ການຢ້ຽມຢາມຍີ່ປຸ່ນຂອງທ່ານເວີ່ນເຈ່ຍປາວເປັນການຢ້ຽມຢາມເພື່ອການຮ່ວມມືທີ່ສົ່ງຕໍ່ຄວາມໝັ້ນໃຈແລະກຳລັງໃຈ
(GMT+08:00) 2011-05-23 14:26:15 cri
ສະບາຍດີທ່ານຜູ່ຟັງທີ່ໂຄລົບ,ຍິນດີຕ້ອນຮັບທ່ານເຂົ້າສູ່ຄໍລຳ"CRIເຈາະຂ່າວ".ແຕ່ວັນທີ 21ຫາວັນທີ22ພຶດສະພານີ້,ທ່ານເວີ່ນເຈ່ຍປາວ,ນາຍົກລັດຖະມົນຕີຈີນໄດ້ໄປເຂົ້າຮ່ວມກອງປະຊຸມຜູ່ນຳຈີນ,ຍີ່ປຸ່ນ,ສ.ເກົາຫຼີຄັ້ງທີ4ທີ່ຈັດຂຶ້ນຢູ່ນະຄອນຫຼວງໂຕກຽວຂອງຍີ່ປຸ່ນ,ແລະເດີນທາງໄປເມືອງນາໂຕຣິແຂວງມິຢະກິແລະເມືອງຟູຄູຊິມະຂອງແຂວງຟູຄູຊິມະເພື່ອຢື້ຢາມຖາມຂ່າວປະຊາຊົນຜູ່ປະສົບໄພ.ໃນລາຍການ"CRIເຈາະຂ່າວ"ມື້ນີ້,ຈັນສຸກຈະຫວນຄືນແລະວິເຄາະການຢ້ຽມຢາມເທື່ອນີ້ຂອງທ່ານເວີ່ນເຈ່ຍປາວ.
ການຢ້ຽມຢາມເທື່ອນີ້ຂອງທ່ານນາຍົກເວີ່ນເຈ່ຍປາວແມ່ນດຳເນີນຢູ່ໃນສະພາບການພິເສດທີ່ຍີ່ປຸ່ນເກີດໄພແຜ່ນດິນໄຫວຮຸນແຮງແລະຄື້ນຊຶນະມິຕາມມາ.ໃນສອງວັນອັນສັ້ນໆ,ທ່ານເວີ່ນເຈ່ຍປາວໄດ້ເຂົ້າຮ່ວມກອງປະຊຸມຜູ່ນຳຈີນ,ຍີ່ປຸ່ນ,ສ.ເກົາຫຼີ,ຢ້ຽມຢາມເຂດປະສົບໄພສອງແຫ່ງ,ແລະພົບປະກັບຜູ່ນຳຍີ່ປຸ່ນແລະຜູ່ນຳສ.ເກົາຫຼີ,ຍັງໄດ້ແລກປ່ຽນຄວາມເຫັນຢ່າງກົງໄປກົງມາກັບບຸກຄົນວົງການອຸດສາຫະກຳການຄ້າ,ສື່ມວນຊົນຂອງສາມປະເທດແລະປະຊາຊົນວົງການຕ່າງໆຂອງຍີ່ປຸ່ນ.
