ເວທີປຶກສາຫາລືການຮ່ວມມືດ້ານເສດຖະກິດເຂດບໍລິເວນອ່າວເປີຍປູ້ຄັ້ງທີ6ໄດ້ອັດລົງ
(GMT+08:00) 2011-08-19 17:36:48 cri
ຕາມຂ່າວcri: ຕອນເຊົ້າວັນທີ19ສິງຫານີ້, ພາຍຫຼັງໄດ້ສຳເລັດວາລະປະຊຸມຕ່າງໆແລ້ວ,ກອງປະຊຸມເວທີປຶກສາຫາລືການຮ່ວມມືດ້ານເສດຖະກິດເຂດບໍລິເວນອ່າວເປີຍປູ້ຄັ້ງທີ6ທີ່ດຳເນີນເປັນເວລາ1ວັນເຄິ່ງນັ້ນໄດ້ອັດລົງຢູ່ນະຄອນນານນິງເຂດກວາງຊີຂອງຈີນຢ່າງໄດ້ຮັບຜົນເຕັມແມັດເຕັມໜ່ວຍ, ໃນພິທີອັດກອງປະຊຸມ,ທ່ານເສີນໂຈ່ວ, ຫົວໜ້າກົມອາຊີກະຊວງການຄ້າຈີນໄດ້ປະກາດ "ບົດວິພາກຄວາມເປັນໄປໄດ້ໃນການຮ່ວມມືດ້ານເສດຖະກິດເຂດບໍລິເວນອ່າວເປີຍປູ້".
ບົດວິພາກສະບັບດັ່ງກ່າວມີ5ພາກສ່ວນ: ໜຶ່ງແນະນຳເບື້ອງຫຼັງຂອງການຮ່ວມມືດ້ານເສດຖະກິດຢູ່ເຂດບໍລິເວນອ່າວເປີຍປູ້; ສອງວິພາກຄວາມເປັນໄປໄດ້ຕໍ່ການຮ່ວມມືດ້ານເສດຖະກິດຢູ່ເຂດບໍລິເວນອ່າວເປີຍປູ້; ສາມສະໜີເປົ້າໝາຍ,ຫຼັກການແລະຮູບການໃນການຮ່ວມມືດ້ານເສດຖະກິດຢູ່ເຂດບໍລິເວນອ່າວເປີຍປູ້; ສີ່ສະເໜີ7ຂົງເຂດບູລິມະສິດໃນການຮ່ວມມືດ້ານເສດຖະກິດຢູ່ເຂດບໍລິເວນອ່າວເປີຍປູ້,ຄື: ການກໍ່ສ້າງພື້ນຖານໂຄງລ່າງ, ທ່າເຮືອແລະການບໍລິການສິນຄ້າຈໍລະຈອນ, ການຄ້າແລະການລົງທຶນຢ່າງສະດວກ, ກະສິກຳການທ່ອງທ່ຽວ,ການອະນຸລັກສິ່ງແວດລ້ອມ, ຄວາມຫຼາກຫຼາຍຂອງຊີວະຊາດແລະການຮ່ວມມືຂອງຂະແໜງການ; ຫ້າສະເໜີຂໍ້ສະເໜີໃນການປະຕິບັດງານການຮ່ວມມືດ້ານເສດຖະກິດຢູ່ເຂດບໍລິເວນອ່າວເປີຍປູ້,ຄື: ວາງແຜນໄລຍະກາງແລະຍາວ, ສ້າງຕັ້ງແລະປັບປຸງກົນໄກການຮ່ວມມືທີ່ກ່ຽວຂ້ອງ, ເພີ່ມການສະໜັບສະໜູນດ້ານທຶນຮອນ, ເລີ່ມດຳເນີນໂຄງການຮ່ວມມືທີ່ເປັນບູລິມະສິດ,ເພີ່ມທະວີການພັດທະນາຊັບພະຍາກອນມະນຸດແລະການສ້າງສາເວບໄຊຂໍ້ມູນຂ່າວສານ.
ຜູ້ຊ່ຽວຊານທີ່ມາຈາກຈີນ,10ປະເທດອາຊຽນ,ກອງເລຂາອາຊຽນ,ທະນາຄານພັດທະນາອາຊີຫຼືADBໄດ້ປະກອບໜ່ວຍຊ່ຽວຊານ,ພ້ອມກັນດຳເນີນວຽກງານຮຽບຮຽງບົດວິພາກ,ເຊິ່ງໄດ້ໃຊ້ເວລາ3ປີ.
