ປະຊາຄົມອາຊຽນຈະສ້າງຕັ້ງຂຶ້ນໃນປີ2015ຫຼືບໍ່?
(GMT+08:00) 2011-06-15 14:19:02 cri
ໜັງສືພິມຊົນຊາດໄທລາຍງານວ່າ, ຫວ່າງມໍ່ໆມານີ້, ໃນເວລາທ່ານຊຸລິນ ພິຊຸວັນ ເລຂາທິການໃຫຍ່ອາຊຽນເຂົ້າຮ່ວມກອງປະຊຸມເຜີຍແຜ່ບົດລາຍງານລັກສະນະແກ່ງແຍ່ງຂອງອາຊຽນປີ2010 ທີ່ຈັດຂຶ້ນຢູ່ສິງກະໂປ, ທ່ານກ່າວຢ່າງໜັກແໜ້ນວ່າ, ການສ້າງຕັ້ງປະຊາຄົມອາຊຽນບໍ່ມີເວລາກຳນົດຢ່າງຄັກແນ, ປີ2015ພຽງແຕ່ເປັນເປົ້າໝາຍໜຶ່ງເທົ່ານັ້ນ, ຫາກບໍ່ແມ່ນເວລາກຳນົດສຸດທ້າຍຂອງການສ້າງຕັ້ງປະຊາຄົມ. ພ້ອມກັນນັ້ນ, ທ່ານກໍກ່າວເນັ້ນວ່າ, ການສ້າງຕັ້ງປະຊາຄົມອາຊຽນຢ່າງສຳເລັດຜົນຍັງຕ້ອງການເຮັດວຽກຢ່າງຫຼວງຫຼາຍ. ສື່ມວນຊົນໄທລົງພິມບົດວິຈານເຫັນວ່າ, ຄຳເວົ້າດັ່ງກ່າວຂອງທ່ານຊຸລິນອາດຈະແມ່ນຜູ້ນຳຂັ້ນສູງຂອງອາຊຽນຮັບຮອງເປັນຄັ້ງທຳອິດວ່າ, ເປົ້າໝາຍທີ່ສ້າງປະຊາຄົມອາຊຽນສຳເລັດໃນປີ2015ໄດ້ປະສົບຄວາມຫຍຸ້ງຍາກ.
ການເຮັດໃຫ້ພາກພື້ນນີ້ເຊື່ອມໂຍງເຂົ້າກັນແມ່ນເປົ້າໝາຍທີ່ບັນດາປະເທດອາຊຽນພະຍາຍາມມາເປັນເວລາຫຼາຍປີແລ້ວ, ກໍແມ່ນເນື້ອໃນທີ່ກຳນົດໄວ້ໃນກົດບັດອາຊຽນ. ກອງປະຊຸມສຸດຍອດອາຊຽນຄັ້ງທີ9ທີ່ຈັດຂຶ້ນໃນເດືອນຕຸລາປີ2003ໄດ້ມີມະຕິຕົກລົງກ່ຽວກັບປະຊາຄົມອາຊຽນເປັນຄັ້ງທຳອິດ, ປະກາດວ່າຈະສ້າງປະຊາຄົມອາຊຽນ, ເຊິ່ງມີເນື້ອໃນ3ດ້ານ ຄື ການເມືອງແລະຄວາມໝັ້ນຄົງ, ເສດຖະກິດ, ແລະວັດທະນະທຳແລະສັງຄົມ. ແຕ່ໃນກອງປະຊຸມສຸດຍອດອາຊຽນຄັ້ງທີ12ທີ່ຈັດຂຶ້ນໃນຕົ້ນປີ2007, ຜູ້ນຳບັນດາປະເທດອາຊຽນທີ່ຮ່ວມປະຊຸມໄດ້ຕົກລົງເລັ່ງລັດຂະບວນການສ້າງສາອາຊຽນ, ວາງແຜນຈະບັນລຸເປົ້າໝາຍສ້າງປະຊາຄົມອາຊຽນສຳເລັດກ່ອນເວລາກຳນົດ5ປີ, ຄືຈະສ້າງຕັ້ງຂຶ້ນໃນປີ2015.
