ລັດຖະມົນຕີກະຊວງການຕ່າງປະເທດຈີນເຂົ້າຮ່ວມກອງປະຊຸມລັດຖະມົນຕີການຕ່າງປະເທດຂອງເວທີປຶກສາຫາລືອາຊຽນ
(GMT+08:00) 2011-07-23 18:04:15 cri
ຕາມຂ່າວCRI: ວັນທີ23ກໍລະກົດນີ້, ທ່ານຢາງເຈສື, ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດຂອງເວທປຶກສາຫາລືອາຊຽນຄັ້ງທີ18ທີ່ຈັດຂຶ້ນຢູ່ເກາະບາຫຼີຂອງອິນໂດເນເຊຍແລະກ່າວຄຳປາໄສ.
ທ່ານຢາເຈສືກ່າວວ່າ, ໃນຫຼາຍສິບປີທີ່ຜ່ານມາ, ອາຊີປາຊີຟິກໄດ້ຮັກສາສັນຕິພາບແລະສະຖຽນລະພາບໂດຍລວມ, ເສດຖະກິດພາກພື້ນເຕີບໂຕຢ່າງຕໍ່ເນື່ອງແລະວ່ອງໄວ, ການຮ່ວມມືໃນພາກພື້ນພັດທະນາເປັນຢ່າງດີ, ກົນໄກຕ່າງໆໄດ້ຮັບການປັບປຸງໃຫ້ດີຂຶ້ນ, ແຕ່ກໍ່ມີປັດໃຈທີ່ບໍ່ໝັ້ນທ່ຽງ, ເຊິ່ງລວມທັງຄວາມຂັດແຍ່ງດ້ານທີ່ດິນທີ່ຕົກທອດມາແຕ່ປະຫວັດສາດ, ສິ່ງທ້າທາຍດ້ານຄວາມປອດໄພອັນເປັນມູນເຊື້ອແລະສິ່ງທ້າທາຍໃໝ່ຫຼາຍຢ່າງແລະອື່ນໆ. ຜ່ານການສົນທະນາແລະການເຈລະຈາເພື່ອແກ້ໄຂຄວາມຂັດແຍ່ງ, ຜ່ານການຮ່ວມມືເພື່ອຮັບມືກັບສິ່ງທ້າທາຍຮ່ວມ, ນີ້ແມ່ນຄວາມເຫັນທີ່ເປັນເອກະພາບກັນຂອງປະເທດໃນພາກພື້ນ.
ສຳລັບບັນຫາທະເລຈີນໃຕ້ທີ່ບາງປະເທດຖາມຢູ່ໃນກອງປະຊຸມ, ທ່ານຢາງເຈສືກ່າວວ່າ, ທະເລຈີນໃຕ້ມີຄວາມຂັດແຍ່ງດ້ານອະທິປະໄຕຂອງບາງເກາະແລະການຂີດແບ່ງເຂດທະເລຈຳນວນໜຶ່ງ, ນີ້ແມ່ນຄວາມຈິງ. ແຕ່ຄວາມຂັດແຍ່ງຄວນໃຫ້ປະເທດທີ່ມີສ່ວນກ່ຽວຂ້ອງເຈລະຈາໂດຍກົງຢ່າງມີໄມຕີຈິດແລະແກ້ໄຂໂດຍສັນຕິ. ສ່ວນຊ່ອງທາງການສົນທະນາແລະການເຈລະຈາລະຫວ່າງປະເທດທີ່ມີສ່ວນກ່ຽວຂ້ອງແມ່ນລຸລ່ວງ, ສະພາບລວມຂອງທະເລຈີນໃຕ້ແມ່ນມີສະຕິພາບແລະສະຖຽນລະພາບ, ນີ້ກໍ່ແມ່ນຄວາມຈິງ, ການແກ້ໄຂຄວາມຂັດແຍ່ງຢ່າງເໝາະສົມ, ພະຍາຍາມຫຼຸດຜ່ອນຄວາມຂັດແຍ່ງ, ເພີ່ມທະວີຄວາມໄວ້ເນື້ອເຊື່ອໃຈເລື້ອຍໆ, ເປີດກວ້າງການຮ່ວມມືຢ່າງຕັ້ງໜ້າ, ຮັກສາສັນຕິພາບແລະສະຖຽນລະພາບ, ແມ່ນສອດຄ່ອງກັບຜົນປະໂຫຍດຮ່ວມຂອງປະເທດຕ່າງໆໃນພາກພື້ນ, ກໍ່ແມ່ນທິດທາງຂອງປະເທດຕ່າງໆຄວນຮ່ວມກັນພະຍາຍາມ. ປະຈຸບັນ, ຈີນແລະປະເທດອາຊຽນໄດ້ຮັບຮອງການຈັດຕັ້ງປະຕິບັດ "ຖະແຫຼງການກ່ຽວກັບການເຄື່ອນໄຫວຂອງຝ່າຍຕ່າງໆຢູ່ທະເລຈີນໃຕ້", ນີ້ກໍ່ແມ່ນໝາກຜົນອັນຕັ້ງໜ້າທີ່ຝ່າຍຕ່າງໆຮ່ວມກັນພະຍາຍາມ.
ປະຈຸບັນ, ທ່ານຢາງເຈສືຍັງໄດ້ພົບປະກັບທ່ານເຄວິນ ຣູດ, ລັດຖະມົນຕີວ່າການກະຊວງການຕ່າງປະເທດອົສຕຼາລີ.
