ຈີນຣັດເຊຍຈະລົງເລິກການຮ່ວມມືທີ່ຕິດແທດຕົວຈິງຢ່າງຮອບດ້ານໃນ10ປີຂ້າງໜ້າ
(GMT+08:00) 2011-06-17 10:57:43 cri
ວັນທີ16ມິຖຸນານີ້,ປະມຸກລັດຈີນຣັດເຊຍຈັດການເຈລະຈາຢູ່ມົສກູ.ໃນມື້ດຽວກັນ,ສອງຝ່າຍຍັງໄດ້ເຊັນແລະເຜີຍແຜ່ເອກະສານລັກສະນະໂຄງຮ່າງກ່ຽວກັບການຮ່ວມມືລະຫວ່າງສອງປະເທດພ້ອມດ້ວຍຫຼັກໝັ້ນຂອງສອງປະເທດກ່ຽວກັບສະພາບການສາກົນໃນປະຈຸບັນນີ້ແລະບັນຫາສາກົນອັນສຳຄັນ.
ຕອນບ່າຍວັນທີ16ມິຖຸນານີ້ຕາມເວລາມົສກູ,ໃນຫໍປະຊຸມຂອງວັງແກຼມແລງທີ່ສະຫງ່າຜ່າເຜີຍ,ແຂກເກືອບ6ພັນຄົນທີ່ມາຈາກວົງການຕ່າງໆຂອງຈີນຣັດເຊຍໄດ້ເຂົ້າຮ່ວມງານດົນຕີອັນໃຫຍ່ໂຕມະໂຫລານຢູ່ທີ່ນີ້.ສິລະປິນຂອງສອງປະເທດຮ່ວມມືກັນເສບດົນຕີທີ່ມີຊື່ສຽງຂອງສອງປະເທດ,ເພື່ອສະເຫຼີມສະຫຼອງການເຊັນ"ສົນທິສັນຍາການຮ່ວມມືດ້ວຍໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນຈີນຣັດເຊຍ"ຄົບຮອບ10ປີ.ກ່ອນແລະຫຼັງງານດົນຕີ,ຜູ່ນຳລະດັບສູງຂອງຈີນຣັດເຊຍໄດ້ຈັດການພົບປະກັນຕິດໆກັນ,ຄື ໃນຕອນທ່ຽງມື້ນັ້ນ,ທ່ານຫູຈິນທ່າວແລະທ່ານດິມີດຼີ ເມັດເວເດັຟ,ປະທານາທິບໍດີຣັດເຊຍໄດ້ເຈລະຈາກັນເປັນເວລາສອງຊົ່ວໂມງປາຍ;ແລະພາຍຫຼັງເຂົ້າຮ່ວມງານດົນຕີແລ້ວ,ທ່ານຫູຈິນທ່າວແລະທ່ານປູຕິນ,ນາຍົກລັດຖະມົນຕີຣັດເຊຍກໍ່ພົບປະກັນ.ໃນຂະນະດຽວກັນນີ້,ຍັງໄດ້ເຜີຍແຜ່ຖະແຫຼງການຮ່ວມຂອງຈີນຣັດເຊຍກ່ຽວກັບສະພາບການສາກົນໃນປະຈຸບັນນີ້ແລະບັນຫາສາກົນອັນສຳ ຄັນ,ຖະແຫຼງການຮ່ວມຂອງຈີນຣັດເຊຍກ່ຽວກັບການເຊັນ"ສົນທິສັນຍາການຮ່ວມມືດ້ວຍໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນຈີນຣັດເຊຍ"ຄົບຮອບ10ປີ,ແລະເອກະສານທີ່ກ່ຽວກັບການຮ່ວມມືລະຫວ່າງພາກສ່ວນການທະນາຄານຂອງສອງປະເທດແລະການຮ່ວມມືໃນຂົງເຂດອະນຸລັກສິ່ງແວດລ້ອມ.
ຈີນຣັດເຊຍໄດ້ຕີລາຄາສູງ"ສົນທິສັນຍາການຮ່ວມມືດ້ວຍໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນຈີນຣັດເຊຍ"ທີ່ໄດ້ເສີມຂະຫຍາຍບົດບາດສຳຄັນຕໍ່ການພັດທະນາການພົວພັນຄູ່ປະສານງານຍຸດທະສາດລະຫວ່າງສອງປະເທດ,ເຫັນວ່າ,ການພົວພັນລະຫວ່າງຈີນຣັດເຊຍໄດ້ສ້າງຜົນປະໂຫຍດຢ່າງແທ້ຈິງໃຫ້ປະຊາຊົນສອງປະເທດໃນ10ປີທີ່ຜ່ານມາ,ແລະໄດ້ປະກອບສ່ວນອັນສຳຄັນຕໍ່ສັນຕິພາບແລະສະຖຽນລະພາບຂອງໂລກ.