ແຕ່ວ່າ, ກໍມີການວິເຄາະເຫັນວ່າ, ບັນດາປະເທດອາຊຽນຢາກບັນລຸເປົ້າໝາຍດັ່ງກ່າວພາຍໃນເວລາ4ປີ ຈະບໍ່ແມ່ນເລື່ອງງ່າຍ, ເຂົາເຈົ້າຈະປະສົບຄວາມຫຍຸ້ງຍາກຕ່າງໆນາໆໃນເວລາຊຸກຍູ້ການບັນລຸເປົ້າໝາຍດັ່ງກ່າວ. ກ່ອນອື່ນ, ໂຄງປະກອບການເມືອງ, ທັດສະນະຄຸນຄ່າແລະວັດທະນະທຳສັງຄົມຂອງບັນດາປະເທດອາຊຽນມີຄວາມແຕກຕ່າງກັນຫຼາຍ, ເຮັດໃຫ້ແກ່ການປະສານງານໃນດ້ານການເມືອງແລະຄວາມໝັ້ນຄົງຫຍຸ້ງຍາກກວ່າເກົ່າ. ທີສອງການສ້າງຕະຫຼາດແລະແຫຼ່ງຜະລິດທີ່ເປັນເອກະພາບກັນ, ການດັດແປງພື້ນຖານໂຄງລ່າງຕ້ອງການເງິນທຶນຢ່າງຫຼວງຫຼາຍ, ສ່ວນທຶນຮອນບໍ່ພຽງພໍຈະເປັນປັດໄຈທີ່ຈຳກັດການເຊື່ອມໂຍງເຂົ້າກັນ. ນອກນີ້, ການປະທະກັນຢູ່ເຂດຊາຍແດນໄທກຳປູເຈຍທີ່ເກີດຂຶ້ນໃນຫວ່າງມໍ່ໆນີ້ແລະຄວາມຂັດແຍ່ງກັນຕ່າງໆລະຫວ່າງປະເທດສະມາຊິກອື່ນໆຂອງອາຊຽນກໍສະແດງໃຫ້ເຫັນວ່າ, ປະເທດຕ່າງໆຂອງອາຊຽນກໍມີຄວາມຂັດແຍ່ງກັນຫຼາຍຢ່າງທີ່ຫຼີກລ້ຽງບໍ່ໄດ້, ຖ້າຊຳລະແກ້ໄຂຄວາມຂັດແຍ່ງກັນເຫຼົ່ານີ້ບໍ່ຖືກຕ້ອງ, ອາດຈະກາຍເປັນສິ່ງອຸປະສັກຕໍ່ການເຊື່ອມໂຍງເຂົ້າກັນຂອງອາຊຽນ.
ແນ່ນອນແລ້ວ, ອາຊຽນຢາກເລັ່ງລັດຂະບວນການເຊື່ອມໂຍງເຂົ້າກັນກໍມີປັດໄຈທີ່ດີຄືກັນ. ເມື່ອສັງເກດຈາກພາຍນອກແລ້ວ, ພາຍຫຼັງສ້າງເຂດການຄ້າເສລີກັບຈີນໃນຕົ້ນປີກາຍນີ້ແລ້ວ, ການຄ້າກັບຕ່າງປະເທດຂອງບັນດາປະເທດອາຊຽນລ້ວນແຕ່ໄດ້ເພີ່ມຂຶ້ນຢ່າງຫຼວງຫຼາຍໃນລະດັບຕ່າງກັນ, ໄດ້ເພີ່ມຄວາມໝັ້ນໃຈແລະຄວາມສາມາດຂອງພາກພື້ນນີ້ເພື່ອຮັບມືກັບວິກິດການການເງິນສາກົນ, ແລະໄດ້ເພີ່ມພະລັງຊີວິດໃໝ່ໃຫ້ແກ່ເສດຖະກິດພາກພື້ນອາຊຽນ. ເມື່ອສັງເກດຈາກພາຍໃນແລ້ວເຫັນວ່າ, ປະເທດສ່ວນຫຼາຍຂອງອາຊຽນລ້ວນແຕ່ມີຄວາມຫວັງທີ່ຢາກເລັ່ງລັດຂະບວນການເຊື່ອມໂຍງເຂົ້າກັນ, ຫວັງຢາກຜ່ານຈາກການເຊື່ອມໂຍງເຂົ້າກັນເສີມຂະຫຍາຍຖານະບົດບາດຂອງອາຊຽນໃນເວທີສາກົນ. ສະນັ້ນ, ເຖິງວ່າຈະປະສົບຄວາມຫຍຸ້ງຍາກແລະສິ່ງທ້າທາຍຕ່າງໆນາໆກໍຕາມ, ແຕ່ປະເທດໃນພາກພື້ນນີ້ກໍມີຄວາມໝັ້ນໃຈຫຼາຍຕໍ່ການສ້າງສາປະຊາຄົມອາຊຽນແລະຂະບວນການເຊື່ອມໂຍງເຂົ້າກັນຂອງອາຊຽນ.
