ແກ້ໄຂຄວາມບໍ່ສະດວກໃນການເດີນທາງໃຫ້ແກ່ຊາວກະສິກອນແລະຊາວລ້ຽງສັດຕິເບດໄດ້ໂດຍພື້ນຖານ
(GMT+08:00) 2011-07-15 16:34:40 cri
5ປີທີ່ຜ່ານມານີ້ແມ່ນໄລຍະທີ່ເຂດປົກຄອງຕົນເອງຕິເບດໄດ້ລົງທຶນເຂົ້າໃນການກໍ່ສ້າງເສັ້ນທາງຫຼາຍທີ່ສຸດ,ພັດທະນາໄວທີ່ສຸດແລະໄດ້ຮັບຜົນສຳເລັດພົ້ນເດັ່ນທີ່ສຸດ.ປະຈຸບັນ,ຊົນນະບົດແລະຕາແສງທີ່ມີທາງຫຼວງໄປເຖິງນັ້ນລ້ວນແຕ່ໄດ້ເປີດບໍລິການລົດເມປະຈຳທາງທັງໝົດ,ໄດ້ແກ້ໄຂຄວາມບໍ່ສະດວກໃນການເດີນທາງໃຫ້ແກ່ຊາວກະສິກອນແລະຊາວລ້ຽງສັດໂດຍພື້ນຖານ.
ຍ້ອນຖືກຈຳກັດທາງດ້ານພູມສາດແລະທຳມະຊາດ,ການກໍ່ສ້າງດ້ານວຽກງານຄົມມະນາຄົມເຊັ່ນທາງຫຼວງ,ທາງລົດໄຟເປັນບັນຫາທີ່ຖ່ວງດຶງການພັດທະນາເສດຖະກິດຂອງເຂດປົກຄອງຕົນເອງຕິເບດມາໂດຍຕະຫຼອດ,ໂດຍສະເພາະແມ່ນຊາວກະສິກອນແລະຊາວລ້ຽງສັດທີ່ດຳລົງຊີວິດໃນເຂດຊົນນະບົດແມ່ນພົບຄວາມຫຍຸ້ງຍາກທີ່ສຸດໃນການເດີນທາງ.ເພື່ອແກ້ໄຂບັນຫານີ້,ປີນີ້,ເຂດປົກຄອງຕົນເອງຕິເບດຕົກລົງວ່າ,ສຳລັບລົດຍົນທີ່ໄລຍະທາງ70%ແມ່ນບໍລິການຢູ່ທາງຫຼວງຂັ້ນເມືອງແລະເຂດຊົນນະບົດນັ້ນ,ອົງການປົກຄອງຕິເບດຈະໃຫ້ອຸດໜູນຊື້ການປະກັນໄພ3ປີ, ສຳລັບລົດໂດຍສານທີ່ບໍລິການຢູ່ຊົນນະບົດແມ່ນໃຫ້ເງິນອຸດໜູນນ້ຳມັນພ້ອມທັງໃຫ້ເງິນອຸດໜູນທຸລະກິດການຂົນສົ່ງຜູ່ໂດຍສານພ້ອມ.
ທ່ານໂຊນາມເຊເປວ ຮອງຫົວໜ້າພະແນກຄົມມະນາຄົມເຂດປົກຄອງຕົນເອງຕິເບດກ່າວວ່າ,ຕາມແຜນການແລ້ວ,ໃນ5ປີຕໍ່ໜ້າ,ຕິເບດຍັງຈະສືບຕໍ່ເພີ່ມການລົງທຶນ50ຕື້ຢວນເຂົ້າໃນການກໍ່ສ້າງຄົມມະນາຄົມການຂົນສົ່ງ.ຮອດປີ2015,ໄລຍະທາງຫຼວງທີ່ເປີດນຳໃຊ້ຂອງຕິເບດຈະມີເຖິງ7ໝື່ນກິໂລແມັດ,ບັນຫາດ້ານຄົມມະນາຄົມຈະໄດ້ຮັບການແກ້ໄຂເທື່ອລະກ້າວ,ມີຜົນດີຕໍ່ການຊຸກຍູ້ໃຫ້ອຸດສາຫະກຳພະລັງງານ,ອຸດສາຫະກຳທີ່ມີສີສັນພິເສດແລະການທ່ອງທ່ຽວຂອງຕິເບດໄດ້ຮັບການພັດທະນາຕື່ມອີກ.
