ທ່ານຢາງເຈສືເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊຽນບວກ3
(GMT+08:00) 2011-07-21 18:40:43 cri
ຕາມຂ່າວສານຊິນຮວາ, ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມແລະກ່າວຄຳປາໃສໃນກອງປະຊຸມລັດຖະມົນຕີການຕ່າງປະເທດອາຊຽນກັບຈີນ,ຍີ່ປຸ່ນແລະສ.ເກົາຫຼີຫຼືອາຊຽນ+3ທີ່ຈັດຂຶ້ນຢູ່ເກາະບາຫຼີຂອງອິນໂດເນເຊຍໃນວັນທີ21ກໍລະກົດນີ້.
ທ່ານຢາງເຈສືກ່າວວ່າ,ໃນຊຸມປີມໍ່ໆມານີ້,ພາຍໃຕ້ຄວາມພະຍຍາມຮ່ວມຂອງອາຊຽນແລະຈີນ,ຍີປຸ່ນ,ສ.ເກົາຫຼີ,ການຮ່ວມມືອາຊຽນ+3ໄດ້ຮັບຄວາມຄືບໜ້າຢ່າງຕັ້ງໜ້າໃນລວງກວ້າງແລະລວງເລິກ.ທ່ານຢາງເຈສືມີຂໍ້ສະເໜີກ່ຽວກັບການຮ່ວມມື10+3ຄື,ອັນທີໜຶ່ງ:ຊຸກຍູ້ການເສີມຂະຫຍາຍບົດບາດຂອງ10+3ທີ່ເປັນຊ່ອງທາງສຳຄັນໃນການຮ່ວມມືອາຊີຕາເວັນອອກ,ເຮັດໃຫ້ອາຊຽນບວກ3ຕ່າງຝ່າຍຕ່າງໄດ້ຮັບຜົນປະໂຫຍດຕື່ມອີກ,ຊຸກຍູ້ໃຫ້ພາກພື້ນນີ້ມີຄວາມຈະເລີນຮຸ່ງເຮືອງ.ອັນທີສອງຊຸກຍູ້ໃຫ້ການຮ່ວມມືອາຊຽນ+3ໄດ້ຮັບຜົນສຳເລັດຕື່ມອີກ.ຈີນຫວັງຢາກສືບຕໍ່ເພີ່ມປະສິດທິຜົນຂອງການຫັນເປັນຫຼາຍຝ່າຍຂອງຂໍ້ລິເລີ່ມຊຽງໄໝ່,ຊຸກຍູ້ໃຫ້ການກໍ່ສ້າງເຂດການຄ້າເສລີອາຊີຕາເວັນອອກມີຄວາມຄືບໜ້າຕົວຈິງ,ແລະຈີນໃຫ້ຄຳໝັ້ນສັນຍາວ່າຈະອອກທຶນ1ລ້ານໂດລາເພື່ອສ້າງຕັ້ງກອງທຶນກໍ່ສ້າງເຂດການຄ້າເສລີອາຊີຕາເວັນອອກ.ອັນທີ3ແມ່ນນຳໃຊ້ໂອກາດການຮ່ວມມືອາຊຽນ+3ສະໜັບສະໜູນອາຊຽນເຊື່ອມໂຍງເຂົ້າເປັນອັນໜຶ່ງອັນດຽວກັນ.ອັນສຸດທ້າຍແມ່ນນຳໃຊ້ຄັງສະໝອງຕັ້ງໜ້າຄົ້ນຄວ້າແຜນການພັດທະນາອາຊຽນ+3ໃນອະນາຄົດ.ຫຼາຍປີມານີ້,ຕາໜ່າງເຄືອຂ່າຍລະດົມຄວາມຄິດອາຊີຕາເວັນອອກໄດ້ມີຂໍ້ສະເໜີທີ່ຖືກຕ້ອງຕາມສະພາບຕົວຈິງແລະເຫັນກວ້າງມອງໄກຈຳນວນຫຼວງຫຼາຍເພື່ອຊຸກຍູ້ການຮ່ວມມືຕົວຈິງໃນຂອບອາຊຽນ+3,ຈີນຍິນດີພິຈາລະນາຂໍ້ສະເໜີເຫຼົ່ານີ້ຢ່າງຕັ້ງໜ້າ.ຫວັງວ່າປະເທດຕ່າງໆສະໜັບສະໜູນຈີນເປັນເຈົ້າພາບຈັດກອງປະຊຸມເວທີປຶກສາຫາລືອາຊີຕາເວັນອອກຄັ້ງທີ9.
ກ່ຽວກັບການພັດທະນາພາກພື້ນອາຊີຕາເວັນອອກ,ທ່ານຢາງເຈສືກ່າວວ່າ,ການພັດທະນາຍັງແມ່ນໜ້າທີ່ສຳຄັນທີ່ສຸດຂອງປະເທດຕ່າງໆໃນອາຊີຕາເວັນອອກໃນປະຈຸບັນ,ການຮ່ວມມືອາຊີຕາເວັນອອກຄວນຍຶດໝັ້ນທ່າທີເປີດປະຕູແລະຈິດໃຈກວ້າງຂວາງ,ສືບຕໍ່ຍຶດໝັ້ນການນຳພາຂອງອາຊຽນ.
ລັດຖະມົນຕີການຕ່າງປະເທດຂອງບັນດາປະເທດອາຊຽນແລະຍີ່ປຸ່ນ,ສ.ເກົາຫຼີໄດ້ທົບທວນຄືນຄວາມຄືບໜ້າໃນຂົງເຂດຕ່າງໆຂອງອາຊຽນ+3,ແລະເຫັນໂດຍທົ່ວໄປວ່າການຮ່ວມມືອາຊຽນ+3ມີຂົງເຂດກວ້າງຂວາງແລະໄດ້ຮັບຜົນສຳເລັດອັນພົ້ນເດັ່ນ,ໄດ້ກາຍເປັນໜຶ່ງໃນບັນດາກົນໄກຮ່ວມມືທີ່ມີຊີວິດຊີວາທີ່ສຸດແລະເປັນໃຈກາງຂອງການຮ່ວມມືພາກພື້ນອາຊີຕາເວັນອອກ.ບັນດາປະເທດອາຊຽນຂອບໃຈນຳຈີນ,ຍີ່ປຸ່ນແລະສ.ເກົາຫຼີທີ່ໄດ້ທຳຄວາມພະຍາຍາມແລະປະກອບສ່ວນເຂົ້າໃນເລື່ອງນີ້.ບັນດາຝ່າຍຍັງໄດ້ແລກປ່ຽນຄວາມຄິດຄວາມເຫັນກ່ຽວກັບບັນຫາສາກົນແລະພາກພື້ນທີ່ສົນໃຈນຳກັນ.
