ຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກາບໍ່ໝັ້ນທ່ຽງ,ສົ່ງຜົນກະທົບກະເທືອນຕໍ່ເສດຖະກິດຂອງອາຊີ
(GMT+08:00) 2011-08-10 16:34:03 cri
ເຫດການການຍົກສູງເພດານໜີ້ສິນຂອງອາເມລິກາທີ່ເກີດມີການປ່ຽນແປງເລື່ອຍໆໃນສອງເດືອນມານີ້ໄດ້ທຳລາຍຊື່ສຽງຂອງອາເມລິກາຢ່າງຈະແຈ້ງ.ຄວາມໜ້າເຊື່ອຖືໃນການຊຳລະໜີ້ຂອງອາເມລິກາບໍ່ໝັ້ນທ່ຽງແມ່ນຄວາມສ່ຽງທີ່ແອບແຝງຕໍ່ເສດຖະກິດໂລກ,ກໍ່ຈະເຮັດໃຫ້ເສດຖະກິດອາຊີຖືກກະທົບກະເທືອນຢ່າງຮ້າຍແຮງ.
ເຈົ້າໜ້າທີ່ຜູ່ໜຶ່ງຂອງທະນາຄານພັດທະນາອາຊີກ່າວວ່າ,ຄວາມປັ່ນປ່ວນຂອງຕະຫຼາດ ການເງິນສາກົນໃນຫຼາຍເດືອນມານີ້ເຮັດໃຫ້ເງິນທຶນທີ່ໄຫຼເຂົ້າສູ່ຕະຫຼາດຈະເລີນໃໝ່ຂອງອາຊີນັ້ນຫຼຸດໜ້ອຍລົງ,ແຕ່ຄາດວ່າໃນໄລຍະຂ້າງໜ້າ,ອະນາຄົດອັນສົດໃສຂອງເສດຖະກິດອາຊີແລະອັດຕາໄດ້ກຳໄລຈາກການລົງທຶນທີ່ສູງກວ່າບ່ອນອື່ນຈະເຮັດໃຫ້ເງິນທຶນສາກົນມີຄວາມກະຕືລືລົ້ນທີ່ຈະໄຫຼເຂົ້າສູ່ອາຊີຄືນໃໝ່.
ເງິນທຶນໄລຍະສັ້ນຈຳນວນຫຼວງຫຼາຍຈາກອາເມລິກາໄຫຼເຂົ້າສູ່ຕະຫຼາດຈະເລີນໃໝ່,ໂດຍ ສະເພາະແມ່ນຕະຫຼາດໃນອາຊີ,ຈະສົ່ງຜົນເຮັດໃຫ້ເງິນຕາອາຊີແຂງຄ່າຂຶ້ນຢ່າງຫຼວງຫຼາຍ,ແລ້ວຈະສົ່ງຜົນກະທົບກະເທືອນເຖິງການຄ້າຂາອອກທັງເປັນໄພອັນຕະລາຍເຖິງຄວາມໝັ້ນທ່ຽງດ້ານການເງິນຂອງອາຊີ.ຫວ່າງມໍ່ໆມານີ້,ອັດຕາແລກປ່ຽນລະຫວ່າງເງິນຕາປະເທດອາຊີກັບໂດລາສະຫະລັດອາເມລິກາຢູ່ໃນທ່ວງທ່າທີ່ຖີບຕົວສູງຂຶ້ນຕະຫຼອດ.ທ່ານລິວລີ້ກ່າງ,ນັກເສດຖະສາດຈີນເຫັນວ່າ,ໃນສະພາບການປະຈຸບັນນີ້,ບັນດາປະເທດອາຊີ,ເຊິ່ງລວມທັງຈີນຕ້ອງເອົາໃຈໃສ່ຄຸ້ມຄອງນະໂຍບາຍເສດຖະກິດມະຫາພາກໃຫ້ໄດ້ເປັນຢ່າງດີ.ທ່ານກ່າວເນັ້ນວ່າ,ປະເທດອາຊີຕ້ອງໃຊ້ມາດຕະການອັດຕາແລກປ່ຽນທີ່ຄ່ອງແຄ້ວ,ຊຳລະແກ້ໄຂການພັດທະນາແລະການໄຂປະຕູສູ່ພາຍນອກຂອງຕະຫຼາດການເງິນໃຫ້ດີ,ໂດຍສະເພາະແມ່ນສ້າງສາຕະຫຼາດການເງິນພາຍໃນປະເທດໃຫ້ສົມບູນກວ່າເກົ່າ.
ທ່ານຫົວໜ້າສະຖາບັນຄົ້ນຄວ້າຍຸດທະສາດແລະບັນຫາສາກົນຂອງມະເລເຊຍກ່າວວ່າ, ປະຈຸບັນນີ້,ລັດຖະບານອາເມລິກາມີຄວາມສາມາດແລະມີພາຫະນະທີ່ກະຕຸ້ນເສດຖະກິດບໍ່ຫຼາຍປານໃດ,ສະນັ້ນ,ເສດຖະກິດອາເມລິກາມີຄວາມອາດເປັນໄປໄດ້ຫຼາຍທີ່ສຸດທີ່ຈະເກີດການຊຸດໂຊມລົງອີກເປັນເທື່ອທີສອງ.ຢູ່ອາຊີ,ເຖິງວ່າເສດຖະກິດຂອງຈີນແລະອິນເດຍພັດ ທະນາຢ່າງວ່ອງໄວກໍ່ຕາມ,ແຕ່ຍັງບໍ່ສາມາດເຂົ້າແທນຖານະບົດບາດຂອງເສດຖະກິດອາເມລິກາໄດ້.ສະນັ້ນ,ບັນຫາໜີ້ສິນຂອງອາເມລິກາແລະເສດຖະກິດອາເມລິກາຫຼຸດລົງ,ຈະເກີດຜົນກະທົບຢ່າງຈະແຈ້ງຕໍ່ອາຊີ.ປະຈຸບັນນີ້,ຍ້ອນວ່າບາງປະເທດອາຊີໄດ້ມີຂຸມການເງິນອ່າວຫຼາຍແລະປະສົບຄວາມກົດດັນຈາກໄພເງິນເຟີ້ຢ່າງຮ້າຍແຮງ,ສະນັ້ນ,ຖ້າສືບຕໍ່ໃຊ້ນະໂຍບາຍກະຕຸ້ນສາທາລະນະຕໍ່ໄປ,ຕ້ອງປະຕິບັດຢ່າງລະມັດລະວັງທີ່ສຸດ,ຖ້າຫາກວ່າມີການນຳໃຊ້ມາດຕະການກະຕຸ້ນຄວາມຕ້ອງການທາງດ້ານເສດຖະກິດຂອງພາກສ່ວນເອກະຊົນແລ້ວ,ຈະແມ່ນມາດຕະການທີ່ດີກວ່າ.
