ຈີນເສີມຂະຫຍາຍບົດບາດລັກສະນະສ້າງສັນໃນວຽກງານພາກພື້ນ
(GMT+08:00) 2011-05-30 17:26:12 cri
ສະບາຍດີທ່ານຜູ່ຟັງທີ່ໂຄລົບ,ຍິນດີຕ້ອນຮັບທ່ານເຂົ້າສູ່ລາຍການCRIເຈາະຂ່າວ.ຈີນຈັດ ອາຊີຢູ່ໃນຖານະສຳຄັນອັນດັບໜຶ່ງໃນນະໂຍບາຍການຕ່າງປະເທດ.ໃນ6ເດືອນຕົ້ນປີນີ້,ການພົວພັນຕ່າງປະເທດກັບອາຊີຂອງຈີນມີການເລີ່ມຕົ້ນທີ່ດີແລະດຳເນີນໄປເປັນຢ່າງດີ.ແຕ່ມື້ນີ້ເປັນຕົ້ນໄປ,ພວກເຮົາຈະລາຍງານພິເສດ4ເລື່ອງກ່ຽວກັບການພົວພັນກັບອາຊີຂອງຈີນໃນປີນີ້.ມື້ນີ້ແມ່ນບົດທຳອິດທີ່ພາດຫົວເລື່ອງວ່າ"ຈີນເສີມຂະຫຍາຍບົດບາດທີ່ມີລັກສະນະສ້າງສັນໃນວຽກງານພາກພື້ນ."
ຫຼາຍມື້ກ່ອນໜ້ານີ້,ຈີນໄດ້ຕ້ອນຮັບທ່ານອູເທັນເຊັນ,ປະທານາທິບໍດີມຽນມາທີ່ຫາກໍ່ຂຶ້ນຮັບ ຕຳແໜ່ງໄດ້ມາຢ້ຽມຢາມຈີນ.ປະມຸກລັດສອງປະເທດເປັນເອກະສັນກັນເຫັນດີຍົກສູງການພົວພັນຈີນມຽນມາຂຶ້ນເປັນການພົວພັນຄູ່ຮ່ວມມືຍຸດທະສາດຮອບດ້ານ.ໃນການພົບປະເຈ ລະຈາກັບທ່ານອູເທັນເຊັນ,ທ່ານປະທານຫູຈິນທ່າວໄດ້ມີຂໍ້ສະເໜີ້4ຂໍ້ກ່ຽວກັບການຂະ ຫຍາຍການພົວພັນຈີນມຽນມາຕື່ມອີກ,ກ່າວເນັ້ນວ່າ,ຈີນໂຄລົບປະຊາຊົນມຽນມາທີ່ເລືອກເອົາເສັ້ນທາງການພັດທະນາແລະລະບອບການເມືອງຕາມທາງເລືອກຕົນເອງຕາມສະ ພາບແຫ່ງຊາດຂອງຕົນ,ສະໜັບສະໜູນລັດຖະບານໃໝ່ຂອງມຽນມາທຳຄວາມພະຍາຍາມເພື່ອປົກປັກຮັກສາສະຖຽນລະພາບທາງສັງຄົມ,ພັດທະນາເສດຖະກິດແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ.
