ADBຮຽກຮ້ອງໃຫ້ຕະຫຼາດທີ່ຈະເລີນໃໝ່ໃນອາຊີໃຊ້ມາດຕະການຮັບມືກັບຜົນການຫຼຸດລະດັບການປະເມີນຜົນຕໍ່ຄວາມໜ້າເຊື່ອຖືໃນການຊຳລະໜີ້ສິນຂອງອາເມລິກາຕ່ຳລົງ
(GMT+08:00) 2011-08-10 11:03:24 cri
ຕາມຂ່າວສານຊິນຮວາ,ວັນທີ9ສິງຫານີ້,ທະນາຄານພັດທະນາອາຊີຫຼືADBເຊິ່ງມີສຳນັກງານໃຫຍ່ຕັ້ງຢູ່ມານີລາປະເທດຟີລິບປິນໄດ້ຮຽກຮ້ອງໃຫ້ຕະຫຼາດທີ່ຈະເລີນໃໝ່ໃນອາຊີສ້າງນະໂຍບາຍເສດຖະກິດທີ່ເຂັ້ມແຂງເພື່ອກະຕຸ້ນໃຫ້ນັກລົງທຶນມີຄວາມເຊື່ອໝັ້ນ ເພີ່ມຂຶ້ນ,ຫຼຸດຜ່ອນຄວາມປັ່ນປ່ວນຈົນເກີນໄປຂອງຕະຫຼາດ,ຮັກສາຄວາມຄ່ອງຕົວຂອງເສດຖະກິດເພື່ອຮັບມືກັບຜົນສະທ້ອນທາງລົບທີ່ມາຈາກລະດັບການປະເມີນຜົນຕໍ່ຄວາມໜ້າເຊື່ອຖືຂອງລັດຖະບານອາເມລິກາຖືກຫຼຸດຕ່ຳລົງແລະອະນາຄົດຂອງເສດຖະກິເອີລົບບໍ່ສົດໃສ.
ບົດລາຍງານຂອງADBຂຽນວ່າ,ໃນບໍ່ເທົ່າໃດເດືອນມານີ້,ສະພາບແວດລ້ອມທາງດ້ານການເງິນທົ່ວໂລກບໍ່ມີຄວາມໝັ້ນທ່ຽງ,ຕະຫຼາດອາຊີຕ້ອງໄດ້ຮັບຜົນກະທົບແນ່ນອນ,ແຕ່ເນື່ອງຈາກວ່າໂດຍພື້ນຖານແລ້ວ,ເສດຖະກິດອາຊີຢູ່ໃນສະພາບທີ່ດີແລະອັດຕາດອກເບັ້ຍກັບປະເທດທີ່ພັດທະນາແລ້ວມີຄວາມແຕກຕ່າງກັນ,ສະນັ້ນ,ເງິນທຶນທີ່ມາຈາກພາຍນອກ ອາດຈະໄຫຼເຂົ້າສູ່ພາກພື້ນອາຊີໃນ6ເດືອນທ້າຍປີນີ້ຫຼາຍກວ່າເກົ່າ.
ບົດລາຍງານກ່າວເຕືອນວ່າ,ເບິ່ງຈາກສະພາບໃນປະຫວັດສາດແລ້ວ,ທຶນໄລຍະສັ້ນໄຫຼເຂົ້າປະເທດໃດໜຶ່ງຢ່າງຫຼວງຫຼາຍມັກຈະມີຜົນກະທົບຕໍ່ຄວາມເປັນລະບຽບຮຽບຮ້ອຍຂອງນະໂຍບາຍເງິນຕາຂອງປະເທດນັ້ນ,ທຳລາຍຄວາມໝັ້ນທ່ຽງຂອງລະບົບການເງິນແລະກະທົບເຖິງການເຕີບໂຕຂອງເສດຖະກິດ.
ບົດລາຍງານຊີ້ອອກວ່າ,ຕະຫຼາດທີ່ຈະເລີນໃໝ່ຂອງອາຊີມີຄວາມອ່ອນໄຫວຕໍ່ຄວາມປັ່ນປ່ວນທາງດ້ານເສດຖະກິດຈາກພາຍນອກເຊິ່ງສແດງໃຫ້ເຫັນວ່າອາຊີມີຄວາມຈຳເປັນຕ້ອງມີຄວາມພະຍາຍາມຮ່ວມກັນເພື່ອເສີມຂະຫຍາຍຄວາມສາມາດໃນການປັບຕົວໃຫ້ເຂົ້າກັບສະພາບຕົວຈິງຂອງຕະຫຼາດ.
ຕາມADBຄາດຄະເນວ່າ,ຈັງຫວະການເຕີບໂຕທາງດ້ານເສດຖະກິດຂອງຕະຫຼາດທີ່ຈະເລີນໃໝ່ຂອງອາຊີໃນປີນີ້ຈະບັນລຸເຖິງ7,9%, ຈະເຕີບໂຕ7,8%ໃນປີໜ້າ.
