ອົງການຮ່ວມມືຊຽງໄຮຊຸກຍູ້ການຮ່ວມມືທີ່ຕິດແທດຕົວຈິງເພື່ອຮັບມືກັບສິ່ງທ້າທາຍໃນສະໄໝໃໝ່
(GMT+08:00) 2011-06-16 14:41:43 cri
ກອງປະຊຸມສຸດຍອດອົງການຮ່ວມມືຊຽງໄຮໄດ້ຈັດຂຶ້ນຢູ່ອັສທານາ ນະຄອນຫຼວງກາຊັກສະຖານໃນວັນທີ15ມິຖຸນານີ້. ຕອນທ່ຽງວັນທີ15ມິຖຸນາ, ກ່ອນອື່ນ, ທ່ານຫູຈີນທາວ ປະທານປະເທດຈີນແລະປະມຸກລັດຂອງ5ປະເທດຄື ກາຊັກສະຖານ, ຣັດເຊຍ, ກຽກກິດສະຖານ, ຕາຊີກີສະຖານແລະອຸສເບກີສະຖານ ໄດ້ຈັດກອງປະຊຸມວົງແຄບລະຫວ່າງປະມຸກລັດປະເທດສະມາຊິກອົງການຮ່ວມມືຊຽງໄຮ. ຫຼັງຈາກນັ້ນ, ປະມຸກລັດຂອງປະເທດສະມາຊິກໄດ້ຈັດກອງປະຊຸມວົງກວ້າງກັບທ່ານມາມຸດ ອາມາດີ ເນຈັດ ປະທານາທິບໍດີອີຣານ, ທ່ານອາຊິຟ ອາລີ ຈາດາຣີ ປະທານາທິບໍດີປາກີສະຖານພ້ອມດ້ວຍຜູ້ຕາງໜ້າຂອງອີກສອງປະເທດສັງເກດການ ຄື ມົງໂກລີແລະອິນເດຍ, ທ່ານຮາມິດ ກາຈາອີ ປະທານາທິບໍດີອາຟການິສະຖານທີ່ເປັນແຂກປະເທດເຈົ້າພາບ, ຜູ້ຕາງໜ້າຂອງສະຫະປະຊາຊາດແລະອົງການຈັດຕັ້ງສາກົນອື່ນໆ.
ໃນກອງປະຊຸມວົງກວ້າງ, ກ່ອນອື່ນ, ທ່ານນາຈາບາເຢັຟ ປະທານາທິບໍດີກາຊັກສະຖານໄດ້ກຳນົດຫົວຂໍ້ຂອງກອງປະຊຸມຄັ້ງນີ້ວ່າ:
ຫົວຂໍ້ກອງປະຊຸມຄັ້ງນີ້ລວມທັງວິເຄາະແລະສະຫຼຸບໝາກຜົນທີ່ໄດ້ຮັບບົນເສັ້ນທາງພັດທະນາຂອງອົງການຮ່ວມມືຊຽງໄຮໃນ10ປີມານີ້, ແລະວາງແຜນກຳນົດທິດພັດທະນາໃນອະນາຄົດ, ພ້ອມດ້ວຍແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນ.
ພາຍຫຼັງທ່ານນາຈາບາເຢັຟຕາງໜ້າກາຊັກສະຖານປະກອບຄຳຄິດຄຳເຫັນແລ້ວ, ທ່ານໄດ້ເຊີນທ່ານຫູຈີນທາວ ປະທານປະເທດຈີນປະກອບຄຳເຫັນ. ທ່ານຫູຈີນທາວກ່າວວ່າ:
10ປີຂ້າງໜ້າແມ່ນໄລຍະຂໍກະແຈແຫ່ງການພັດທະນາຂອງອົງການຮ່ວມມືຊຽງໄຮ, ແລະສຳຄັນທີ່ສຸດສຳລັບການພັດທະນາຂອງບັນດາປະເທດສະມາຊິກແລະສະຖຽນລະພາບຂອງພາກພື້ນນີ້. ພວກເຮົາຄວນຖືຈິດໃຈຮັບຜິດຊອບໃນລະດັບສູງຕໍ່ສັນຕິພາບ, ສະຖຽນລະພາບແລະການພັດທະນາຂອງປະເທດສະມາຊິກ, ຂອງພາກພື້ນກໍຄືຂອງໂລກ, ກຳທິດຂະຫຍາຍຕົວຂອງອົງການຮ່ວມມືຊຽງໄຮຢ່າງໜັກແໜ້ນ, ອອກແຮງສຸດຂີດເພື່ອສ້າງອົງການຮ່ວມມືຊຽງໄຮເປັນອົງການຮ່ວມມືພາກພື້ນທີ່ມີກົນໄກສົມບູນ, ປະສານງານເປັນຢ່າງດີ, ຮ່ວມມືຢ່າງຮອບດ້ານ, ເປີດປະຕູແລະກົມກຽວກັນ.
ພາຍຫຼັງກອງປະຊຸມທີ່ຈັດເປັນເວລາ3ຊົ່ວໂມງສິ້ນສຸດລົງແລ້ວ, ປະມຸກລັດປະເທດສະມາຊິກອົງການຮ່ວມມືຊຽງໄຮໄດ້ລົງລາຍເຊັນໃນຄຳຖະແຫຼງການອັສທານາແລະເອກະສານອື່ນໆ.
ພາຍຫຼັງກອງປະຊຸມຄັ້ງນີ້ສິ້ນສຸດລົງແລ້ວ, ຈີນຈະເຂົ້າແທນກາຊັກສະຖານ ເປັນປະເທດປະທານໝູນວຽນຂອງອົງການຮ່ວມມືຊຽງໄຮ. ໃນກອງປະຊຸມວົງກວ້າງ, ທ່ານຫູຈີນທາວກ່າວວ່າ, ຈີນຈະສືບຕໍ່ເສີມຂະຫຍາຍຈິດໃຈຊຽງໄຮ, ອົງການຮ່ວມມືຊຽງໄຮຈະມີອະນາຄົດທີ່ດີງາມກວ່າເກົ່າ.
