ເຈົ້າໜ້າທີ່ລະດັບສູງດ້ານການປ້ອງກັນປະເທດຂອງຫຼາຍປະເທດເຂົ້າຮ່ວມການສົນທະນາແຊນກຼີລາ
(GMT+08:00) 2011-06-03 16:25:16 cri
ໃນຖານະເປັນໜຶ່ງໃນກົນໄກສາກົນກ່ຽວກັບວຽກງານປ້ອງກັນແລະການຮ່ວມມືດ້ານຄວາມປອດໄພພາກພື້ນທີ່ມີຊື່ສຽງທີ່ສຸດຂອງພາກພື້ນອາຊີປາຊິຟິກ, ການສົນທະນາແຊນກຼີລາຄັ້ງທີ10ທີ່ດຳເນີນເປັນເວລາ3ວັນໄດ້ຈັດຂຶ້ນຢູ່ສິງກະໂປໃນວັນທີ3ມິຖຸນານີ້. ສະຖາບັນຄົ້ນຄວ້າຍຸດທະສາດສາກົນອັງກິດ ເຊິ່ງເປັນຝ່າຍຈັດກອງປະຊຸມເປີດເຜີຍວ່າ, ກອງປະຊຸມໃນປີນີ້ຈະມີເຈົ້າໜ້າທີ່ລະດັບສູງສຸດເຂົ້າຮ່ວມເມື່ອທຽບກັບກອງປະຊຸມໃນປີທີ່ຜ່ານມາ. ໃນນັ້ນ, ລັດຖະມົນຕີປ້ອງກັນປະເທດຂອງຈີນແລະອາເມລິກາລ້ວນແຕ່ໄດ້ມາຮ່ວມປະຊຸມ, ແລະຈະເຈລະຈາກັນໃນໄລຍະປະຊຸມ, ພາໃຫ້ຫາງສຽງໂລກສົນໃຈນຳໃນລະດັບສູງ.
ເວັບໄຊທາງການຂອງກອງປະຊຸມເປີດເຜີຍວ່າ, ກອງປະຊຸມປີນີ້ຈະມີເວທີປຶກສາຫາລືຫົວຂໍ້ສະເພາະ6ຫົວຂໍ້, ຄື: ສິ່ງທ້າທາຍໃໝ່ດ້ານຄວາມປອດໄພຂອງພາກພື້ນອາຊີປາຊີຟິກ, ທັດສະນະແລະຄວາມສາມາດໃໝ່ດ້ານການທະຫານຂອງອາຊີ, ການແຈກຢາຍແລະຄວາມໝາຍຂອງກຳລັງໃໝ່ຂອງອາຊີ, ການຮ່ວມມືດ້ານຄວາມປອດໄພກັບສາກົນຂອງຈີນ, ເຮັດແນວໃດຮັບມືກັບການຂົ່ມຂູ່ດ້ານຄວາມປອດໄພຂອງທະເລແລະສ້າງຄວາມໝັ້ນໃຈດ້ານຍຸດທະສາດ.
ນອກນີ້, ເຈົ້າໜ້າທີ່ປ້ອງກັນປະເທດລະດັບສູງຂອງປະເທດຕ່າງໆຍັງຈະຈັດການສົນທະນາພາຍໃນ5ເທື່ອ, ເພື່ອປຶກສາຫາລືງົບປະມານແລະການສ້າງສາກອງທັບຂອງປະເທດຕ່າງໆໃນພາກພື້ນອາຊີປາຊີຟິກ, ການພັດທະນາເຕັກນິກນິວເຄຼຍ, ຄວາມຂັດແຍ່ງກັນດ້ານດິນແດນ, ການທ້າທາຍດ້ານຄວາມປອດໄພຂ້າມຊາດແລະອື່ນໆ. ໃນບັນຫາພາກພື້ນທີ່ລະອຽດ, ກອງປະຊຸມຈະເນັ້ນໃສ່ສະຖານະການຄວາມມປອດໄພອາຟການິສະຖານ, ການເຈລະຈານິວເຄຼຍແຫຼມເກົາຫຼີແລະບັນຫາທະເລຈີນໃຕ້.
ອີງຕາມວາລະປະຊຸມ, ພົນເອກລຽງກ່ວງເລັຍ ລັດຖະມົນຕີປ້ອງກັນປະເທດຈີນຈະພົບປະເຈລະຈາກັບທ່ານໂຣເບີດ ເກັສ ລັດຖະມົນຕີປ້ອງກັນປະເທດອາເມລິກາ. ວັນທີ2ມິຖຸນານີ້, ທ່ານເກັສໄດ້ໃຫ້ສຳພາດວ່າ, ທ່ານພໍໃຈນຳຂະບວນການຮ່ວມມືດ້ານວຽກງານປ້ອງກັນລະຫວ່າງຈີນອາເມລິກາໃນປະຈຸບັນ, ແລະເຫັນວ່າ, ສອງປະເທດຍັງສາມາດດຳເນີນການຮ່ວມມືຫຼາຍກວ່າເກົ່າໃນຂົງເຂດນີ້.ນອກຈາກການສົນທະນາລະຫວ່າງຈີນອາເມລິກາແລ້ວ, ກຳລັງອາເມລິກາຄົງຕົວຢູ່ອາຊີຕໍ່ໄປກໍແມ່ນຈຸດສຸມຂອງກອງປະຊຸມຄັ້ງນີ້. ເຖິງວ່າທ່ານເກັສຈະອອກຈາກຕຳແໜ່ງໃນເດືອນມິຖຸນານີ້, ແຕ່ທ່ານຍັງສືບຕໍ່ໃຫ້ຄຳໝັ້ນສັນຍາແກ່ພັນທະມິດອາຊີຂອງອາເມລິກາ ໃນຖານະເປັນລັດຖະມົນຕີປ້ອງກັນປະເທດມາເຂົ້າຮ່ວມກອງປະຊຸມແຊນກຼີລາເທື່ອສຸດທ້າຍ, ທ່ານກ່າວວ່າ, ກອງທະຫານອາເມລິກາຍັງມີແຜນການຮັກສາການຄົງຕົວທີ່ເຂັ້ມແຂງຢູ່ອາຊີ.
