ກົມຄຸ້ມຄອງການເງິນຂອງສິງກະໂປກ່າວວ່າຈະບໍ່ຫຼຸດພັນທະບັດຂອງລັດຖະບານອາເມລິກາ
(GMT+08:00) 2011-08-17 11:04:18 cri
ຫວ່າງມໍ່ໆມານີ້, ເຈົ້າໜ້າທີ່ກົມຄຸ້ມຄອງການເງິນຂອງສິງກະໂປກາວວ່າ, ເຖິງວ່າບໍລິສັດສະແຕນດາດ ແອນດ໌ ປົວ ເຣດຕິງ ເຊີວິສໄດ້ຫຼຸດລະດັບຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກາຕ່ຳລົງ, ຄວາມສ່ຽງທາງພັນທະບັດຂອງລັດຖະບານອາເມລິກາເພີ່ມຂຶ້ນຕື່ມອີກກໍ່ຕາມ, ແຕ່ສິງກະໂປເຫັນວ່າ, ປະຈຸບັນນີ້ພັນທະບັດຂອງລັດຖະບານອາເມລິກາຍັງເປັນປະເພດຫຼັກຊັບທີ່ປອດໄພທີ່ສຸດໃນໂລກ, ສະນັ້ນຈະບໍ່ຫຼຸດການຖືພັນທະບັດຂອງລັດຖະບານອາເມລິກາ.
ເຈົ້າໜ້າທີ່ທ່ານນີ້ເຫັນວ່າ, ປະຈຸບັນໃນຕະຫຼາດຍັງບໍ່ທັນມີປະເພດຫຼັກຊັບທີ່ສາມາດທົດແທນພັນທະບັດຂອງລັດຖະບານອາເມລິກາໄດ້, ສະນັ້ນຈະບໍ່ມີຜົນກະທົບເຖິງການປະເມີນຄວາມສ່ຽງຂອງສິງກະໂປຕໍ່ພັນທະບັດຂອງລັດຖະບານອາເມລິກາ. ໃນການປະຕິບັດຕໍ່ບັນຫາຫຼຸດລະດັບຄວາມໜ້າເຊື່ອຖືໃນກນຊຳລະໜີ້ຂອງລັດຖະບານອາເມລິກາເປັນແນວໃດນັ້ນ, ເຈົ້າໜ້າທີ່ທ່ານນີ້ເຫັນວ່າ, ກ່ອນບໍລິສັດສະແຕນດາດ ແອນດ໌ ປົວ ເຣດຕິງ ເຊີວິສຈະປະກາດຫຼຸດລະດັບຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກາໃຫ້ຕ່ຳລົງນັ້ນ, ໃນຕະຫຼາດກໍ່ໄດ້ມີຮ່ອງຮອຍໜ້ອຍໜຶ່ງມາກ່ອນແລ້ວ, ນັກວິເຄາະຕະຫຼາດກໍ່ເຄີຍມີຄວາມເຫັນຄືແນວນີ້, ສະນັ້ນຈຶ່ງຖືໄດ້ວາການຕົກລົງດັ່ງກ່າວເປັນທີ່ຄາດຄະເນໄດ້ລ່ວງໜ້າ. ອົງການປະເມີນຄວາມໜ້າເຊື່ອຖື3ແຫ່ງທີ່ມີຊື່ສຽງໃນໂລກ, ມີພຽງແຕ່ແຫ່ງດຽວເທົ່ານັ້ນທີ່ຫຼຸດຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກາຈາກລະດັບAAAລົງເປັນAA+, ອີກ2ແຫ່ງຍັງເຫັນດີໃຫ້ລະດັບຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກາຢູ່ໃນລະດັບAAAຄືເກົ່າ. ທ່ານເຫັນວ່າ, ປະຈຸບັນຄວາມວິຕົກກັງວົນໃນຕະຫຼາດສ່ວນຫຼາຍແມ່ນຍ້ອນການປະເມີນຜົນຄືນໃໝ່ຕໍ່ການຄາດຄະເນເສດຖະກິດຂອງອາເມລິກາ, ຫາກບໍ່ແມ່ນສົງໄສຕໍ່ພັນທະບັດຂອງລັດຖະບານອາເມລິກາ.
ນອກນີ້, ນັກວິເຄາະຂອງສິງກະໂປກໍ່ເຫັນວ່າ, ຫຼັງຈາກຫຼຸດລະດັບຄວາມໜ້າເຊື່ອຖືໃນການຊຳລະໜີ້ຂອງລັດຖະບານອາເມລິກລົງາແລ້ວ, ຍັງມີນັກລົງທຶນຈັດຊື້ພັນທະບັດຂອງລັດຖະບານອາເມລິກາຢູ່ຄືເກົ່າ, ນີ້ສະແດງໃຫ້ເຫັນວ່າ, ອາເມລິກາຍັງຄົງຖືເປັນບ່ອນທີ່ມີຄວາມປອດໄພຂອງການລົງທຶນໄລຍະຍາວ. ເມື່ອທຽບກັບເງິນເອີໂຣແລະເງິນເຢນຍີ່ປຸ່ນແລ້ວ,ເງິນໂດລາສະຫະລັດອາເມລິກາຍັງມີແຮງດຶງດູດພິເສດ. ມີຜູ້ຊ່ຽວຊານຈຳນວນໜຶ່ງໄດ້ເຕືອນນັກລົງທຶນວ່າ, ຄວນພິຈາລະນາຊັບສິນຊະນິດອື່ນທີ່ໄວ້ວາງໃຈໄດ້ເທົ່າກັບພັນທະບັດລັດຖະບານອາເມລິກາໃນດ້ານຄວາມປອດໄພແລະລັກສະນະຄ່ອງຕົວ.
ນະໂຍບາຍການລົງທຶນຂອງກົມຄຸ້ມຄອງການເງິນສິງກະໂປແມ່ນມີການສຳຫຼວດໄລຍະຍາວນານ, ຄັງສຳຮອງເງິນຕາຕ່າງປະເທດຂອງລັດຖະບານສິງກະໂປສ່ວນຫຼາຍແມ່ນລົງທຶນໃສ່ຊັບສິນທີ່ເປັນເງິນຕາຕ່າງປະເທດຊະນິດຕ່າງໆ, ໂຄງປະກອບດ້ານຊັບສິນມີລັກສະນະຫຼາກຫຼາຍໃນລະດັບສູງ, ບໍ່ມີຊັບສິນທີ່ເປັນເງິນຕາຕ່າງປະເທດຊະນິດໃດຫຼາຍກວ່າ1ສ່ວນ3.
