ລາຄາອາຫານສູງຂຶ້ນອີກເຮັດໃຫ້ທົ່ວໂລກເປັນຫ່ວງນຳການຄ້ຳປະກັນດ້ານສະບຽງອາຫານ
(GMT+08:00) 2011-02-24 16:12:12 cri
ປະຈຸບັນ, ລາຄາສະບຽງອາຫານທີ່ກຳລັງຖີບສູງຂຶ້ນ ເຮັດໃຫ້ຄົນນັບບໍ່ຖ້ວນເປັນຫ່ວງນຳ. ຫວ່າງມໍ່ໆນີ້, ຜູ້ຊ່ຽວຊານຂອງອົງການອາຫານໂລກຮຽກຮ້ອງວ່າ, ຕ້ອງເພີ່ມຄວາມລະມັດລະວັງ, ເພີ່ມທະວີການຮ່ວມມືສາກົນ.
ຕົວເລກຫຼ້າສຸດທີ່ອົງການຟາວສະຫະປະຊາຊາດປະກາດໃນຕົ້ນເດືອນກຸມພານີ້ສະແດງໃຫ້ເຫັນວ່າ, ຕົວເລກດັດຊະນີລາຄາອາຫານທົ່ວໂລກສູງຂຶ້ນໃນ 7 ເດືອນລຽນຕິດ, ແລະໃນເດືອນມັງກອນປີນີ້, ໄດ້ຂຶ້ນຮອດຈຸດສູງສຸດໃນປະຫວັດສາດ. ລາຄາສະບຽງອາຫານສາກົນສູງຂຶ້ນຢ່າງບໍ່ຢຸດຢັ້ງ, "ຜູ້ຖືກກະທົບ" ໂດຍກົງກໍ່ແມ່ນປະເທດທຸກຍາກ ທີ່ລາຍຈ່າຍດ້ານອາຫານກວມອັດຕາລາຍຈ່າຍຂອງປະຊາຊົນອ່າວສູງ. ຕາມຕົວເລກສະຖິຕິຂອງທະນາຄານໂລກ, ນັບແຕ່ເດືອນມິຖຸນາປີ 2010 ເປັນຕົ້ນມາ, ລາຄາສະບຽງອາຫານໂລກສູງຂຶ້ນ, ເຮັດໃຫ້ປະເທດທີ່ພວມພັດທະນາມີປະຊາຊົນ 44 ລ້ານຄົນຕົກຢູ່ໃນສະພາບທຸກຍາກ. ທ່ານອັບໂດເຣຊາ ອັບບາຊຽນ, ຜູ້ຊ່ຽວຊານອົງການຟາວຂອງຊີ້ອອກວ່າ:
"ປະຈຸບັນ, ທົ່ວໂລກມີ 80 ກວ່າປະເທດແມ່ນປະເທດທີ່ມີລາຍຮັບຕ່ຳແລະຂາດສະບຽງອາຫານ, ເວົ້າສຳລັບ 30 ກວ່າປະເທດທີ່ທຸກຍາກແລ້ວ, ສືບຕໍ່ນຳເຂົ້າສະບຽງອາຫານຈາກຕະຫຼາດສະບຽງອາຫານໂລກດ້ວຍລາຄາສູງຄືລະດັບໃນປະຈຸບັນ, ແນ່ນອນແມ່ນຄວາມກົດດັນທີ່ໜັກໜ່ວງ. ນີ້ບໍ່ແມ່ນພຽງແຕ່ສະພາບການດ້ານລົບເທົ່ານັ້ນ, ຫາກແມ່ນຂີດອັນຕະລາຍທີ່ສຸດແລ້ວ."
ຜູ້ຊ່ຽວຊານເຫັນວ່າ, ສາເຫດທີ່ພາໃຫ້ລາຄາສະບຽງອາຫານສູງຂຶ້ນເທື່ອນີ້ສັບສົນຫຼາຍ. ສາເຫດໂດຍກົງແມ່ນ ໃນຫຼາຍເດືອນມານີ້, ຫຼາຍປະເທດໃຫຍ່ດ້ານກະສິກຳເກີດໄພທຳມະຊາດຮ້າຍແຮງຫຼາຍເທື່ອ ໄດ້ກະທົບເຖິງການຜະລິດແລະການສົ່ງອອກ, ນອກນີ້, ຄວາມຕ້ອງການດ້ານສະບຽງອາຫານກໍເພີ່ມຂຶ້ນ. ສ່ວນເງິນໂດລາອ່ອນຄ່າລົງຢ່າງຕໍ່ເນື່ອງເຊິ່ງເຮັດໃຫ້ລາຄາສະບຽງອາຫານສູງຂຶ້ນ. ທ່ານຮາເຟສ ກາເນມ ຜູ້ຊ່ວຍຜູ້ອຳນວຍການໃຫຍ່ຂອງອົງການຟາວເຫັນວ່າ, ເຖິງວ່າຍັງເວົ້າບໍ່ໄດ້ວ່າວິກິດການດ້ານສະບຽງອາຫານຮອບໃໝ່ຈະເກີດຂຶ້ນໃນບໍ່ດົນຂ້າງໜ້ານີ້, ແຕ່ກໍ່ຕ້ອງລະວັງບໍ່ໃຫ້ການສະໜອງສະບຽງອາຫານຖືກກະໝໍ່າອີກ.
