ໂສມໜ້າໃໝ່ຂອງລັດຖະບານໃໝ່ມຽນມາວາງສະແດງ
(GMT+08:00) 2011-05-26 16:02:10 cri
ສະບາຍດີທ່ານຜູ່ຟັງທີ່ໂຄລົບ.ແຕ່ວັນທີ26ພຶດສະພານີ້,ທ່ານເທັນເຊັນ,ປະທານາທິບໍດີມຽນມາເລີ່ມຢ້ຽມຢາມຈີນທາງລັດຖະກິດເປັນເວລາ3ວັນ.ນັບແຕ່ທ່ານເທັນເຊັນສາບານຕົວຂຶ້ນຮັບຕຳແໜ່ງໃນວັນທີ30ມີນາແລ້ວນີ້ເປັນຕົ້ນມາ,ໄດ້ປະຕິບັດນະໂຍບາຍໃໝ່ຈຳນວນໜຶ່ງ,ອັນໄດ້ຮັບການຕີລາຄາຢ່າງຕັ້ງໜ້າ.ໃນລາຍການCRIເຈາະຂ່າວມື້ນີ້,ພວກເຮົາໄດ້ສຳພາດທ່ານຊົ້ງຊິ່ງຣຸ້ນ,ນັກວິຊາການບັນຫາອາຊຽນຂອງສະຖາບັນຄົ້ນຄວ້າການພົວພັນສາກົນຍຸກປະຈຸບັນຂອງຈີນກ່ຽວກັບລັດຖະບານໃໝ່ຂອງມຽນມາ.
ກ່ອນອື່ນ,ທ່ານຊົ້ງຊິ່ງຣຸ້ນໄດ້ກ່າວເຖິງການຢ້ຽມຢາມຈີນຂອງທ່ານເທັນເຊັນ.
ທ່ານກ່າວວ່າ:"ຈີນແມ່ນປະເທດທຳອິດທີ່ຢູ່ນອກເຂດອາຊີອາຄະເນປະເທດທີ່ທ່ານເທັນເຊັນໄປຢ້ຽມຢາມທາງລັດຖະກິດພາຍຫຼັງຂຶ້ນຮັບຕຳແໜ່ງເປັນປະທານາທິບໍດີແລ້ວ,ເຊິ່ງໄດ້ສະແດງໃຫ້ເຫັນຄວາມເອົາໃຈໃສ່ໃນລະດັບສູງຂອງທ່ານທີ່ມີຕໍ່ການພົວພັນມຽນມາຈີນ.ພວກເຮົາຮູ້ວ່າ,61ປີແຫ່ງການສ້າງຕັ້ງສາຍພົວພັນທາງການທູດຈີນມຽນມາໄດ້ຢືນຢັນວ່າ,ຜູ່ນຳຂັ້ນສູງຢ້ຽມ ຢາມເຊິ່ງກັນແລະກັນແລະຮັກສາການຕິດຕໍ່ພົວພັນກັນເປັນປົກກະຕິແມ່ນສິ່ງສຳຄັນທີ່ຮັບປະກັນໃຫ້ການພົວພັນຂອງສອງປະເທດສາມາດຜ່ານການທົດສອບຂອງການປ່ຽນແປງສະພາບການສາກົນແລະມີການຂະຫຍາຍຕົວຢ່າງໝັ້ນທ່ຽງ.ສັງເກດຈາກສະພາບປະຈຸບັນນີ້,ລັດຖະບານຈີນແລະລັດຖະບານໃໝ່ຂອງມຽນມາໄດ້ມີການຕິດຕໍ່ພົວພັນກັນທີ່ດີກວ່າເກົ່າ,ການພົວພັນຖ້ານຍາດພີ່ນ້ອງລະຫວ່າງສອງປະເທດຈະນັບມື້ນັບສະໜິດແໜ້ນ."