ເມື່ອໄດ້ຢ້ຽມຢາມຈີນສອງເທື່ອໃນປີ2010ແລ້ວ,ທ່ານກິມເຈິງອິນ,ຜູ່ນຳສູງສຸດຂອງສປປເກົາຫຼີໄດ້ມາຢ້ຽມຢາມຈີນອີກເທື່ອໜຶ່ງໃນເດືອນນີ້.ເຊິ່ງແມ່ນທ່ານມາຢ້ຽມຢາມຈີນເທື່ອທີ3ພາຍໃນ12ເດືອນ.ໃນເວລາພົບປະເຈລະຈາກັບທ່ານປະທານຫູຈິນທ່າວ,ທ່ານກິມເຈິງອິນໄດ້ສົ່ງສັນຍານທີ່ຢາກຜ່ອນຄາຍສະພາບການທີ່ເຄັ່ງຕຶງຂອງແຫຼມເກົາຫຼີ,ຍຶດໝັ້ນເປົ້າ ໝາຍທີ່ເຮັດໃຫ້ແຫຼມເກົາຫຼີປອດນິວເຄຼຍ,ມີຈຸດຢືນໃຫ້ເລັ່ງລັດຈັດການເຈລະຈາຫົກຝ່າຍຄືນໃໝ່ໂດຍໄວ,ແລະມີຄວາມຈິງໃຈຕໍ່ການປັບປຸງການພົວພັນເກົາຫຼີເໜືອໃຕ້ໃຫ້ດີຂຶ້ນ. ຝ່າຍສປປເກົາຫຼີສະແດງຄວາມຂອບອົກຂອບໃຈຕໍ່ຈີນທີ່ທຳຄວາມພະຍາຍາມເພື່ອຊຸກຍູ້ການເປີດການເຈລະຈາຫົກຝ່າຍຄືນໃໝ່ແລະປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ.
ໃນຕົ້ນເດືອນນີ້,ທ່ານໂຢຊຸຟ ຣາຊາ ກິລານີ,ນາຍົກລັດຖະມົນຕີປາກີສະຖານມາຢ້ຽມຢາມຈີນ,ເຊິ່ງເປັນປະເທດທຳອິດທີ່ທ່ານໄປຢ້ຽມຢາມຢ່າງເປັນທາງການເມື່ອຂຶ້ນຮັບຕຳແໜ່ງແລ້ວ.ໃນເວລາພົບປະເຈລະຈາກັບທ່ານກິລານີ,ທ່ານປະທານຫູຈິນທ່າວກ່າວວ່າ,ຈີນຊົມເຊີຍປາກີສະຖານທີ່ທຳຄວາມພະຍາຍາມແລະປະກອບສ່ວນຢ່າງຫຼວງຫຼາຍເຂົ້າໃນການຕ້ານການກໍ່ການຮ້າຍ.ສອງຝ່າຍເຫັນດີເພີ່ມທະວີການປະສານງານໃນສາມດ້ານ,ເປັນຕົ້ນ ວ່າ:ວຽກງານພາກພື້ນ,ບັນຫາຈຸດສຸມຂອງພາກພື້ນ ເຊັ່ນ:ບັນຫາອາຟການິສະຖານເປັນ ຕົ້ນແລະການຮ່ວມມືໃນພາກພື້ນ.ທ່ານກິລານີກ່າວວ່າ:"ຈີນແມ່ນປະເທດທຳອິດທີ່ສະແດງການສະໜັບສະໜູນຕໍ່ປາກີສະຖານ,ປາກີສະຖານສະແດງຄວາມຂອບໃຈທີ່ສຸດຕໍ່ລັດຖະບານແລະຜູ່ນຳຈີນ."
ໃນ6ເດືອນຕົ້ນປີນີ້,ຈີນໄດ້ຮັກສາການໄປມາຫາສູ່ກັນເປັນປົກກະຕິກັບຜູ່ນຳລະດັບສູງຂອງປະເທດອາຊີ,ຮັກສາການແລກປ່ຽນຄຳຄິດຄຳເຫັນຢ່າງໃກ້ຊິດກ່ຽວກັບບັນຫາສຳຄັນໃນ ພາກພື້ນແລະສາກົນທີ່ສຳຄັນ,ເຊິ່ງໄດ້ສະແດງໃຫ້ເຫັນທ່າທີຂອງຈີນທີ່ເສີມຂະຫຍາຍບົດບາດຢ່າງຕັ້ງໜ້າ,ອອກແຮງບຳລຸງສ້າງສະພາບແວດລ້ອມທີ່ຢູ່ອ້ອມຂ້າງແລະຊຸກຍູ້ການສ້າງສາອາຊີທີ່ກົມກຽວກັນ.
