ໜັງສືພິມ CPV ອອນໄລ ຫວຽດນາມລາຍງານວ່າ, ຫວ່າງແລ້ວນີ້, ທ່ານຮວາງຈຸງຮາຍ, ຮອງນາຍົກລັດຖະມົນຕີຫວຽດນາມໄດ້ຮຽກໄຂກອງປະຊຸມປຶກສາຫາລືກ່ຽວກັບກົນໄກຊຸກຍູ້ການພັດທະນາອຸດສາຫະກຳຜະລິດໄຟຟ້າດ້ວຍແຮງລົມຫວຽດນາມ ທີ່ມີກະຊວງ ຄະນະກຳມະການທຽບເທົ່າທີ່ກ່ຽວຂ້ອງ ແລະ ກຸ່ມບໍລິສັດຕ່າງໆຂອງຫວຽດນາມເຂົ້າຮ່ວມ, ທ່ານຮຽກຮ້ອງໃຫ້ກະຊວງອຸດສາຫະກຳການຄ້າຫວຽດນາມຂໍຄວາມເຫັນນຳກະຊວງ ຄະນະກຳມະການທຽບເທົ່າທີ່ກ່ຽວຂ້ອງ, ແລ້ວຍື່ນໃຫ້ລັດຖະບານຄົ້ນຄວ້າອະນຸມັດ.
ໃນຮ່າງກົນໄກຊຸກຍູ້ການພັດທະນາອຸດສາຫະກຳຜະລິດໄຟຟ້າດ້ວຍແຮງລົມຫວຽດນາມສະບັບທີ 4 ໄດ້ກຳນົດຢ່າງຊັດເຈນຕໍ່ນັກລົງທຶນທີ່ດຳເນີນໂຄງການໄຟຟ້າແຮງລົມ ເຊັ່ນ: ຄວາມຮັບຜິດຊອບໃນການຊື້ໄຟຟ້າແຮງລົມ, ນະໂຍບາຍພິເສດດ້ານອາກອນ ແລະ ດ້ານສຳປະທານທີ່ດິນ, ການເກື້ອກູນລາຄາໄຟຟ້າເປັນຕົ້ນ.
ປັດຈຸບັນ, ໃນທົ່ວປະເທດຫວຽດນາມມີໂຄງການໄຟຟ້າແຮງລົມ 21 ໂຄງການ, ຂະໜາດຜະລິດໄຟຟ້າດ້ວຍແຮງລົມຕາມການອອກແບບແມ່ນປະມານ 2000 ເມກາວັດ.