ທ່ານຊົ້ງຊິ່ງຣຸ້ນໄດ້ຕີລາຄາຢ່າງຕັ້ງໜ້າຕໍ່ນະໂຍບາຍການຕ່າງປະເທດຂອງລັດຖະບານໃໝ່ມຽນມາ.ທ່ານກ່າວວ່າ:"ທ່ານເທັນເຊັນນຳພາຄະນະໄປເຂົ້າຮ່ວມກອງປະຊຸມສຸດຍອດອາຊຽນໃນວັນທີ7ແລະວັນທີ8ພຶດສະພານີ້ເພື່ອສະແດງໃຫ້ເຫັນໂສມໜ້າຂອງລັດຖະບານໃໝ່ທີ່ເລືອກຕັ້ງໂດຍປະຊາຊົນ,ໄດ້ຮັບການສະໜັບສະໜູນຫຼາຍກວ່າເກົ່າຈາກປະເທດອາຊຽນ. ລັດຖະບານໃໝ່ຂອງມຽນມາຍັງໄດ້ເຊື້ອເຊີນທ່ານໂຈເຊັຟ ຢຸນ,ຮອງຜູ່ຊ່ວຍລັດຖະມົນຕີວ່າ ການກະຊວງການຕ່າງປະເທດອາເມລິກາມາຢ້ຽມຢາມມຽນມາແຕ່ວັນທີ18ຫາວັນທີ21ພຶດ ສະພານີ້,ເພື່ອເພີ່ມການສຳຜັດກັບອາເມລິກາແລະຫຼຸດຜ່ອນແຮງກົດດັນທີ່ໄດ້ຮັບຈາກອາເມລິກາ."
ໃນທີ່ສຸດ,ທ່ານຊົ້ງຊິ່ງຣຸ້ນຍັງໄດ້ຕີລາຄາໂດຍລວມກ່ຽວກັບມາດຕະການຕ່າງໆທີ່ລັດຖະ ບານໃໝ່ຂອງມຽນມາໄດ້ນຳໃຊ້ຢູ່ພາຍໃນປະເທດ.ທ່ານເຫັນວ່າ,ມາດຕະການເຫຼົ່ານີ້ຈະຊຸກຍູ້ການພັດທະນາແລະຂະບວນການປອງດອງຊາດຂອງມຽນມາ,ແລະໄດ້ຮັບສຽງສະໜັບສະໜູນຈາກປະຊາຊົນ.
ທ່ານກ່າວວ່າ:"ໃນດ້ານເສດຖະກິດ,ລັດຖະບານມຽນມາໄດ້ສ້າງຕັ້ງເຂດເສດຖະກິດພິເສດແຫ່ງທຳອິດ.ລັດຖະບານໃໝ່ຂອງມຽນມາຍັງຈະດັດແກ້ກົດໝາຍດ້ານເສດຖະກິດແລະການຄ້າກັບຕ່າງປະເທດ,ດຶງດູດທຶນຈາກຕ່າງປະເທດຫຼາຍກວ່າເກົ່າ.ໃນດ້ານການເມືອງ,ໃນເວລາກ່າວຄຳປາໄສຂຶ້ນຮັບຕຳແໜ່ງໃນວັນທີ30ມີນາຜ່ານມານີ້,ທ່ານເທັນເຊັນຮຽກ ຮ້ອງໃຫ້ບັນດາເຜົ່າເພີ່ມຄວາມສາມັກຄີ,ຮ່ວມມືກັນສ້າງສາປະເທດປະຊາທິປະໄຕແບບທັນສະໄໝໃໝ່.ຕໍ່ມາ,"ກອງທັບປະສົມລັດວາ"ທີ່ເປັນກອງປະກອບອາວຸດຂອງຊົນເຜົ່າສ່ວນໜ້ອຍທີ່ມີອິດທິພົນທີ່ສຸດຂອງມຽນມາກ່າວວ່າ,ຊົມເຊີຍຄຳປາໄສທີ່ມີຄວາມໝາຍປອງດອງຊາດຂອງປະທານາທິບໍດີ,ຍິນດີຊຸກຍູ້ຂະບວນການປອງດອງຊາດ."
ທ່ານຊົ້ງຊິ່ງຣຸ້ນສະຫຼຸບວ່າ,ອາດເວົ້າໄດ້ວ່າ,ລັດຖະບານໃໝ່ຂອງມຽນມາສະແດງໃຫ້ເຫັນ ໂສມໜ້າອັນດີງາມທີ່ເປັນລັດຖະບານທີ່ເລືອກຕັ້ງໂດຍປະຊາຊົນ.
