ການເລືອກຕັ້ງສະພາຜູ້ແທນລາຊະດອນຂອງໄທສິ້ນສຸດລົງ ພັກເພື່ອໄທໄດ້ຮັບຊະນະດ້ວຍຄະແນນສຽງຖ້ວມທົ້ນ
(GMT+08:00) 2011-07-04 15:24:32 cri
ວັນທີ3ກໍລະກົດນີ້, ໄທໄດ້ຈັດການປ່ອນບັດເລືອກຕັ້ງສະພາຜູ້ແທນລາຊະດອນ. ອີງຕາມຜົນການນັບບັດລົງຄະແນນສຽງຫຼາຍກວ່າ98%ເປັນຂອງບັດລົງຄະແນນສຽງ, ພັກເພື່ອໄທ ເຊິ່ງເປັນພັກຝ່າຍຄ້ານໄດ້ຮັບບ່ອນນັ່ງໃນສະພາຫຼາຍກວ່າເຄິ່ງໜຶ່ງ, ພັກປະຊາທິປັດ ເຊິ່ງເປັນພັກລັດຖະບານໄດ້ບ່ອນນັ່ງປະມານ1ສ່ວນ3ເທົ່ານັ້ນ, ພັກເພື່ອໄທໄດ້ຮັບຊະນະດ້ວຍຄະແນນສຽງຖ້ວມທົ້ນ.
ປະມານ21ໂມງເຄິ່ງຕອນຄ່ຳວັນທີ3ກໍລະກົດນີ້, ຄະນະກຳມະການການເລືອກຕັ້ງຂອງໄທໄດ້ແຈ້ງຜົນການນັບບັດລົງຄະແນນສຽງທີ່ສຳເລັດແລ້ວ98%, ໃນທັງໝົດ500ບ່ອນນັ່ງ, ພັກເພື່ອໄທຍາດໄດ້264ບ່ອນນັ່ງ, ກາຍເຄິ່ງໜຶ່ງ, ພັກປະຊາທິປັດໄດ້160ບ່ອນນັ່ງ, ພັກພູມໃຈໄທໄດ້34ບ່ອນນັ່ງ, ພັກຊາດໄທພັດທະນາໄດ້19ບ່ອນນັ່ງ, ອີກ7ພັກການເມືອງໄດ້23ບ່ອນນັ່ງ. ປະຈຸບັນນີ້, ຍັງມີບັດລົງຄະແນນສຽງພຽງ2%ທີ່ນັບບໍ່ທັນສຳເລັດ, ອີງຕາມຜົນການນັບບັດຄະແນນສຽງໄດ້ສະແດງໃຫ້ເຫັນວ່າ, ພັກເພື່ອໄທໄດ້ເອົາຊະນະພັກປະຊາທິປັດໃນການເລືອກຕັ້ງຄັ້ງນີ້.
ປະມານ20ໂມງຂອງມື້ດຽວກັນ, ທ່ານອະພິສິດ ເວດຊາຊີວະ ປະທານພັກປະຊາທິປັດແລະນາງຍິ່ງລັກ ຊິນນະວັດ ຜູ້ສະໝັກຮັບເລືອກຕັ້ງນາຍົກລັດຖະມົນຕີຂອງພັກເພື່ອໄທຕ່າງໄດ້ຖະແຫຼງຂ່າວຢູ່ສຳນັກງານໃຫຍ່ຂອງຕົນ, ເພື່ອສະແດງທັດສະນະຕໍ່ຜົນການເລືອກຕັ້ງດັ່ງນີ້. ທ່ານອະພິສິດດກ່າວວ່າ:
ເມື່ອສັງເກດຈາກຜົນການນັບບັດຄະແນນສຽງໃນປະຈຸບັນແລ້ວ, ພັກປະຊາທິປັດຍອມຮັບວ່າໄດ້ເສຍໄຊໃນການເລືອກຕັ້ງຄັ້ງນີ້, ພ້ອມກັນນັ້ນ, ກໍສະແດງຄວາມຊົມເຊີຍຕໍ່ພັກເພື່ອໄທທີ່ສາມາດຈັດຕັ້ງລັດຖະບານຊຸດໃໝ່, ໂດຍສະເພາະແມ່ນສະແດງຄວາມຊົມເຊີຍຕໍ່ນາງຍິ່ງລັກທີ່ຈະເປັນນາຍົກລັດຖະມົນຕີຜູ້ໃໝ່, ຈິ່ງແມ່ນນາຍົກລັດຖະມົນຕີເພດຍິງຜູ້ທຳອິດໃນປະຫວັດສາດໄທ.
