ຈີນອາຊຽນໄດ້ຮັບໝາກຜົນອັນເດັ່ນຊັດໃນການຮ່ວມມືດ້ານເສດຖະກິດການຄ້ານັບຕັ້ງແຕ່ສ້າງຕັ້ງການພົວພັນຄູ່ເຈລະຈາເປັນຕົ້ນມາ
(GMT+08:00) 2011-07-26 18:19:56 cri
ປີນີ້ເປັນປີທີ່ຈີນອາຊຽນສ້າງຕັ້ງການພົວພັນຄູ່ເຈລະຈາຄົບຮອບ20ປີ.ວັນທີ26ກໍລະກົດນີ້,ທ່ານເກົາຫູເຊີງ,ຜູ່ຕາງໜ້າການເຈລະຈາການຄ້າສາກົນ,ທັງເປັນລັດຖະມົນຕີຊ່ວຍວ່າການກະຊວງການຄ້າຈີນກ່າວວ່າ,20ປີມານີ້,ການຄ້າລະຫວ່າງຈີນກັບອາຊຽນໄດ້ຮັບການພັດທະນາດ້ວຍຄວາມໄວສູງ,ການຮ່ວມມືດ້ານເສດຖະກິດການຄ້າໄດ້ຮັບໝາກຜົນອັນເດັ່ນຊັດ.
ໃນວັນທີ26ກໍລະກົດນີ້,ຫ້ອງການຖະແຫຼງຂ່າວຂອງລັດຖະບານຈີນໄດ້ຈັດກອງປະ ຊຸມຂ່າວ,ແນະນຳສະພາບການຕ່າງໆ ຄື:ໝາກຜົນດ້ານເສດຖະກິດການຄ້າໃນໄລຍະ20ປີ ທີ່ຈີນອາຊຽນສ້າງຕັ້ງການພົວພັນຄູ່ເຈລະຈາເປັນຕົ້ນມາ,ແລະສະພາບການຂອງງານວາງສະແດງສິນຄ້າຈີນ-ອາຊຽນຄັ້ງທີ8,ກອງປະຊຸມສຸດຍອດດ້ານການຄ້າການລົງທຶນຈີນ-ອາຊຽນຄັ້ງທີ8.ທ່ານເກົາຫູເຊີງກ່າວວ່າ,ປະຈຸບັນນີ້,ຈີນໄດ້ກາຍເປັນຄູ່ການຄ້າໃຫຍ່ອັນດັບໜຶ່ງຂອງອາຊຽນ.
ທ່ານກ່າວວ່າ:"ປີ1991,ມູນຄ່າການຄ້າລະຫວ່າງຈີນກັບອາຊຽນມີພຽງແຕ່7ຕື້960ລ້ານໂດລາສະຫະລັດ.ປີ2010,ມູນຄ່າການຄ້າລະຫວ່າງສອງຝ່າຍມີເຖິງ292ຕື້780ລ້ານໂດລາສະຫະລັດ,ເພີ່ມຂຶ້ນ37ເທົ່າ.ປະຈຸບັນນີ້,ຈີນໄດ້ກາຍເປັນຄູ່ການຄ້າໃຫຍ່ອັນດັບໜຶ່ງຂອງອາຊຽນ,ອາຊຽນກໍ່ໄດ້ເຂົ້າແທນຍີ່ປຸ່ນ,ກາຍເປັນຄູ່ການຄ້າໃຫຍ່ອັນດັບສາມຂອງຈີນ."
ໃນ20ປີຜ່ານມາ,ການລົງທຶນແກ່ກັນລະຫວ່າງຈີນກັບບັນດາປະເທດອາຊຽນເພີ່ມຂຶ້ນຢ່າງບໍ່ຢຸດຢັ້ງ,ນັບມາຮອດທ້າຍເດືອນມິຖຸນາປີນີ້,ນັບລວມເຂົ້າກັນແລ້ວ,ມູນຄ່າການລົງທຶນທັງໝົດມີເຖິງ80ຕື້ໂດລາ.
