ນັກເສດຖະສາດຕາເວັນຕົກເຫັນວ່າ,ຮູບການພັດທະນາເສດຖະກິດໃໝ່ຂອງຈີນໄດ້ສ້າງໂອກາດໃຫ້ແກ່ເອີຣົບ
(GMT+08:00) 2011-06-24 18:23:26 cri
ຫວ່າງມໍ່ໆມານີ້,ນັກເສດຖະສາດຕາເວັນຕົກຫຼາຍຄົນຮຽກຮ້ອງໃຫ້ປະເທດອຸດສາຫະກຳປ່ຽນແປງທັດສະນະເກົ່າ,ຄວນເຫັນເຖິງການພັດທະນາເສດຖະກິດຂອງຈີນທີ່ມີຜົນດີຕໍ່ເອີຣົບ,ໂດຍສະເພາະແມ່ນຮູບການພັດທະນາເສດຖະກິດໃໝ່ຂອງຈີນໄດ້ສ້າງໂອກາດໃຫ້ແກ່ເອີຣົບ.
ໜັງສືພິມ"ແຟແນນໂຊແທມສ໌ເຢຍລະມັນ"ໄດ້ລົງພິມບົດຄວາມຂອງທ່ານໂທມັສ ຟຼິກ,ນັກເສດຖະສາດຜູ່ທີໜຶ່ງຂອງໜັງສືພິມສະບັບນີ້ໂດຍຊີ້ອອກວ່າ,ການຖືເສດຖະກິດຈີນເປັນ ສິ່ງຂົ່ມຂູ່ແມ່ນຜິດພາດທີ່ສຸດ.ປະຈຸບັນນີ້,ຈົນວ່າຮູບການພັດທະນາເສດຖະກິດໃໝ່ຂອງຈີນສາມາດຊ່ວຍເຫຼືອເອີຣົບໃນວິກິດການ.
ທ່ານຟຼິກກ່າວວ່າ,ໃນ30ປີຜ່ານມາ,ການແຂ່ງຂັນດ້ວຍລາຄາຖືກທີ່ມາຈາກອາຊີເຮັດໃຫ້ວິສາຫະກິດທີ່ຊື່ດັງໃນອະດີດຂອງເອີຣົບແລະວິສາຫະກິດຜະລິດແຜ່ນແພຈຳນວນຫຼວງຫຼາຍປິດປະຕູ.ດຽວນີ້,ທັງໝົດເຫຼົ່ານີ້ໄດ້ສິ້ນສຸດລົງແລ້ວ,ມູນຄ່າຈຳໜ່າຍສິນຄ້າຢູ່ຈີນຂອງວິສາຫະກິດຕາເວັນຕົກໄດ້ເພີ່ມຂຶ້ນຢ່າງວ່ອງໄວໃນເວລາອັນສັ້ນໆ,ຈົນເຮັດໃຫ້ຄວາມເຫັນຂອງເຂົາເຈົ້າທີ່ມີຕໍ່ຈີນນັ້ນປ່ຽນແປງຢ່າງເຖິງຖອງ.
ທ່ານອັນເດຼຍສ໌ ຣີສ,ນັກເສດຖະສາດຜູ່ທີໜຶ່ງຂອງທະນາຄານຢູນິເຄຼດິດມູນິກ,ກ່າວວ່າ: "ດຽວນີ້ແມ່ນບາດລ້ຽວໃນປະຫວັດສາດເສດຖະກິດຂອງເຢຍລະມັນ.ເມື່ອຮອດປີ2015,ຈີນອາດຈະກາຍເປັນຕະຫຼາດສົ່ງອອກສິນຄ້າທີ່ໃຫຍ່ທີ່ສຸດຂອງເຢຍລະມັນໃນທົ່ວໂລກ."
ທ່ານກ່າວວ່າ,ນັບແຕ່ສົງຄາມໂລກຄັ້ງທີ2ສິ້ນສຸດລົງມານີ້,ອາເມລິກາແມ່ນຄູ່ຮ່ວມມືການຄ້າທີ່ສຳຄັນທີ່ສຸດຂອງເຢຍລະມັນຢູ່ນອກເອີຣົບໂດຍຕະຫຼອດ.ການພົວພັນນີ້ໄດ້ເສີມຂະຫຍາຍບົດບາດອັນແນ່ນອນທີ່ເຮັດໃຫ້ອາເມລິກາເປັນເສົາຄ້ຳເສດຖະກິດແລະກຳລັງໝັ້ນທ່ຽງດ້ານການເມືອງຂອງຕາເວັນຕົກ.ປະຈຸບັນນີ້,ຄຽງຄູ່ກັບຈີນກາຍເປັນພະລັງແມ່ແຮງສຳຄັນທີ່ຊຸກຍູ້ການພັດທະນາຂອງເສດຖະກິດໂລກ,ເຄື່ອງຈັກ,ເຄື່ອງບໍລິໂພກແລະລົດຍົນແບບຫຼູ້ຫຼາຂອງເຢຍລະມັນນັບມື້ນັບຂາຍໄປສູ່ຕາເວັນອອກ.
ໃນບົດລາຍງານຄົ້ນຄວ້າທີ່ພາດຫົວເລື່ອງວ່າ"ໂສມໜ້າໃໝ່ຂອງຈີນ",ນາງວິໂຣນິກ ຣິ ຈິສ ຟຼໍເຣັສ,ນັກເສດຖະສາດຂອງທະນາຄານໂຊຊິເອເຕ ເຣິເນຣາຣ໌ຂອງຝະຣັ່ງຂຽນວ່າ,ຈີນກຳລັງຈາກເຄື່ອງຈັກສົ່ງອອກກາຍເປັນເຄື່ອງຈັກບໍລິໂພກ.ໃນ10ປີກ່ອນ,ຂະໜາດຂອງຕະຫຼາດລົດຍົນຂອງຈີນຍັງບໍ່ເທົ່າກັບຕະຫຼາດຂອງຝະຣັ່ງ,ແຕ່ດຽວນີ້ແມ່ນ9ເທົ່າຂອງຝະຣັ່ງ.ໃນປີ2010,ການປະກອບສ່ວນຂອງຄົນຈີນທີ່ມີຕໍ່ການເພີ່ມຂຶ້ນຂອງມູນຄ່າບໍລິໂພກ ຂອງໂລກເກືອບເທົ່າກັບຄົນອາເມລິກາເປັນເທື່ອທຳອິດ.
ນາງຟຼໍເຣັສຄາດຄະເນວ່າ,ເມື່ອຮອດປີ2020,ການປ່ຽນແປງຂອງຈີນອາດຈະຍົກສູງອັດຕາເຕີບໂຕເສດຖະກິດຂອງເຂດເງິນເອີໂຣຂຶ້ນ0,25ຫາ0,4%.ນີ້ຈະສ້າງຫຼາຍສິບລ້ານຕຳ ແໜ່ງອາຊີບ.
