ຄວາມວິຕົກກັງວົນໃນຕະຫຼາດພາໃຫ້ຕົວເລກດັດຊະນີຕະຫຼາດຫຸ້ນແລະລາຄານ້ຳມັນໃນທົ່ວໂລກຕົກຕ່ຳລົງຢ່າງຫຼວງຫຼາຍ
(GMT+08:00) 2011-08-05 18:43:20 cri
ເນື່ອງຈາກວ່ານັກລົງທຶນເບິ່ງອະນາຄົດຂອງເສດຖະກິດໄປໃນທາງລົບຊຶ່ງພາໃຫ້ເກີດມີຄວາມວິຕົກກັງວົນຢ່າງກວ້າງຂວາງໃນຕະຫຼາດ,ສະນັ້ນ,ຕົວເລກດັດຊະນີຂອງຕະຫຼາດຫຸ້ນທີ່ສຳຄັນໃນໂລກຈິ່ງຕົກຕ່ຳລົງເປັນປະຫວັດການໃນວັນທີ4ສິງຫານີ້.ເວົ້າສຳລັບຕະຫຼາດຫຸ້ນອາເມລິກາແລ້ວ,ວັນທີ4ສິງຫາເປັນມື້ທີ່ຕົວເລກດັດຊະນີຕົກລົງຕ່ຳທີ່ສຸດນັບແຕ່ຕັ້ງເກີດວິກິດການການເງິນໂລກແຕ່ປີ2008ມານີ້,ຄືຕົວເລກດັດຊະນີຂອງຕະຫຼາດຫຸ້ນທີ່ສຳຄັນ3ແຫ່ງລ້ວນແຕ່ຕົກຕ່ຳລົງກາຍ4%.ຕະຫຼາດຫຸ້ນທີ່ສຳຄັນຂອງເອີລົບໂດຍທົ່ວໄປລ້ວນແຕ່ຕົກຕ່ຳລົງຢ່າງຫຼວງຫຼາຍຄືລ້ວນແຕ່ຕົກລົງຫຼາຍກວ່າ3%.ຕະຫຼາດຫຸ້ນໃນທະວີບອາເມລິກາລາຕິນກໍ່ປະສົບຄວາມເສຍຫາຍຢ່າງໜັກໜ່ວງ,ຕົວເລກດັດຊະນີຂອງຫຸ້ນສ່ວນທີ່ສຳຄັນລ້ວນແຕ່ຕົກຕ່ຳລົງຫຼາຍກວ່າ5%.ໃນສະພາບທີ່ຕະຫຼາດຫຸ້ນເອີລົບ,ອາເມລິກາແລະທະວີບອາເມລິກາລາຕິນຕົກຕ່ຳລົງຄືແນວນີ້,ວັນທີ5ສິງຫານີ້,ຕະຫຼາດຫຼຸ້ນຂອງອາຊີໂດຍທົ່ວໄປກໍ່ຕົກຕ່ຳລົງຢ່າງຫຼວງຫຼາຍໃນເວລາເປີດຕະຫຼາດ.ນອກນີ້,ລາຄານ້ຳມັນຕະຫຼາດໂລກໃນວັນທີ4ສິງຫານີ້ກໍ່ ຕົກຕ່ຳລົງຫຼາຍກວ່າ5%,ໃນຕະຫຼາດນ້ຳມັນດິບໄດ້ປະກົດມີສະພາບການທີ່ພາກັນທຸ້ມເທຂາຍນ້ຳມັນຢ່າງຫຼວງຫຼາຍ.
ນັກວິເຄາະເຫັນວ່າ,ສາເຫດຕົ້ນຕໍທີ່ພາໃຫ້ຕະຫຼາດຫຸ້ນໃນທົ່ວໂລກຕົກຕ່ຳລົງຢ່າງຫຼວງຫຼາຍເທື່ອນີ້ມີ2ຂໍ້,ຄືອັນທີໜຶ່ງ,ວິກິດການໜີ້ສິນພາກລັດຂອງເອີລົບແຜ່ລາມອອກພາໃຫ້ຜູ່ລົງທຶນມີຄວາມວິຕົກກັງວົນ.ອັນທີສອງ,ອາເມລິກາຫາກໍ່ພົ້ນອອກຈາກຄວາມສ່ຽງທີ່ຈະລະເມີດສັນຍາໜີ້ສິນ,ແຕ່ຖືກລະແວງສົງໃສທີ່ອາດຈະເກີດສະພາບເສດຖະກິດຊຸດໂຊມລົງເປັນເທື່ອທີສອງ.ນອກນີ້,ປະເທດທີ່ເປັນຕະຫຼາດຈະເລີນໃໝ່ໃນຖານະເປັນ"ຫົວລົດໄຟ"ຂອງເສດຖະກິດໂລກຫຼັງວິກິດການການເງິນສາກົນນັ້ນພາກັນປະຕິບັດນະໂຍບາຍເງິນຕາແບບຮັດກຸມຍ້ອນໄດ້ຮັບຄວາມກົດດັນດ້ານເງິນເຟີ້,ການພັດທະນາເສດຖະກິດຂອງປະເທດເຫຼົ່ານີ້ກໍ່ມີທ່າອ່ຽງທີ່ຈະຄ່ອຍໆຊ້າລົງ.
