ຈີນຈະສ້າງກົນໄກຮ່ວມມືດ້ານການລົງທຶນພື້ນຖານໂຄງລ່າງກັບຫຼາຍປະເທດ
(GMT+08:00) 2011-05-27 14:37:23 cri
ວັນທີ26ພຶດ ສະພານີ້,ເວທີປຶກສາຫາລືດ້ານການລົງທຶນແລະກໍ່ສ້າງພື້ນຖານໂຄງລ່າງສາກົນຄັ້ງທີ2ໄດ້ ໄຂຂຶ້ນຢູ່ທີ່ປັກກິ່ງ.ຫົວຂໍ້ຂອງເວທີປຶກສາຫາລືຄັ້ງນີ້ແມ່ນ:"ການຮ່ວມມືດ້ານການລົງທຶນຊຸກຍູ້ການພັດທະນາແບບຍືນຍົງຂອງພື້ນຖານໂຄງລ່າງ".860ກວ່າຄົນທີ່ມາຈາກ46ປະເທດແລະເຂດແຄ້ວນ,ເຊັ່ນ:ຈີນ,ຟິລິບປິນ,ອິນໂດເນເຊຍ,ແມັກຊິກແລະຣັດເຊຍເປັນຕົ້ນໄດ້ເຂົ້າຮ່ວມເວທີປຶກສາຫາລືຄັ້ງນີ້.ເຂົາເຈົ້າແມ່ນມາຈາກດ້ານຕ່າງໆທີ່ເຂົ້າຮ່ວມການລົງທຶນແລະກໍ່ສ້າງພື້ນຖານໂຄງລ່າງ,ເປັນຕົ້ນວ່າ:ລັດຖະບານ,ອົງການຈັດຕັ້ງຂະແໜງການ,ອົງການທະນາຄານ,ບໍລິສັດລົງທຶນ,ບໍລິສັດຮັບເໝົາ,ບໍລິສັດສະໜອງເຄື່ອງອຸປະກອນແລະບໍລິສັດໃຫ້ຄຳປຶກສາດ້ານການອອກແບບ.
ໃນເວລາເຂົ້າຮ່ວມເວທີປຶກສາຫາລື,ທ່ານນີເຈຍທີ,ຮອງຫົວໜ້າກົມລົງທຶນແລະຮ່ວມມືດ້ານເສດຖະກິດກັບຕ່າງປະເທດຂອງກະຊວງການຄ້າຈີນກ່າວວ່າ:"ປະຈຸບັນນີ້,ຈີນໄດ້ເຊັນສັນ ຍາກ່ຽວກັບການເພີ່ມທະວີການຮ່ວມມືດ້ານພື້ນຖານໂຄງລ່າງກັບ10ກວ່າປະເທດຂອງໂລກ,ແລະໄດ້ສ້າງກົນໄກເຮັດວຽກ,ແລກປ່ຽນຄວາມເຫັນເປັນປະຈຳ,ພວກເຮົາຍິນດີສ້າງກົນໄກຮ່ວມມືກັບປະເທດຫຼາຍກວ່າເກົ່າ,ເຮັດໃຫ້ການຮ່ວມມືໄດ້ຮັບໝາກຜົນ.ພ້ອມກັນນັ້ນ,ພວກເຮົາຫວັງວ່າ,ປະເທດຕ່າງໆຈະຖືທ່າທີອັນຕັ້ງໜ້າແລະເປີດປະຕູຕໍ່ການຮ່ວມມືລະຫວ່າງຊາດດ້ານພື້ນຖານໂຄງລ່າງ,ສະໜອງມາດຕະການທີ່ອຳນວຍຄວາມສະດວກໃນການກວດຄົນເຂົ້າອອກເມືອງ,ເກັບພາສີອາກອນ,ແລະແຮງງານຍຶດໝັ້ນຫຼັກການທີ່ເປີດປະຕູ,ໂປ່ງໃສແລະບໍ່ມີການຈຳແນກ,ຫຼີກເວັ້ນບໍ່ໃຫ້ບັນຫາເສດຖະກິດກາຍເປັນບັນຫາການເມືອງ,ເພື່ອຍົກສູງຄວາມໝັ້ນໃຈດ້ານການຮ່ວມມື,ແລະປົກປ້ອງຄວາມປອດໄພແລະຜົນປະໂຫຍດທີ່ຊອບດ້ວຍກົດໝາຍຂອງຜູ່ລົງທຶນ."
ໃນເວລາປະກອບຄຳຄິດຄຳເຫັນໃນເວທີປຶກສາຫາລື,ທ່ານເຮີມັນໂຕ ດາດັກ,ລັດຖະມົນຕີ ຊ່ວຍວ່າການກະຊວງໂຄງການສາທາລະນະຂອງອິນໂດເນເຊຍກ່າວວ່າ,ປະຈຸບັນນີ້,ອິນໂດເນເຊຍມີໂຄງການກໍ່ສ້າງທາງຫຼວງຈຳນວນຫຼວງຫຼາຍທີ່ຕົກເປັນມູນຄ່າເກືອບ15ຕື້ໂດ ລາ,ໃນນັ້ນມີສ່ວນໜຶ່ງກຳລັງກໍ່ສ້າງຢູ່,ອີກສ່ວນໜຶ່ງກຳລັງວາງແຜນການ,ຈີນແມ່ນຄູ່ຮ່ວມມືອັນສຳຄັນຂອງອິນໂດເນເຊຍໃນໂຄງການເຫຼົ່ານີ້.
ທ່ານກ່າວວ່າ:"ບໍລິສັດຮັບເໝົາການກໍ່ສ້າງຂອງອິນໂດເນເຊຍມີການຮ່ວມມືອັນດີງາມກັບບໍລິສັດຮັບເໝົາການກໍ່ສ້າງຂອງຈີນໃນການກໍ່ສ້າງຂົວ,ໂຄງການຂົວຊູຣາບາຢາ ມາດູຣາ ຈະຕິດຕໍ່ສອງເກາະຂອງອິນໂດເນເຊຍ.ເມື່ອໂຄງການນີ້ສ້າງສຳເລັດແລ້ວ,ລັດຖະບານໄດ້ສະເໜີໂຄງການກໍ່ສ້າງທາງຫຼວງອັນໃໝ່,ຈະເຊື້ອເຊີນຝ່າຍທີ່ສະໜອງການຊ່ວຍເຫຼືອ ຫຼື ຝ່າຍກູ້ເງິນມາສຳເລັດໂຄງການເຫຼົ່ານີ້."
ເວທີປຶກສາຫາລືກ່ຽວກັບການລົງທຶນແລະກໍ່ສ້າງພື້ນຖານໂຄງລ່າງສາກົນຄັ້ງທຳອິດແມ່ນຈັດຂຶ້ນໂດຍສະມາຄົມການຄ້າໂຄງການຮັບເໝົາກັບຕ່າງປະເທດຂອງຈີນໃນເດືອນພຶດສະພາປີ2010,ເວທີປຶກສາຫາລືນີ້ໄດ້ສ້າງເວທີວິຊາສະເພາະສາກົນໃຫ້ວິສາຫະກິດຈີນປຶກສາຫາລືການຮ່ວມມືກັບສາກົນ,ພ້ອມກັນສຸມກຳລັງເຂົ້າໃນການພັດທະນາການລົງທຶນແລະ ກໍ່ສ້າງພື້ນຖານໂຄງລ່າງສາກົນໃຫ້ຈະເລີນ.