ໃນວັນທີ1ມັງກອນປີ2010,ເຂດການຄ້າເສລີຈີນອາຊຽນໄດ້ສ້າງຕັ້ງຂຶ້ນຕາມເວລາກຳນົດ.ທ່ານເກົາຫູເຊີງກ່າວວ່າ,ການສ້າງຕັ້ງເຂດການຄ້າເສລີຈີນ-ອາຊຽນໄດ້ສົ່ງຜົນປະ ໂຫຍດອັນແທ້ຈິງໃຫ້ແກ່ວິສາຫະກິດແລະປະຊາຊົນຂອງສອງຝ່າຍ.
ທ່ານກ່າວວ່າ:"ນັບຕັ້ງແຕ່ເຂດການຄ້າເສລີຈີນອາຊຽນສ້າງຕັ້ງຂຶ້ນມານີ້,ສອງຝ່າຍມີຜະລິດຕະພັນຫຼາຍກວ່າ90%ໄດ້ປະຕິບັດນະໂຍບາຍຍົນເວັ້ນພາສີ.ພາສີສະເລ່ຍທີ່ຈີນເກັບນຳອາຊຽນຈາກ9,8%ຫຼຸດລົງເປັນ1%,ພາສີທີ່6ປະເທດສະມາຊິກເກົ່າຂອງອາຊຽນເກັບນຳຈີນຈາກ12,8%ຫຼຸດລົງເປັນ0,6%.ລະດັບພາສີຫຼຸດລົງຢ່າງຫຼວງຫຼາຍຄືແນວນີ້ໄດ້ຊຸກຍູ້ໃຫ້ການຄ້າລະ ຫວ່າງສອງຝ່າຍພັດທະນາຢ່າງວ່ອງໄວ."
ງານວາງສະແດງສິນຄ້າຈີນ-ອາຊຽນຄັ້ງທີ8,ກອງປະຊຸມສຸດຍອດດ້ານການຄ້າການລົງທຶນຈີນ-ອາຊຽນຄັ້ງທີ8ຈະຈັດຂຶ້ນຢູ່ນະຄອນນານນີງຂອງຈີນໃນເດືອນຕຸລາປີນີ້,ປະຈຸບັນນີ້,ວຽກງານການກະກຽມພວມດຳເນີນໄປຢ່າງມີປະສິດທິຜົນ.ນອກຈາກຈີນແລະ10ປະເທດອາຊຽນແລ້ວ,ປະຈຸບັນນີ້,ໄດ້ມີຄະນະຈັດຊື້ແລະຄະນະການຄ້າຂອງອີຕາລີ,ຝະຣັ່ງ,ເຢຍລະມັນ,ຍີ່ປຸ່ນແລະສ.ເກົາຫຼີສະເໜີຈຸດປະສົງເຂົ້າຮ່ວມນຳຕື່ມອີກ.ທ່ານເກົາຫູເຊີງກ່າວວ່າ:"ພວກຂ້າພະເຈົ້າຈະຍຶດໝັ້ນຮູບແບບຈັດງານວາງສະແດງສິນຄ້າຈີນ-ອາຊຽນທີ່ສອງຝ່າຍຮ່ວມກັນຈັດຂຶ້ນແລະໄດ້ຮັບຜົນປະໂຫຍດຮ່ວມກັນ,ປະດິດສ້າງເນື້ອໃນໃໝ່,ເຮັດໃຫ້ງານວາງສະແດງມີສີສັນພິເສດແລະຜົນສຳເລັດດີກວ່າເກົ່າ,ປະກອບສ່ວນເຂົ້າໃນການສ້າງສາເຂດການຄ້າເສລີຈີນ-ອາຊຽນ,ແລະລົງເລິກການຮ່ວມມືຢ່າງຮອບດ້ານລະຫວ່າງສອງຝ່າຍໃຫ້ມີຜົນສຳເລັດອັນໃໝ່ໃຫຍ່ຫຼວງກວ່າເກົ່າ."
