນູນໃຫ້ແກ່2ປະເທດ. ເມື່ອມີການກະທຳທີ່ລ່ວງລະເມີດສັນຍາຢຸດຍິ່ງແລ້ວ,ຜູ້ສັງເກດການ ຈະສະເຫນີບົດລາຍງານທີ່ຍຸດຕິທຳແລະຖືກຕ້ອງໃຫ້ແກ່ທຸກຝ່າຍທີ່ກ່ຽວຂ້ອງໂດຍຜ່ານອິນໂດເນເຊຍ
ຜົນສຳຄັນອີກປະການໜຶ່ງຂອງກອງປະຊຸມເທື່ອນີ້ ແມ່ນໄທແລະກຳປູເຈຍໄດ້ຮຽກຮ້ອງໃຫ້ອິນໂດເນເຊຍເຂົ້າຮ່ວມການໄກ່ເກ່ຍໃນກອງປະຊຸມ ລະຫວ່າງໄທແລະກຳປູເຈຍທີ່ຈະຈັດຂຶ້ນໃນອີກບໍ່ດົນນີ້. ອີງຕາມຖະແຫຼງການທີ່ເຜີຍແຜ່ຫຼັງກອງປະຊຸມເທື່ອນີ້, ໄທແລະກຳປູເຈຍລ້ວນແຕ່ເຫັນດີແລະຮຽກຮ້ອງໃຫ້ຜູ້ແທນອາຊຽນເຂົ້າຮ່ວມກອງປະຊຸມລະດັບລັດຖະມົນຕີການຕ່າງປະເທດ, ແລະກອງປະຊຸມລະດັບລັດຖະມົນຕີກະຊວງປ້ອງກັນປະເທດຂອງສອງຝ່າຍ ແລະ ກອງປະຊຸມຄະນະກຳມະການຊາຍແດນຮ່ວມ ທີ່ຈັດຂຶ້ນໃນຕໍ່ໜ້າເພື່ອແກ້ໄຂການປະທະກັນລະຫວ່າງໄທແລະກຳປູເຈຍຍ້ອນຄວາມຂັດແຍ່ງຊາຍແດນ. ໃນຖານະທີ່ເປັນປະເທດປະທານໝູນວຽນອາຊຽນ, ອິນໂດເນເຊຍຈະຕາງໜ້າອາຊຽນເຂົ້າຮ່ວມການແກ້ໄຂໂດຍສັນຕິ. ທ່ານມາຕີ ນາຕາເລກາວາ ຍັງກ່າວຕື່ມວ່າ, ການພົບປະເຈລະຈາເທື່ອໜ້າກ່ຽວກັບຄວາມຂັດແຍ່ງຊາຍແດນລະຫວ່າງໄທແລະກຳປູເຈຍ ໄດ້ຕົກລົງຈະຈັດຂຶ້ນຢູ່ອິນໂດເນເຊຍ, ສ່ວນເວລາຈັດກອງປະຊຸມຍັງບໍ່ໄດ້ກຳນົດເທື່ອ.
ກອງປະຊຸມໃນວັນທີ 22 ກຸມພາ ແມ່ນການພົບປະຄັ້ງທຳອິດລະຫວ່າງໄທແລະກຳປູເຈຍຫຼັງຈາກກອງປະຊຸມປະສານງານຄວາມຂັດແຍ່ງຊາຍແດນໄທກຳປູເຈຍທີ່ຈັດຂຶ້ນຢູ່ສຳນັກງານໃຫຍ່ສະຫະປະຊາຊາດທີ່ນິວຢອກໃນວັນທີ 14 ກຸມພາຜ່ານມາ. ກ່ອນໜ້ານີ້, ໄທແລະກຳປູເຈຍຕ່າງຝ່າຍຕ່າງອ້າງວ່າຝ່າຍກົງກັນຂ້າມເປັນຜູ້ຍິງກ່ອນຢູ່ບໍລິເວນຜາສາດພະວິຫານທີ່ມີຄວາມຂັດແຍ່ງກັນ. ກຳປູເຈຍໄດ້ຮຽກຮ້ອງໃຫ້ຜູ້ແທນອາຊຽນໄກ່ເກ່ຍຄວາມຂັດແຍ່ງສອງຝ່າຍມາກ່ອນແລ້ວ, ແຕ່ໄດ້ຮັບການປະຕິເສດຈາກໄທ. ວັນທີ 19 ກຸມພາຜ່ານມານີ້, ທ່ານອະພິສິດ ເວດຊາຊີວະ, ນາຍົກລັດຖະມົນຕີໄທ ຍຶດໝັ້ນໃຫ້ໄທແລະກຳປູເຈຍ ປຶກສາຫາລືແຜນການແກ້ໄຂບັນຫາພາຍໃຕ້ກົນໄກການເຈລະຈາລະຫວ່າງສອງຝ່າຍ, ຫຼັກໝັ້ນສະເໝີຕົ້ນສະເໝີປາຍຂອງອາຊຽນແມ່ນບໍ່ເຂົ້າແຊກວຽກງານພາຍໃນຂອງປະເທດສະມາຊິກໂດຍກົງ, ຈຶ່ງບໍ່ອາດເຂົ້າແຊກການພົບປະເຈລະຈາກ່ຽວກັບການຢຸດຍິງ ລະຫວ່າງໄທແລະກຳປູເຈຍ. ແຕ່ເທື່ອນີ້ ທ່າທີຂອງໄທໄດ້ມີການປ່ຽນແປງ, ເຫັນດີໃຫ້ອິນໂດເນເຊຍ ປະເທດປະທານໝູນວຽນອາຊຽນສົ່ງຜູ້ສັງເກດການໄປເຂດຂັດແຍ່ງກັນແລະເຂົ້າຮ່ວມການໄກ່ເກ່ຍຢ່າງເປັນທາງການ, ນີ້ແມ່ນບາດກ້າວສຳຄັນຂອງສອງປະເທດໃນການແກ້ໄຂບັນຫາຄວາມຂັດແຍ່ງຊາຍແດນໂດຍສັນຕິ. ທ່ານສຸລິນ ເລຂາທິການໃຫຍ່ອາຊຽນກໍກ່າວວ່າ ກອງປະຊຸມເທື່ອນີ້ແມ່ນມີລັກສະນະປະຫວັດສາດ, ໄທແລະກຳປູເຈຍຕ່າງຝ່າຍກໍເຫັນດີຫຼີກລ້ຽງການເກີດການປະທະກັນດ້ວຍອາວຸດອີກ.
