ເພີ່ມທະວີການຮ່ວມມືລະຫວ່າງຈີນ-ອາຊຽນເພື່ອຊຸກຍູ້ໃຫ້ເສດຖະກິດພັດທະນາແລະຈະເລີນຮຸ່ງເຮືອງ
(GMT+08:00) 2011-07-25 16:55:23 cri
ກອງປະຊຸມລັດຖະມົນຕີການຕ່າງປະເທດຂອງເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນໄດ້ອັດລົງແລ້ວໃນຫວ່າງມໍ່ໆມານີ້ຢູ່ທີ່ເກາະບາຫຼີຂອງອິນໂດເນເຊຍ.ພາຍຫຼັງກອງປະຊຸມສິ້ນສຸດລົງ,ທ່ານຢາງເຈສື ລັດຖະມົນຕີວ່າການກະຊວງການຕ່າງປະເທດຈີນກ່າວວ່າ,ການຮ່ວມມືຮອບດ້ານໃນຂົງເຂດອັນກວ້າງຂວາງແລະມີຫຼາຍລະດັບລະຫວ່າງຈີນກັບອາຊຽນໄດ້ສ້າງພື້ນຖານອັນດີໃຫ້ແກ່ປະເທດຕ່າງໆເພື່ອບັນລຸກການໄດ້ຮັບຜົນປະໂຫຍດຮ່ວມກັນແລະພ້ອມກັນພັດທະນາ.
ທ່ານຢາງເຈສືກ່າວວ່າ,ຈີນອາຊຽນສ້າງຕັ້ງການພົວພັນຄູ່ເຈລະຈາໄລຍະ20ປີມານີ້,ໄດ້ຜ່ານຂະບວນການຂະຫຍາຍຕົວຈາກການສ້າງຕັ້ງການພົວພັນຄູ່ເຈລະຈາ,ການພົວພັນທີ່ມີຄວາມໄວ້ເນື້ອເຊື່ອໃຈກັນຖານບ້ານໃກ້ເຮືອນຄຽງທີ່ດີຕໍ່ກັນຕະຫຼອດມາຈົນກ້າວສູ່ການພົວພັນຄູ່ຮ່ວມມືຍຸດທະສາດ.ການຮ່ວມມືຕົວຈິງໃນຂົງເຂດຕ່າງໆລະຫວ່າງສອງຝ່າຍໄດ້ຂະຫຍາຍກວ້າງອອກແລະກ້າວສູ່ລວງເລິກຢ່າງບໍ່ຢຸດຢັ້ງ,ແລະໄດ້ຮັບໝາກຜົນອັນອຸດົມສົມບູນ.ເຂດການຄ້າເສລີຈີນ-ອາຊຽນໄດ້ສ້າງສຳເລັດຮອບດ້ານ.ຈີນເປັນຄູ່ຮ່ວມມືການຄ້າໃຫຍ່ທີ່ສຸດຂອງອາຊຽນ.ມູນຄ່າການຄ້າລະຫວ່າງສອງຝ່າຍ ຈາກ7ຕື້900ລ້ານໂດລາເມື່ອປີ1991ເພີ່ມຂຶ້ນເປັນ292ຕື້800ລ້ານໂດລາໃນປີ2010.ເລີ່ມແຕ່ເດືອນເມສາປີນີ້ເປັນຕົ້ນມາ,ອາຊຽນໄດ້ກາຍເປັນຄູ່ຮ່ວມມືການຄ້າໃຫຍ່ອັນດັບທີ4ຂອງຈີນ.
ໃນເວລາໃຫ້ສຳພາດຕໍ່ນັກຂ່າວ,ທ່ານສຸຣິນ ພິດສຸວັນ ເລຂາທິການໃຫຍ່ອາຊຽນກ່າວວ່າ,ການຂະຫຍາຍການພົວພັນອາຊຽນກັບຈີນມີຜົນດີໃນການຊຸກຍູ້ໃຫ້ພາກພື້ນອາຊີຕາເວັນອອກມີສະຖຽນລະພາບແລະເສດຖະກິດມີຄວາມຈະເລີນຮຸ່ງເຮືອງ.ອາຊຽນຫວັງຢາກມີສ່ວນຮ່ວມໃນການພັດທະນາເສດຖະກິດທີ່ເຕີບໃຫຍ່ຂະຫຍາຍຕົວຢ່າງວ່ອງໄວຂອງຈີນແລະສາມາດກາຍເປັນຜູ່ສະໜອງໃນຕ່ອງໂສ້ຂອງເສດຖະກິດຈີນ.