"ສົນທິສັນຍາການຮ່ວມມືດ້ວຍໄມຕີຈິດຖານບ້ານໃກ້ເຮືອນຄຽງທີ່ດີຕໍ່ກັນຈີນຣັດເຊຍ"ເຊັນໃນປີ2001.ໃນເວລາທີ່ເຂົ້າສູ່ຕົ້ນສະຕະວັດໃໝ່,ສອງປະເທດໃຫຍ່ທີ່ມີຊາຍແດນຍາວຕິດຈອດກັນແລະມີລະບອບຕ່າງກັນນັ້ນ,ໄດ້ຂຽນແນວຄິດສັນຕິພາບເຂົ້າໃນກົດໝາຍ,ເຊິ່ງມີເນື້ອໃນວ່າ ສອງປະເທດສະເໝີພາບກັນແລະໄວ້ເນື້ອເຊື່ອໃຈເຊິ່ງກັນແລະກັນ,ສ້າງການພົວພັນຄູ່ປະສານງານຍຸດທະສາດທີ່ມຸ່ງໜ້າໄປສູ່ອະນາຄົດແລະ"ມີໄມຕີຈິດມິດຕະພາບຕະຫຼອດທຸກເຊັ່ນຄົນແລະບໍ່ເປັນສັດຕູກັນຈົນເທົ່າໃດໆ".ໃນ10ປີທີ່ຜ່ານມາ,ຄວາມໄວ້ເນື້ອເຊື່ອໃຈເຊິ່ງກັນແລະກັນດ້ານການເມືອງແລະການຮ່ວມມືໃນຂົງເຂດເສດຖະກິດ,ການຄ້າແລະວັດທະນະທຳລະຫວ່າງຈີນກັບຣັດເຊຍໄດ້ມີການຂະຫຍາຍຕົວຢ່າງບໍ່ຢຸດຢັ້ງ.
ການລົງເລິກການຮ່ວມມືທີ່ຕິດແທດຕົວຈິງຢ່າງຮອບດ້ານແມ່ນເນື້ອໃນໃຈກາງຂອງການຂະຫຍາຍການພົວພັນລະຫວ່າງສອງປະເທດໃນ10ປີຂ້າງໜ້າ.ອີງຕາມຄວາມເຫັນທີ່ເປັນເອກະສັນກັນຂອງຜູ່ນຳລະດັບສູງຈີນຣັດເຊຍໃນວັນທີ16ມິຖຸນານີ້,ມູນຄ່າການຄ້າຈີນ ຣັດເຊຍຈະເພີ່ມຂຶ້ນຮອດ100ຕື້ໂດລາສະຫະລັດກ່ອນປີ2015,ແລະເພີ່ມຂຶ້ນຮອດ200ຕື້ໂດລາສະຫະລັດກ່ອນປີ2020.ສອງປະເທດຈະຊຸກຍູ້ການຮ່ວມມືໃນຂົງເຂດນ້ຳມັນເຊື້ອໄຟ,ອາຍແກັສທຳມະຊາດແລະພະລັງງານນິວເຄຼຍຢ່າງຮອບດ້ານ,ສ້າງການພົວພັນຄູ່ຮ່ວມມືດ້ານພະລັງງານທີ່ມີລັກສະນະຍຸດທະສາດແລະຍາວນານບົນພື້ນຖານທີ່ຕ່າງຝ່າຍຕ່າງມີຜົນປະໂຫຍດ,ແລະຕັ້ງໜ້າຊອກຫາຊ່ອງທາງໃໝ່ໃນການຮ່ວມມືດ້ານວິທະຍາສາດເຕັກ ນິກແລະການປະດິດສ້າງ,ເປີດກວ້າງແລະລົງເລິກການຮ່ວມມືໃນພາກພື້ນ.ພ້ອມກັນນັ້ນ,ຈີນຣັດເຊຍຍັງຈະຊຸກຍູ້ການຮ່ວມມືໃນຫຼາຍຂົງເຂດ,ເປັນຕົ້ນແມ່ນ:ການສຶກສາ,ວັດທະນະທຳ,ກິລາແລະຊາວໜຸ່ມ;ເປີດກວ້າງແລະລົງເລິກການແລກປ່ຽນແລະການຮ່ວມມືກັນລະຫວ່າງກອງທັບສອງປະເທດທີ່ເປັນສ່ວນປະກອບອັນສຳຄັນຂອງການພົວພັນຄູ່ປະສານງານຍຸດທະສາດຢ່າງຮອບດ້ານລະຫວ່າງຈີນຣັດເຊຍ,ແລະເຮັດໃຫ້ການປະສານສົມທົບກັນໃນວຽກງານສາກົນແລະພາກພື້ນແໜ້ນແຟ້ນຕື່ມອີກ.
