ຈີນເຜີຍແຜ່ປຶ້ມປົກຂາວໂດຍກ່າວຢ້ຳວ່າຕິເບດແມ່ນພາກສ່ວນໜຶ່ງທີ່ບໍ່ສາມາດຕັດແຍກອອກຈາກດິນແດນຈີນໄດ້
(GMT+08:00) 2011-07-12 16:42:19 cri
ຫ້ອງການຖະແຫຼງຂ່າວລັດຖະບານຈີນໄດ້ເຜີຍແຜ່ປຶ້ມປົກຂາວໂດຍໃສ່ຊື່ວ່າ"60ປີພາຍຫຼັງຕິເບດໄດ້ຮັບການປົດປ່ອຍໂດຍສັນຕິ"ໃນວັນທີ11ກໍລະກົດນີ້ໂດຍກ່າວຢ້ຳວ່າຕິເບດແມ່ນພາກສ່ວນໜຶ່ງທີ່ບໍ່ສາມາດຕັດແຍກອອກຈາກດິນແດນຈີນໄດ້ມາຕັ້ງແຕ່ບູຮານນະການ.
ປຶ້ມປົກຂາວຂຽນວ່າ ວັນທີ11ມີນາປີ1912,ລັດຖະທຳມະນູນສະບັບທຳອິດຂອງສາທາລະນະລັດຈີນຄື"ກົດໝາຍຊົ່ວຄາວສາທາລະນະລັດຈີນ"ໄດ້ກຳນົດໄວ້ຢ່າງຈະແຈ້ງວ່າລັດຖະບານສູນກາງມີອະທິປະໄຕເໜືອຕິເບດ,ໄດ້ປະກາດວ່າຕິເບດແມ່ນດິນແດນສ່ວນໜຶ່ງຂອງສາທາລະນະລັດຈີນ.ປີດຽວກັນ,ລັດຖະບານສາທາລະນະລັດຈີນໄດ້ຕັ້ງກົມວຽກງານໂມງໂກແລະຕິເບດເຊິ່ງຂຶ້ນກັບລັດຖະບານເພື່ອຄຸ້ມຄອງບໍລິຫານວຽກງານໂມງໂກແລະຕິເບດ.
ປຶ້ມປົກຂາວຍັງໄດ້ທົບທວນຄືນປະຫວັດສາດກ່ຽວກັບລັດຖະບານຈີນປົກປ້ອງອະທິປະໄຕຂອງຕົນໃນເວລາທີ່ຖືກອິດທິກຳລັງູຮຸກຮານຈາກອັງກິດທີ່ມີເຈດຕະນາຢາກຮຸກຮານຕິເບດໃນທ້າຍສະຕະວັດທີ19.ປຶ້ມປົກຂາວຊີ້ອອກວ່າ,ຈີນແມ່ນປະເທດເອກະພາບທີ່ມີຫຼາຍຊົນເຜົ່າ,ປະຊາຊົນຕິເບດແມ່ນສະມາຊິກສຳຄັນຂອງມະຫາຄອບຄົວປະຊາຊາດຈີນ.ປະຫວັດສາດພິສູດໃຫ້ເຫັນວ່າຄຳເວົ້າທີ່ວ່າ"ຕິເບດເປັນເອກະລາດ"ຄວາມຈິງແລ້ວມັນເປັນພຽງຄຳເວົ້າຂອງຈັກກະພັດຜູ່ຮຸກຮານທັງເກົ່າແລະໃໝ່ເປັນຜູ່ເສກສັນປັ້ນແຕ່ງຂຶ້ນມາເອງແລະມັນເປັນກົນອຸບາຍຂອງປະເທດຕາເວັນຕົກທີ່ຢາກບຽດຍຶດດິນແດນຈີນ.
ປຶ້ມປົກຂາວຍັງແນະນຳເປັນພິເສດວ່າ,ດາໄລລາມະອົງທີ14ດັນເຈກາໂຊຂຶ້ນເປັນດາໄລລາມະໂດຍຜ່ານການອະນຸຍາດຈາກລັດຖະບານສາທາລະນະລັດຈີນໃນເວລານັ້ນ.ໃນເວທີສາກົນບໍ່ມີປະເທດຫຼືລັດຖະບານໃດໜຶ່ງໄດ້ຮັບຮອງຄວາມເປັນເອກະລາດຂອງຕິເບດ.
