ວັນທີ20ກໍລະກົດນີ້,ທ່ານໝ້າຈ່າວຊູ້,ໂຄສົກກະຊວງການຕ່າງປະເທດຈີນໄດ້ປະທ້ວງຢ່າງຮຸນແຮງຕໍ່ສະມາຊິກສະພາແຫ່ງຊາດຟີລິບປິນໄປຂຶ້ນເກາະໜານຊ່າຂອງຈີນ.
ຕາມການລາຍງານວ່າ, ມີສະມາຊິກສະພາແຫ່ງຊາດຟີລິບປິນຈໍານວນໜຶ່ງໄປຂຶ້ນເກາະຈົ່ງເຢ້,ຊິ່ງເປັນໜຶ່ງໃນໝູ່ເກາະໜານຊ່າຂອງຈີນໃນວັນທີ20ກໍລະກົດນີ້,ແລະໄດ້ປັກທຸງຊາດຟີລິບປິນຜືນໜຶ່ງຢູ່ເກາະນີ້. ທ່ານໝ້າຈ່າວຊູ້ກ່າວວ່າ,ຈີນມີອະທິປະໄຕເໜືອໝູ່ເກາະໜານຊ່າແລະເຂດທະເລອ້ອມແອ້ມທີ່ບໍ່ມີຜູ້ໃດສາມາດໂຕ້ຖ້ຽງໄດ້, ການເຄື່ອນໄຫວດັ່ງກ່າວຂອງຟີລິບປີນເປັນການລະເມີດອໍານາດອະທິປະໄຕດ້ານຜືນແຜ່ນດິນຂອງຈີນຢ່າງເປີດແປນ.ຈີນປະທ້ວງຢ່າງຮຸນແຮງຕໍ່ເລື່ອງນີ້.
ທ່ານກ່າວວ່າ,ການຮັກສາສະຖຽນລະພາບຂອງທະເລຈີນໃຕ້ແມ່ນຄວາມຮັບຮູ້ທີ່ເປັນເອກະສັນກັນແລະແມ່ນໜ້າທີ່ອັນສໍາຄັນຮ່ວມກັນຂອງປະເທດທີ່ກ່ຽວຂ້ອງໃນພາກພື້ນນີ້,ພວກຂ້າພະເຈົ້າຫວັງວ່າປະເທດທີ່ກ່ຽວຂ້ອງຈະເຄົາລົບຄວາມຮັບຮູ້ທີ່ເປັນເອກະສັນກັນຂອງສອງຝ່າຍ,ເຄົາລົບຫລັກການທີ່ຕົກລົງກັນໃນ "ຖະແຫລງວ່າດ້ວຍການປະພຶດຂອງຝ່າຍຕ່າງໆຢູ່ທະເລຈີນໃຕ້"ທີ່ຈີນແລະປະເທດອາຊຽນລົງນາມຮ່ວມກັນເພື່ອຫລີກເວັ້ນບໍ່ໃຫ້ມີການນໍາໃຊ້ການກະທໍາໃດໆທີ່ອາດຈະເຮັດໃຫ້ສະຖານະການມີຄວາມສັບສົນຂຶ້ນກວ່າເກົ່າ,ເພີ່ມທະວີຄວາມພະຍາຍາມອັນແທ້ຈິງເຂົ້າໃນການຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້.