ໃນກອງປະຊຸມຜູ່ນຳຈີນ,ຍີ່ປຸ່ນ,ສ.ເກົາຫຼີ,ທ່ານເວີ່ນເຈ່ຍປາວໄດ້ສະເໜີຂໍ້ສະເໜີກ່ຽວກັບການຮ່ວມມືລະຫວ່າງສາມປະເທດ,ຄື:ຕັ້ງໜ້າສະໜັບສະໜູນວຽກງານສ້າງສາຄືນໃໝ່ຫຼັງໄພຂອງຍີ່ປຸ່ນ,ເອົາໃຈໃສ່ໃນລະດັບສູງຕໍ່ຄວາມປອດໄພຂອງພະລັງງານໄຟຟ້ານິວເຄຼຍ,ສ້າງກົນໄກແລກປ່ຽນແລະຮ່ວມມືດ້ານຄວາມປອດໄພຂອງພະລັງງານໄຟຟ້ານິວເຄຼຍຂອງ ຈີນ,ຍີ່ປຸ່ນແລະສ.ເກົາຫຼີ;ຊຸກຍູ້ການຮ່ວມມືດ້ານການປ້ອງກັນແລະຫຼຸດໄພທຳມະຊາດຢ່າງແທ້ຈິງ,ຈັດກອງປະຊຸມຄົ້ນຄວ້າຫາລືໄພແຜ່ນດິນໄຫວອາຊີຕາເວັນອອກໃນ6ເດືອນທ້າຍປີນີ້,ຈີນຈະລົງທຶນເປີດໂຄງການຄົ້ນຄວ້າແຜ່ນດິນໄຫວ,ຄື້ນຊຶນະມິແລະພູໄຟຂອງອາຊີຕາເວັນອອກສຽງເໜືອ;ຊຸກຍູ້ການຄ້າການລົງທຶນໃຫ້ເສລີກວ່າເກົ່າແລະສະດວກກວ່າເກົ່າ,ຊຸກຍູ້ການສ້າງສາເສດຖະກິດຂອງພາກພື້ນໃຫ້ເຊື່ອມໂຍງເຂົ້າກັນ,ພະຍາຍາມເລີ່ມຕົ້ນ ການເຈລະຈາກ່ຽວກັບເຂດການຄ້າເສລີຂອງສາມປະເທດໃນປີໜ້າ,ພະຍາຍາມສຳເລັດການເຈລະຈາກ່ຽວກັບສັນຍາການລົງທຶນຂອງສາມປະເທດພາຍໃນປີນີ້;ເພີ່ມທະວີການຮ່ວມມືດ້ານພະລັງງານໝູນວຽນແລະເຕັກນິກປະຢັດພະລັງງານ,ສ້າງຕັ້ງ"ພັນທະມິດການຜະລິດ,ຮ່ຳຮຽນ,ຄົ້ນຄວ້າແລະປະດິດສ້າງພະລັງງານໝູນວຽນ"ຂອງຈີນ,ຍີ່ປຸ່ນ,ສ.ເກົາຫຼີ;ເລັ່ງລັດສ້າງຕັ້ງສູນແບບຢ່າງເສດຖະກິດໝູນວຽນຂອງສາມປະເທດ;ເພີ່ມທະວີການແລກ ປ່ຽນດ້ານສັງຄົມແລະວັດທະນະທຳ,ພະຍາຍາມບັນລຸເປົ້າໝາຍທີ່ຮອດປີ2015,ຈຳນວນຄົນທີ່ໄປມາຫາສູ່ກັນຂອງສາມປະເທດມີເຖິງ26ລ້ານຄົນ,ຊຸກຍູ້ຄວາມເຂົ້າໃຈກັນແລະມິດ ຕະພາບລະຫວ່າງປະຊາຊົນ,ໂດຍສະເພາະແມ່ນຊາວໜຸ່ມຂອງສາມປະເທດ.
ຂໍ້ສະເໜີຂອງທ່ານເວີ່ນເຈ່ຍປາວໄດ້ຮັບຄວາມເຫັນດີເຫັນພ້ອມຈາກຜູ່ນຳຍີ່ປຸ່ນແລະສ.ເກົາ ຫຼີ.ກອງປະຊຸມປະກາດສ້າງຕັ້ງກອງເລຂາການຮ່ວມມືຈີນ,ຍີ່ປຸ່ນ,ສ.ເກົາຫຼີ,ເຫັນດີຈັດການປຶກສາຫາລືກ່ຽວກັບນະໂຍບາຍຂອງອາຊີປະຈຳປີຂອງສາມປະເທດ.ຫຼັງກອງປະຊຸມ,ຍັງໄດ້ປະກາດ"ຖະແຫຼງການກອງປະຊຸມຜູ່ນຳຈີນ,ຍີ່ປຸ່ນ,ສ.ເກົາຫຼີຄັ້ງທີ4",ພ້ອມດ້ວຍເອກະສານໝາກຜົນຕ່າງໆກ່ຽວກັບການເພີ່ມທະວີການຮ່ວມມືດ້ານການຄຸ້ມຄອງໄພທຳມະຊາດ,ການຮ່ວມມືດ້ານຄວາມປອດໄພນິວເຄຼຍ,ແລະການຮ່ວມມືດ້ານພະລັງງານໝູນວຽນແລະປະສິດທິພາບການນຳໃຊ້ພະລັງງານ.