ທ່ານເວົ້າວ່າ: "ຖ້າພວກເຮົາບໍ່ມີຜົນຜະລິດກະສິກຳທີ່ສາມາດຕອບສະຫນອງຄວາມຕ້ອງການໄດ້ຢ່າງພຽງພໍໃນປີ2011, ຄວາມປອດໄພດ້ານສະບຽງອາຫານຈະຂ້ຽວຂາດຫລາຍ. ພວກເຮົາຮູ້ດີແລ້ວວ່າ, ປະຊາກອນກຳລັງເພີ່ມຂຶ້ນຢ່າງຕໍ່ເນື່ອງ. ຕາມຄາດຄະເນວ່າ, ໃນ10ປີຂ້າງຫນ້າ, ການຜະລິດສະບຽງອາຫານຕ້ອງເພີ່ມຂຶ້ນ70%ເມື່ອທຽບກັບປັດຈຸບັນ, ຈຶ່ງສາມາດຕອບສະຫນອງຕາມຄວາມຕ້ອງການໄດ້. ເພື່ອແກ້ໄຂບັນຫານີ້, ປະຊາຄົມໂລກແລະປະເທດຕ່າງໆຕ້ອງພະຍາຍາມຮ່ວມກັນ."
ຜູ້ຊ່ຽວຊ່ານເຫັນວ່າ, ການເພີ່ມທະວີການສະຫນອງສະບຽງອາຫານຕ້ອງການໃຫ້ລັດຖະບານປະເທດຕ່າງໆທົ່ວໂລກເພີ່ມທະວີການຮ່ວມມື. ກ່ອນອື່ນ, ລັດຖະບານຕ້ອງເອົາໃຈໃສ່ນຳການພັດທະນາກະສິກຳ, ເພີ່ມງົບ ປະມານດ້ານກະສິກຳ, ຍົກສູງກຳລັງການຜະລິດດ້ານກະສິກຳ. ນອກນີ້, ປະຊາຄົມໂລກຕ້ອງເພີ່ມທະວີການປະສານງານ, ປະເທດທີ່ພັດທະນາແລ້ວ, ອົງການຈັດຕັ້ງສາກົນແລະອົງການຈັດຕັ້ງທີ່ບໍ່ຂຶ້ນກັບລັດຖະບານກໍຄວນນຳໃຊ້ມາດຕະການອັນຕັ້ງຫນ້າ, ເພື່ອຊ່ວຍເຫລືອປະເທດທຸກຍາກຍົກສູງສະມັດຕະພາບການຜະລິດກະສິກຳໂດຍພື້ນຖານ, ຕົວຢ່າງເຊັ່ນ: ແຜນການຊ່ວຍເຫລືອຫລັງວິກິດການທີ່ດຳເນີນໂດຍອົງການສະບຽງອາຫານຟາວໃນໄລຍະບໍ່ດົນມານີ້, ທ່ານເນວ ມາສແລັນ, ຜູ້ຊ່ຽວຊ່ານທີ່ຮັບຜິດຊອບໂຄງການດັ່ງກ່າວອະທິບາຍວ່າ:
"ຫລາຍປີຜ່ານມາ, ການຮັບມືກັບວິກິດການດ້ານສະບຽງອາຫານຂອງປະຊາຄົມໂລກພຽງແຕ່ແມ່ນການສະຫນອງສະບຽງອາຫານ, ຫລືແນວພັນແລະເຄື່ອງມືເທົ່ານັ້ນ. ແຕ່ດຽວນີ້, ພວກເຮົາເຫັນວ່າ, ອາດຈະມີທາງເລືອກແລະວິທີທີ່ເໝາະສົມກວ່ານີ້ອີກ. ເຊັ່ນ: ໂຄງການຊ່ວຍເຫລືອໄຮຕີ, ຊາວກະສິກອນຢູ່ເຂດຫ່າງໄກສອກຫລີກໄດ້ເສຍທີ່ດິນແລະສິ່ງອື່ນໆທີ່ຕ້ອງອາໄສໃນການດຳລົງຊີວິດໃນແຜ່ນດິນໄຫວ, ແລ້ວກໍບໍ່ມີລາຍໄດ້. ນີ້ໄດ້ກາຍຂອບເຂດຂອງການແກ້ໄຂວິກິດການແລ້ວ, ຈະຕ້ອງສະຫນອງການສະຫນັບສະຫນູນຈາກກົກຮາກ."
