ຫວຽດນາມ, ກຳປູເຈຍ, ລາວແລະມຽນມາເພີ່ມທະວີການຮ່ວມມືດ້ານເສດຖະກິດ
(GMT+08:00) 2011-07-26 14:40:21 cri
ຕາມຂ່າວສານຊິ່ນຮວາ: ວັນທີ 25 ກໍລະກົດນີ້, ເຈົ້າໜ້າທີ່ອາວຸໂສແລະຜູ້ຕາງໜ້າຈາກຫວຽດນາມ, ລາວ, ກຳປູເຈຍແລະມຽນມາໄດ້ເຂົ້າຮ່ວມກອງປະຊຸມສຳມະນາຢູ່ນະຄອນຫຼວງຮ່າໂນ້ຍຂອງຫວຽດນາມ ເພື່ອປຶກສາຫາລືຮ່ວມກັນໃນການນຳໃຊ້ນະໂຍບາຍເສດຖະກິດໂລກາພິວັດໃຫ້ດີກວ່າເກົ່າເພື່ອຮັບໃຊ້ການພັດທະນາແບບຍືນຍົງຂອງແຕ່ລະປະເທດ.
ຂ່າວສານຫວຽດນາມແຈ້ງຂ່າວວ່າ, ຜູ້ແທນທີ່ເຂົ້າຮ່ວມປະຊຸມເຫັນດີວ່າ 4 ປະເທດຄວນເພີ່ມທະວີການຮ່ວມມືໃນອະນຸພາກພື້ນແມ່ນ້ຳຂອງ, ພາຍໃນພາກພື້ນອາຊຽນແລະພາກພື້ນຕ່າງໆ, ພະຍາຍາມສຸດຂີດເພື່ອກຳໂອກາດເສດຖະກິດໂລກາພິວັດ, ຫຼຸດຜ່ອນສິ່ງທ້າທາຍໃນດ້ານຕ່າງໆ. ໃນກອງປະຊຸມ, ທ່ານດ໋ວນຊ່ວນຮຸ່ງ, ລັດຖະມົນຕີຊ່ວຍວ່າການກະຊວງການຕ່າງປະເທດຫວຽດນາມສະເໜີໃຫ້ 4 ປະເທດຕັ້ງໜ້າເຂົ້າຮ່ວມຂະບວນການເສດຖະກິດໂລກາພິວັດ, ດຳເນີນການຮ່ວມມືກັນຢ່າງໃກ້ຊິດເພື່ອເຊື່ອມໂຍງເຂົ້າເປັນປະຊາຄົມອາຊຽນ.
ຜູ້ແທນທະນາຄານພັດທະນາອາຊີປະຈຳຫວຽດນາມທີ່ຮ່ວມປະຊຸມໃຫ້ແຈ້ງວ່າ, ທະນາຄານພັດທະນາອາຊີຈະຮ່ວມມືກັບ 4 ປະເທດນີ້ຕື່ມອີກ, ເພື່ອຊ່ວຍເຫຼືອ 4 ປະເທດເຂົ້າຮ່ວມເສດຖະກິດໂລກາພິວັດໂດຍຜ່ານກົນໄກຮ່ວມມືອະນຸພາກພື້ນແມ່ນ້ຳຂອງ, ພ້ອມທັງຮັກສາການພັດທະນາແບບຍືນຍົງຂອງເສດຖະກິດ.
