ທ່ານຕ້າຍປີ໋ງກົ໊ວ,ທີ່ປຶກສາແຫ່ງລັດຈີນແລະທ່ານນາງຮິວລາຣີ ຄຼິນຕັນ,ລັດຖະມົນຕີວ່າການກະຊວງການຕ່າງປະເທດອາເມລິກາໄດ້ພົບປະກັນຢ່າງບໍ່ເປັນທາງການຢູ່ນະຄອນເຊີ່ນເຈີ້ນແຂວງກວາງຕຸ້ງຈີນໃນວັນທີ25ກໍລະກົດນີ້,ໃນເວລາພົບປະ, ສອງຝ່າຍໄດ້ແລກປ່ຽນຄໍາເຫັນຢ່າງເລິກເຊິ່ງກ່ຽວກັບການພົວພັນຈີນອາເມລິກາແລະບັນຫາທີ່ສົນໃຈນໍາກັນ.
ສອງຝ່າຍຍິນດີສືບຕໍ່ສຸມກໍາລັງເຂົ້າໃນການສ້າງສາການພົວພັນຄູ່ຮ່ວມມືຈີນອາເມລິກາທີ່ໃຫ້ຄວາມເຄົາລົບເຊິ່ງກັນແລະກັນ,ຕ່າງຝ່າຍຕ່າງມີຜົນປະໂຫຍດຢ່າງໝັ້ນຄົງບໍ່ປ່ຽນແປງ, ຮ່ວມກັນພະຍາຍາມເພື່ອເປີດກວ້າງຂົງເຂດຮ່ວມມືລະຫວ່າງສອງປະເທດ,ເຄົາລົບຜົນປະໂຫຍດແລະຄວາມສົນໃຈທີ່ສໍາຄັນຂອງສອງຝ່າຍ,ແກ້ໄຂຄວາມຂັດແຍ່ງຢ່າງເໝາະສົມ,ເພີ່ມຄວາມໄວ້ເນື້ອເຊື່ອໃຈກັນແບບຍຸດທະສາດ.
ທ່ານຕ້າຍປີ໋ງກົ໊ວໄດ້ກ່າວຢໍ້າຫລັກໝັ້ນອັນເດັດດ່ຽວຂອງຈີນກ່ຽວກັບບັນຫາໄຕ້ຫວັນແລະຕິເບດ.ສອງຝ່າຍເປັນເອກະສັນກ່າວວ່າ, ຈະຮ່ວມກັນຮັກສາແລະຊຸກຍູ້ການພັດທະນາໂດຍສັນຕິແລະຄວາມໝັ້ນທ່ຽງທີ່ລໍ້າຄ່າຂອງພາກພື້ນອາຊີປາຊີຟິກ,ແລະໄດ້ແລກປ່ຽນຄໍາເຫັນກ່ຽວກັບບັນຫາສະຖານະການໃນແຫລມເກົາຫລີເປັນຕົ້ນ. ສອງຝ່າຍຕົກລົງກັນວ່າ,ຈະສືບຕໍ່ຄວາມໃກ້ຊິດໃນການຮັກສາການຕິດຕໍ່ພົວພັນກັນດ້ວຍຫລາຍຮູບແບບ, ເພື່ອແລກປ່ຽນຄໍາເຫັນຢູ່ທຸກເວລາກ່ຽວກັບການພົວພັນຈີນອາເມລິກາແລະບັນຫາທີ່ອື່ນໆທີ່ສອງຝ່າຍມີຄວາມສົນໃຈນໍາກັນ.
