ທ່ານລີເຄີສຽງ ຮອງນາຍົກລັດຖະມົນຕີຈີນປະກາດນະໂຍບາຍໃໝ່ຂອງລັດຖະບານຈີນກ່ຽວກັບການສະໜັບສະໜູນຮົງກົງເສີມຂະຫຍາຍການຮ່ວມມືລະຫວ່າງສອງຝ່າຍກ້າວສູ່ລວງເລິກ
(GMT+08:00) 2011-08-17 17:12:58 cri
ທ່ານລີເຄີສຽງ ກຳມະການປະຈຳກົມການເມືອງສູນກາງພັກກອມມູນິດຈີນ ທັງເປັນຮອງນາຍົກລັດຖະມົນຕີຈີນໄດ້ກ່າວຄຳປາໃສໃນເວທີປຶກສາຫາລືກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ5ປີຄັ້ງທີ12ກ່ຽວກັບການເສີມຂະຫຍາຍການຮ່ວມມືທາງດ້ານເສດຖະກິດການຄ້າແລະການທະນາຄານລະຫວ່າງແຜ່ນດິນໃຫຍ່ຈີນກັບຮົງກົງທີ່ຈັດຂຶ້ນຢູ່ຮົງກົງໃນວັນທີ17ສິງຫານີ້.
ທ່ານລີເຄີສຽງກ່າວວ່າ,ລັດຖະບານສູນກາງໄດ້ວາງນະໂຍບາຍແລະມາດຕະການໃໝ່ໃນດ້ານຕ່າງໆເພື່ອສະໜັບສະໜູນຮົງກົງເສີມຂະຫຍາຍແລະລົງເລິກການຮ່ວມມືທາງດ້ານເສດຖະກິດການຄ້າແລະການເງິນລະຫວ່າງແຜ່ນດິນໃຫຍ່ກັບຮົງກົງ,ຊຶ່ງໄດ້ສ່ອງແສງເຖິງທິດທາງນະໂຍບາຍທີ່ປະຕິບັດຕະຫຼອດມາຂອງແຜ່ນດິນໃຫຍ່ຈີນທີ່ໃຫ້ບູລິມະສິດໃນການເປີດປະຕູຕໍ່ຮົງກົງພາຍໃຕ້ນະໂຍບາຍ"ປະເທດດຽວມີສອງລະບອບ",ຈຸດປະສົງແມ່ນເພື່ອຊຸກຍູ້ການຮ່ວມມືທາງດ້ານເສດຖະກິດການຄ້າແລະການເງິນລະຫວ່າງສອງຝ່າຍໃຫ້ກ້າວສູ່ລະດັບໃໝ່,ຊຶ່ງມີເນື້ອໃນທີ່ສຳຄັນຄື:ແຜ່ນດິນໃຫຍ່ຍົກລະດັບການເປີດປະຕູທາງດ້ານການຄ້າການບໍລິການຕໍ່ຮົງກົງໃຫ້ສູງຂຶ້ນກວ່າເກົ່າ,ປັບປຸງແລະຍົກສູງຖານະຂອງຮົງກົງທີ່ເປັນສູນການເງິນສາກົນ,ສະໜັບສະໜູນຮົງກົງໃຫ້ກາຍເປັນສູນທຸລະກິດເງິນຢວນຢູ່ນອກແຜ່ນດິນໃຫຍ່ຈີນ,ສະໜັບສະໜູນຮົງກົງເຂົ້າຮ່ວມການຮ່ວມມືທາງດ້ານເສດຖະກິດໃນສາກົນແລະພາກພື້ນ,ຊຸກຍູ້ໃຫ້ວິສາຫະກິດຂອງແຜ່ນດິນໃຫຍ່ແລະຮົງກົງຮ່ວມກັນລົງທຶນຢູ່ຕ່າງປະເທດ,ເສີມຂະຫຍາຍບົດບາດທີ່ສຳຄັນຂອງຮົງກົງໃນການຮ່ວມມືລະຫວ່າງແຂວງກວາງຕຸ້ງ,ຮົງກົງແລະມາກາວ.
ທ່ານລີເຄີສຽງກ່າວວ່າ,ການຮັກສາເສດຖະກິດແຫ່ງຊາດພັດທະນາຢ່າງໝັນທ່ຽງຍາວນານແລະໄວສົມຄວນ,ຮັກສາໃຫ້ຮົງກົງມີຄວາມຈະເລີນຮຸ່ງເຮືອງແລະສະຖຽນລະພາບຢ່າງຍາວນານແມ່ນຕິດພັນເຖິງຜົນປະໂຫຍດພື້ນຖານແຫ່ງຊາດແລະຮົງກົງ,ເປັນຄວາມປາຖະໜາຮ່ວມກັນຂອງປະຊາຊົນຈີນທຸກຖ້ວນໜ້າ.ຂໍແຕ່ແຜ່ນດິນໃຫຍ່ກັບຮົງກົງຮ່ວມກັນທຳຄວາມພະຍາຍາມກໍ່ຈະສາມາດບັນລຸ2ເປົ້າໝາຍໄລຍະຍາວດັ່ງກ່າວນີ້ໄດ້ແນ່ນອນ,ແລະຈະປະກອບສ່ວນຫຼາຍກວ່າເກົ່າເຂົ້າໃນການເພີ່ມຄວາມຜາສຸກໃຫ້ແກ່ປະຊາຊົນແຜ່ນດິນໃຫຍ່ກໍ່ຄືປະຊາຊົນຮົງກົງ.
