ລະບຽບການຄັດເລືອກຄະນະນຳຂອງພັກກອມມູນິດຈີນນັບມື້ນັບສົມບູນຂຶ້ນ
(GMT+08:00) 2011-06-28 16:59:27 cri
ເນື່ອງໃນໂອກາດລະລຶກວັນສ້າງຕັ້ງພັກກອມມູນິດຈີນ ເຊິ່ງເປັນພັກກຳອຳນາດຂອງຈີນ ຄົບຮອບ90ປີ, ການເລືອກຕັ້ງຄະນະນຳຂັ້ນແຂວງ, ຂັ້ນນະຄອນ, ຂັ້ນເມືອງແລະຂັ້ນຕາແສງຂອງພັກພວມດຳເນີນຢູ່, ການເລືອກຕັ້ງຄະນະນຳໃນຂອບເຂດກວ້າງເທື່ອນີ້ກໍໄດ້ເປີດສາກການເລືອກຕັ້ງຄະນະນຳສູງສຸດຊຸດໃໝ່ຂອງພັກກອມມູນິດຈີນ.
ອີງຕາມລະບຽບການພາຍໃນພັກກອມມູນິດຈີນ, ໃນກອງປະຊຸມໃຫຍ່ຄັ້ງທີ18ຂອງພັກກອມມູນິດຈີນທີ່ຈະໄຂຂຶ້ນໃນຫົກເດືອນທ້າຍປີ2012, ທ່ານຫູຈີນທາວ ເລຂາທິການໃຫຍ່ສູນກາງພັກກອມມູນິດຈີນຜູ້ປະຈຸບັນໄດ້ດຳລົງຕຳແໜ່ງສອງສະໄໝເປັນເວລາ10ປີເຕັມແລ້ວ, ໃກ້ຈະພົ້ນຈາກຕຳແໜ່ງ, ພັກກອມມູນິດຈີນກໍຈະຜ່ານຈາກກອງປະຊຸມຄັ້ງນີ້ເລືອກຕັ້ງຄະນະນຳສູນກາງພັກຊຸດໃໝ່.
ນັບແຕ່ທ່ານເຕິ້ງສຽວຜິງ ບິດາແຫ່ງການປະຕິຮູບແລະໄຂປະຕູສູ່ພາຍນອກຂອງຈີນດຳລົງຕຳແໜ່ງຜູ້ນຳສູງສຸດຂອງພັກກອມມູນິດຈີນເປັນຕົ້ນມາ, ພັກກອມມູນິດຈີນກໍໄດ້ມ້າງລະບຽບການທີ່ຜູ້ນຳຂອງພັກດຳລົງຕຳແໜ່ງຕະຫຼອດຊີວິດ, ແລະໄດ້ກຳນົດອາຍຸຕຳແໜ່ງຂອງຜູ້ນຳຂອງພັກ. ທ່ານໄຕ້ແຢ້ນຈຸ່ນ ສາສະດາຈານໂຮງຮຽນພັກສູນກາງຕີລາຄາວ່າ:
ມ້າງລະບຽບການທີ່ຜູ້ນຳຂອງພັກດຳລົງຕຳແໜ່ງຕະຫຼອດຊີວິດ, ຈິ່ງສາມາດບັນລຸການປ່ຽນຄະນະນຳໂດຍຜ່ານຈາກການເລືອກຕັ້ງຂອງແຕ່ລະຊຸດຢ່າງເປັນປົກະຕິ, ນີ້ແມ່ນມາດຕະການສຳຄັນທີ່ພາໃຫ້ລະບຽບການຄະນະນຳຂອງພັກກອມມູນິດຈີນນັບມື້ນັບເປັນແບບສະບັບ. ໄດ້ກຳນົດລະບຽບການຄະນະນຳຂອງພັກຢ່າງເປັນລະບຽບຮຽບຮ້ອຍ ແມ່ນມາດຕະການສຳຄັນທີ່ມີຄວາມໝາຍພື້ນຖານໃນດ້ານການກໍ່ສ້າງພັກຂອງພັກກອມມູມິດຈີນໃນຂະບວນການກຳອຳນາດ.
