ຕາມຂ່າວCRI: ກອງປະຊຸມໃຫຍ່ຜູ້ແທນຊາວໜຸ່ມລາວທົ່ວປະເທດຄັ້ງທີ 6 ຈະຈັດຂຶ້ນຢູ່ນະຄອນຫຼວງວຽງຈັນແຕ່ວັນທີ 23 ຫາວັນທີ 24 ສິງຫານີ້, .
ໃນວັນທີ 16 ສິງຫານີ້ໄດ້ມິກອງປະຊຸມຖະແຫຼງຂ່າວຈັດຂຶ້ນຢູ່ວຽງຈັນໂດຍການເປັນປະທານຂອງທ່ານ ດຣ ວິໄລວົງ ບຸດດາຄຳ ຮັກສາການເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ທ່ານກ່າວວ່າ:"ກອງປະຊຸມຜູ້ແທນຊາວໜຸ່ມລາວທົ່ວປະເທດຈະຈັດຂື້ນຢ່າງເປັນທາງການໃນວັນທີ23 ຫາວັນທີ 24 ສິງຫານີ້ ທີ່ນະຄອນຫລວງວຽງຈັນ, ຊຶ່ງຈະມີຜູ້ແທນຊາວໜຸ່ມສົມບູນ 405 ສະຫາຍເຊິ່ງເປັນຕົວແທນໃຫ້ສະມາຊິກຊາວໜຸ່ມທົ່ວປະເທດຈຳນວນ 4 ແສນ 6 ໝື່ນ 7 ພັນກວ່າຄົນ,ຖ້າທຽບໃສ່ກອງປະຊຸມໃຫຍ່ຄັ້ງທີ 5 ແມ່ນເພີ່ມຂື້ນ 36 ສະຫາຍ. ໃນກອງປະຊຸມຄັ້ງນີ້ຈະໄດ້ທົບທວນຄືນເຖິງຜົນງານແລະໄຊຊະນະໃນການຈັດຕັ້ງປະຕິບັດມະຕິກອງປະຊຸມໃຫ່ຍຄັ້ງທີ່ 5 ຜ່ານມາແລະຈະໄດ້ຄົ້ນຄ້ວາປະກອບຄຳເຫັນເພື່ອກຳນົດທິດທາງແຜນການສູ້ຊົນ 5 ປີຕໍ່ໜ້າ, ທົບທວນຄືນຂໍ້ແຂ່ງຂັນ 2 ສາມັກຄີ 3 ດີ 4 ພັດທະນາແລະກຳນົດເນື້ອໃນ 4 ບຸກ, ພ້ອມນັ້ນກອງປະຊຸມຄັ້ງປະຖົມມະລືກຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວສະໄໝທີ່ 6 ຈະໄດ້ລົງມະຕິຮັບຮອງເອົາການສະເໜີເລຂາ, ຮອງເລຂາ, ປະທານກວດກາແລະຄະນະເລຂາທິການສູນກາງຊາວໜຸ່ມປະຊາຊົນປະຕິວັດລາວສະໄໝທີ 6."
ກອງປະຊຸມໃຫຍ່ຜູ້ແທນຊາວໜຸ່ມລາວທົ່ວປະເທດຈັດຂຶ້ນ 5 ປີເທື່ອໜຶ່ງ,ສຳລັບກອງປະຊຸມຄົບຄະນະຂອງຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວແມ່ນຈັດຂຶ້ນປີລະເທື່ອ.