ພ້ອມກັນນັ້ນ, ທ່ານອະພິສິດດກໍກ່າວວ່າ, ພັກປະຊາທິປັດຈະຕິດຕາມແລະປະຕິບັດວຽກງານຂອງລັດຖະບານຊຸດໃໝ່ໃນຖານະເປັນພັກຝ່າຍຄ້ານ, ຖ້າວ່າມີຄວາມຈຳເປັນກໍຈະດຳເນີນການຮ່ວມມືກັບພັກລັດຖະບານໃນທຸກດ້ານ.
ໃນເວລາຖະແຫຼງຂ່າວທີ່ຈັດຂຶ້ນຕາມຫຼັງ, ນາງຍິ່ງລັກໄດ້ສະແດງຄວາມຂອບໃຈຕໍ່ທ່ານອະພິສິດແລະພັກການເມືອງຕ່າງໆທີ່ໄດ້ທຳຄວາມພະຍາຍາມເພື່ອຮັບປະກັນການເລືອກຕັ້ງທົ່ວໄປສາມາດຈັດຂຶ້ນຢ່າງສະດວກ.
ບໍ່ວ່າແນວໃດກໍຕາມ, ພວກເຮົາຍັງຕ້ອງລໍຖ້າການປະກາດຜົນການນັບບັດຄະແນນສຽງຢ່າງເປັນທາງການໃນທີ່ສຸດ, ຂ້າພະເຈົ້າແລະພັກເພື່ອໄທຈະພະຍາຍາມປະຕິບັດຕາມຄຳໝັ້ນສັນຍາແລະນະໂຍບາຍທຸກຢ່າງທີ່ໄດ້ຮັບປາກຕໍ່ປະຊາຊົນ, ພວກຂ້າພະເຈົ້າຈະພະຍາຍາມສຸດຄວາມສາມາດ, ບໍ່ໃຫ້ປະຊາຊົນຜິດຫວັງ.
ຕອນຄ່ຳມື້ດຽວກັນ, ໃນເວລາສະຫຼຸບການປ່ອນບັດແລະການນັບບັດຄະແນນສຽງໝົດມື້, ທ່ານອະພິຊາດ ສຸກສຳລານ ປະທານຄະນະກຳມະການເລືອກຕັ້ງສູນກາງໄທກ່າວວ່າ, ມີປະຊາຊົນຜູ້ມີສິດເລືອກຕັ້ງຫຼາຍກວ່າ74%ໄດ້ເຂົ້າຮ່ວມການປ່ອນບັດ, ນີ້ສະແດງໃຫ້ເຫັນວ່າປະຊາຊົນໄດ້ເຂົ້າຮ່ວມການເລືອກຕັ້ງຢ່າງຕັ້ງໜ້າ, ທ່ານຍັງເຊື່ອວ່າ, ຜົນການເລືອກຕັ້ງຄັ້ງນີ້ຈະໄດ້ຮັບຄວາມເຫັນດີຈາກພັກການເມືອງແລະຝ່າຍຕ່າງໆ.
ນັກວິເຄາະເຫັນວ່າ, ເວົ້າສຳລັບໄທແລ້ວ, ການເລືອກຕັ້ງທົ່ວໄປຄັ້ງນີ້ແມ່ນການປະຕິຮູບສຳຄັນຄັ້ງໜຶ່ງ, ເວົ້າສຳລັບພັກເພື່ອໄທແລ້ວ, ແມ່ນໂອກາດສຳຄັນທີ່ສະແດງຄວາມສາມາດກຳອຳນາດຂອງຕົນ. ແຕ່ຖ້າຢາກບັນລຸເປົ້າໝາຍຄວາມປອງດອງຊາດແລະເຮັດໃຫ້ປະເທດໄທກ້າວໄປໜ້າຢ່າງແທ້ຈິງ, ນອກຈາກຕັ້ງໜ້າຊຸກຍູ້ໃຫ້ປະຊາຊົນທຸກຊັ້ນຄົນສາມັກຄີກັນບົນພື້ນຖານປອງດອງຊາດແລ້ວ, ພັກເພື່ອໄທຍັງຕ້ອງການຮັກສາການແລກປ່ຽນທັດສະນະກັບທະຫານຢ່າງເໝາະສົມ, ພ້ອມກັນນັ້ນ, ຍັງຈະຕ້ອງຟັງຄວາມເຫັນຂອງບຸກຄົນທີ່ມີຄວາມເຫັນຕ່າງກັນດ້ານການເມືອງ, ຫຼີກເວັ້ນບໍ່ໃຫ້ເກີດການກະທຳທີ່ເປັນການໂຈມຕີແລະແກ້ແຄ້ນຕໍ່ເຂົາເຈົ້າ.
