ຜູ່ຊ່ຽວຊານກ່າວວ່າຈີນພັດທະນາກ່ຳປັ່ນບັນທຸກເຮືອບິນຈະບໍ່ເປັນໄພຂົ່ມຂູ່ຕໍ່ປະເທດອື່ນ
(GMT+08:00) 2011-08-04 19:18:00 cri
ໂດຍແນໃສ່ຂ່າວກ່ຽວກັບຈີນປະກາດໃນຫວ່າງມໍ່ໆມານີ້ວ່າພວມດັດແປງແທ່ນກ່ຳປັ່ນບັນທຸກເຮືອບິນລຳໜຶ່ງທີ່ເຊົາໃຊ້ແລ້ວເພື່ອນຳໃຊ້ເຂົ້າໃນການຄົ້ນຄວ້າທາງວິທະຍາສາດແລະການຝຶກຊ້ອມ,ພົນຕີອິນໂຈ ຊ່ຽວຊານການທະຫານຂອງຈີນກ່າວໃນຫວ່າງມໍ່ໆມານີ້ວ່າ,ຈີນພັດທະນາກ່ຳປັ່ນບັນທຸກເຮືອບິນຈະບໍ່ເປັນໄພຂົ່ມຂູ່ຕໍ່ປະເທດອື່ນ.ນະໂຍບາຍປ້ອງກັນປະເທດແບບປ້ອງກັນຕົນເອງຂອງຈີນຈະບໍ່ປ່ຽນແປງຍ້ອນການພັດທະນາກ່ຳປັ່ນບັນທຸກເຮືອບິນ,ນະໂຍບາຍການຕ່າງປະເທດທີ່ມີສັນຕິພາບ,ເອກະລາດແລະເປັນເຈົ້າຕົນເອງຂອງຈີນກໍ່ຈະບໍ່ປ່ຽນແປງຢ່າງເດັດຂາດຍ້ອນໄດ້ພັດທະນາກ່ຳປັ່ນບັນທຸກເຮືອບິນ.
ທ່ານອິນໂຈກ່າວວ່າ,ການດັດແປງກ່ຳປັ່ນບັນທຸກເຮືອບິນ"ວາລຽນເກ"(Varyange)ແມ່ນເສັ້ນທາງພັດທະນາກ່ຳປັ່ນບັນທຸກເຮືອບິນທີ່ມີສີສັນພິເສດຂອງຈີນ.ເລີ່ມຈາກການດັດແປງແທ່ນກ່ຳປັ່ນບັນທຸກເຮືອບິນທີ່ເຊົາໃຊ້ແລ້ວ,ຜ່ານຂະບວນການນຳເຂົ້າ,ຖອດຖອນບົດຮຽນແລະປະດິດສ້າງໃໝ່,ນີ້ແມ່ນເສັ້ນທາງພັດທະນາກ່ຳປັ່ນບັນທຸກເຮືອບິນທີ່ມີສີສັນພິເສດຂອງຈີນເຊິ່ງເປັນຂີດໝາຍສະແດງໃຫ້ເຫັນວ່າຈີນຈະປ່ຽນແປງປະຫວັດສາດທີ່ບໍ່ມີກ່ຳປັ່ນບັນທຸກເຮືອບິນ.
ທ່ານອິນໂຈຊີ້ອອກວ່າ,ຈີນພັດທະນາກ່ຳປັ່ນບັນທຸກເຮືອບິນແມ່ນເລື່ອງທີ່ຕ້ອງເປັນໄປໃນປະຫວັດສາດ.ຈີນດັດແປງກ່ຳປັ່ນບັນທຸກເຮືອບິນ"ວາລຽນເກ"(Varyange)ແມ່ນຖືກຕ້ອງກັບກົດເກນກໍ່ສ້າງແລະພັດທະນາກອງທັບຂອງປະເທດຕ່າງໆ.ປະຈຸບັນ,ຄວາມສາມາດໃນການປ້ອງກັນທາງທະເລຂອງກອງທັບເຮືອຈີນຍັງບໍ່ສາມາດຕອບສະໜອງຄວາມຮຽກຮ້ອງຕ້ອງການໃນການປະຕິບັດໜ້າທີ່ຢ່າງພຽງພໍ.ກອງທັບເຮືອຕ້ອງການມີກ່ຳປັ່ນບັນທຸກເຮືອບິນເພື່ອປົກປັກຮັກສາຄວາມໝັ້ນຄົງແຫ່ງຊາດແລະຜົນປະໂຫຍດດ້ານການພັດທະນາໃຫ້ດີກວ່າເກົ່າ.ພ້ອມກັນນັ້ນ,ທ່ານອິນໂຈຍັງກ່າວເນັ້ນວ່າ, ຈີນພັດທະນາກ່ຳປັ່ນບັນທຸກເຮືອບິນຈະບໍ່ເປັນໄພຂົ່ມຂູ່ຕໍ່ປະເທດອື່ນ,ປະເທດຕາເວັນຕົກຄວນຍອມຮັບ ສະພາບຄວາມເປັນຈິງກ່ຽວກັບຈີນພັດທະນາກ່ຳປັ່ນບັນທຸກເຮືອບິນຂອງຈີນ.