ປະຈຸບັນ, ຈີນພວມຢູ່ໃນຂະບວນການທີ່ອອກແຮງຊຸກຍູ້ການປົກຄອງປະເທດຕາມກົດໝາຍແລະປັບປຸງລະບົບເສດຖະກິດຕະຫຼາດສັງຄົມນິຍົມໃຫ້ສົມບູນຂຶ້ນຢ່າງບໍ່ຢຸດຢັ້ງ, ພັກກຳອຳນາດຕ້ອງການມີຄະນະນຳແບບຊ່ຽວຊານທີ່ຮູ້ກົດໝາຍ, ຮູ້ເສດຖະກິດແລະຮູ້ການປົກຄອງ.
ທ່ານເໝົາໂຊ້ລົງ ສາສະດາຈານມະຫາວິທະຍາໄລປະຊາຊົນຈີນເຫັນວ່າ, ເມື່ອທຽບກັບຜູ້ນຳອາວຸໂສທີ່ສ່ວນຫຼາຍເປັນນັກປະຕິວັດແລະນັກວິສະວະກອນແລ້ວ, ຄະນະນຳຊຸດໃໝ່ຂອງພັກກອມມູນິດຈີນມີທ່າແຮງຂອງຕົນ, ແລະກໍປະເຊີນກັບສິ່ງທ້າທາຍຫຼາຍຢ່າງ.
ຄະນະນຳຊຸດນີ້ຕ້ອງການມີຄວາມຮູ້ທີ່ກວ້າງຂວາງແລະມີຄວາມສາມາດສັງລວມຄວາມຮູ້, ໂດຍສະເພາະແມ່ນສາມາດມີການປະດິດສ້າງດ້ານລະບຽບການ, ຕ້ອງມີຄວາມຮູ້ດ້ານສັງຄົມວິທະຍາ, ດ້ານກົດໝາຍແລະດ້ານປົກຄອງຫຼາຍກວ່າເກົ່າ. ເວົ້າສຳລັບເຂົາເຈົ້າແລ້ວ, ສິ່ງທ້າທາຍໃນອະນາຄົດກໍມີຫຼາຍຢ່າງຫຼາຍແນວຄືກັນ, ບົດຮຽນທີ່ມີຢູ່ອາດຈະໃຊ້ບໍ່ໄດ້ອີກ. ເມື່ອປະເຊີນກັບປັດໄຈບໍ່ແນ່ນອນ, ພວກເຂົາເຈົ້າຕ້ອງການຄວາມອົງອາດກ້າຫານແລະຄວາມຕັດສິນໃຈ, ຕ້ອງການວິທີໃໝ່ແລະຄວາມຮູ້ໃໝ່.
ປະຈຸບັນນີ້, ຈີນພວມຢູ່ໃນໄລຍະປ່ຽນແປງຮູບການພັດທະນາ, ອົງປະກອບສັງຄົມມີຫຼາຍເຄົ້າຫຼາຍແບບ, ການປະຕິຮູບໂຄງປະກອບການເມືອງຂອງຈີນກໍໄດ້ຊຸກຍູ້ໄປໜ້າຢ່າງບໍ່ຢຸດຢັ້ງ, ຄວາມຫຼຸດລື່ນກັນລະຫວ່າງຜູ້ຮັ່ງມີກັບຜູ້ທຸກຍາກກໍພາໃຫ້ຄວາມຂັດແຍ່ງກັນໃນສັງຄົມດຸເດືອດຂຶ້ນ, ປະຊາຊົນໄດ້ສົນໃຈທີ່ສຸດນຳການແບ່ງປັນຊັບພະຍາກອນສັງຄົມແລະຊັບສິນ, ທັງໝົດເຫຼົ່ານີ້ລ້ວນແຕ່ໄດ້ເພີ່ມຄວາມຫຍຸ້ງຍາກໃນການປົກຄອງສັງຄົມ. ທ່ານແຢນຊູຮ້ານ ສາສະດາຈານໂຮງຮຽນພັກສູນກາງ ເຫັນວ່າ, ໃຕ້ເບື້ອງຫຼັງດັ່ງກ່າວ, ບົດຮຽນເຮັດວຽກຢູ່ຂັ້ນຮາກຖານຈະແມ່ນປັດໄຈສຳຄັນໃນການຄັດເລືອກຄະນະນຳຂອງພັກກອມມູນິດຈີນ.