ໃນເວລາພົບປະທ່ານນາໂອໂຕ ຄານ,ນາຍົກລັດຖະມົນຕີຍີ່ປຸ່ນ,ທ່ານເວີ່ນເຈ່ຍປາວກ່າວວ່າ, ຈີນຍິນດີສົ່ງຄະນະສຳຫຼວດການສ້າງສາຄືນໃໝ່ຫຼັງໄພແລະຄະນະຜູ່ແທນການຄ້າການລົງທຶນມາຍີ່ປຸ່ນ,ຟື້ນຟູແລະເປີດກວ້າງການແລກປ່ຽນດ້ານການທ່ອງທ່ຽວລະຫວ່າງຈີນກັບຍີ່ປຸ່ນ,ປັບປຸງມາດຕະການຈຳກັດທີ່ມີຕໍ່ການນຳເຂົ້າອາຫານຍີ່ປຸ່ນໃນປະຖົມປັດໄຈທີ່ຮັບປະກັນຄວາມປອດໄພ.ທ່ານນາໂອໂຕ ຄານໄດ້ໃຫ້ຄຳອະທິບາຍອີກເທື່ອໜຶ່ງຕໍ່ການຮັບມືກັບອຸປະຕິເຫດໂຮງໄຟຟ້ານິວເຄຼຍຟູຄູຊິມະຂອງຍີ່ປຸ່ນ,ທ່ານກ່າວວ່າ,ຍີ່ປຸ່ນຈະຮັບມືກັບເຫດ ການນີ້ຈົນສຸດຄວາມສາມາດ,ແຈ້ງຂ່າວຄາວທີ່ຈະແຈ້ງໃຫ້ຝ່າຍຈີນຊາບຢ່າງທັນການ,ແລະເພີ່ມການຮ່ວມມືກັບຈີນໃນຂົງເຂດຄວາມປອດໄພຂອງພະລັງງານນິວເຄຼຍ.
ໃນໄລຍະຢູ່ຍີ່ປຸ່ນ,ທ່ານເວີ່ນເຈ່ຍປາວຍັງໄດ້ພົບກັບທ່ານຫີຼມຽງບັກ,ປະທານາທິບໍດີສ.ເກົາ ຫຼີ.ທ່ານເວີ່ນເຈ່ຍປາວກ່າວເນັ້ນວ່າ,ຈີນເອົາໃຈໃສ່ໃນລະດັບສູງຕໍ່ການພົວພັນຈີນສ.ເກົາຫຼີ,ສະເໜີໃຫ້ສອງປະເທດເພີ່ມການແລກປ່ຽນຄວາມເຫັນລະຫວ່າງຜູ່ນຳຂັ້ນສູງ,ເພີ່ມຄວາມໄວ້ເນື້ອເຊື່ອໃຈກັນດ້ານການເມືອງແລະຍຸດທະສາດ,ຮ່ວມກັນຮັບມືກັບການທ້າທາຍ,ຊຸກຍູ້ສັນຕິພາບ,ສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນກໍຄືຂອງໂລກ. ທ່ານຫຼີມຽງບັກກ່າວວ່າ,ສ.ເກົາຫຼີຍ້ອງຍໍສັນລະເສີນບົດບາດອັນຕັ້ງໜ້າຂອງຈີນໃນການປົກປັກຮັກສາສັນຕິພາບຂອງແຫຼມເກົາຫຼີ,ຍິນດີສືບຕໍ່ຮັກສາການແລກປ່ຽນຄວາມເຫັນແລະຮ່ວມມືກັນຢ່າງໃກ້ຊິດກັບຈີນ.
ທ່ານຢາງເຈຊື,ລັດຖະມົນຕີວ່າການກະຊວງການຕ່າງປະເທດຈີນທີ່ໄປຢ້ຽມຢາມຍີ່ປຸ່ນພ້ອມກັບທ່ານນາຍົກເວີ່ນເຈ່ຍປາວໄດ້ຕີລາຄາການຢ້ຽມຢາມເທື່ອນີ້ວ່າ,ການຢ້ຽມຢາມເທື່ອນີ້ແມ່ນການຢ້ຽມຢາມເພື່ອການຮ່ວມມືທີ່ສົ່ງຕໍ່ຄວາມໝັ້ນໃຈແລະກຳລັງໃຈ,ການຢ້ຽມຢາມເທື່ອນີ້ຕິດແທດຕົວຈິງແລະມີປະສິດທິພາບສູງ,ແລະໄດ້ຮັບໝາກຜົນອັນອຸດົມສົມບູນ.