ທ່ານມາຕີ ນາຕາເລກາວາ ລັດຖະມົນຕີວ່າການກະຊວງການຕ່າງປະເທດອິນໂດເນເຊຍທັງເປັນປະທານກອງປະຊຸມເວທີປຶກສາຫາລືດ້ານການເມືອງແລະຄວາມໝັ້ນຄົງໃນພາກພື້ນອາຊຽນເທື່ອນີ້ກ່າວວ່າ,ອາຊຽນແລະຈີນລ້ວນແຕ່ຈະໄດ້ຮັບຜົນປະໂຫຍດຈາກການພົວພັນຄູ່ຮ່ວມມືຍຸດທະສາດລະຫວ່າງສອງຝ່າຍ.ອາຊຽນແລະຈີນດຳເນີນການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດພາຍໃຕ້ຂອບການພົວພັນຄູ່ຮ່ວມມືຍຸດທະສາດນັ້ນແມ່ນມີຜົນດີຕໍ່ສັນຕິພາບ,ສະຖຽນລະພາບແລະການພັດທະນາຂອງພາກພື້ນນີ້.
ທ່ານຢ່າງເຈສືຍັງກ່າວວ່າ,ຈີນແລະອາຊຽນໄດ້ຮ່ວມກັນສ້າງສິ່ງມະຫັດສະຈັນຢູ່ອາຊີຕາເວັນອອກໃນດ້ານການພັດທະນາເສດຖະກິດ,ກາຍເປັນແມ່ແຮງໃໝ່ທີ່ຊຸກຍູ້ໃຫ້ເສດຖະກິດໂລກຈະເລີນເຕີບໂຕ.ຈີນຈະຍຶດໝັ້ນຫຼັກການທີ່ຕ່າງຝ່າຍຕ່າງໄດ້ຮັບຜົນປະໂຫຍດ,ຜັນຂະຫຍາຍເປົ້າໝາຍ"ແຜນການດຳເນີນງານ5ປີຂອງການພົວພັນຄູ່ຮ່ວມມືຍຸດທະສາດຈີນ-ອາຊຽນ"ສະບັບທີສອງ,ພະຍາຍາມບັນລຸເປົ້າໝາຍຕ່າງໆເຊັ່ນເຮັດໃຫ້ມູນຄ່າການຄ້າລະຫວ່າງສອງຝ່າຍບັນລຸເຖິງ500ຕື້ໂດລາ.ເພີ່ມທະວີການເຊື່ອມໂຍງເຂົ້າກັນລະຫວ່າງວິສາຫາກິດ,ອຸດສາຫະກຳແລະຂະແໜງການຂອງສອງຝ່າຍ,ຍົກສູງລະດັບຄວາມສະດວກໃນດ້ານການຄ້າ,ການປັບປຸງການກໍ່ສ້າງເຂດການຄ້າເສລີຈີນ-ອາຊຽນ.
ທ່ານຢາງເຈສືຍັງກ່າວວ່າ,ຈີນຈະສະໜັບສະໜູນການປະຕິບັດແຜນແມ່ບົດເຊື່ອມໂຍງເຂົ້າກັນຂອງອາຊຽນແລະແຜນຍຸດທະສາດການຮ່ວມມືດ້ານຄົມມະນາຄົມລະຫວ່າງຈີນກັບອາຊຽນ,ຍິນດີຄົ້ນຄວ້າປຶກສາຫາລືກັບອາຊຽນຢ່າງຕັ້ງໜ້າເພື່ອຊຸກຍູ້ການເຊື່ອມໂຍງເຂົ້າກັນທາງທະເລ,ສ້າງສູນຈີນ-ອາຊຽນເພື່ອຊຸກຍູ້ການແລກປ່ຽນກັນໃນຂົງເຂດວຽກງານດ້ານຕ່າງໆເຊັ່ນເສດຖະກິດການຄ້າ,ການທ່ອງທ່ຽວ,ການສຶກສາ,ວັດທະນະທຳ,ສື່ມວນຊົນແລະຊາວໜຸ່ມ.
