ທ່ານໂຈ່ວຢົງຄ່າງ ກຳມະການປະຈຳກົມການເມືອງສູນກາງພັກກອມມູນິດຈີນໂອ້ລົມແລກປ່ຽນກັບການນຳພັກ-ລັດຖະບານສປປລາວ
(GMT+08:00) 2011-08-22 17:06:19 cri
ຕອນບ່າຍວັນທີ19ສິງຫານີ້,ທ່ານໂຈ່ວຢົງຄ່າງ ກຳມະການປະຈຳກົມການເມືອງສູນກາງພັກກອມມູນິດຈີນ ເລຂາທິການຄະນະກຳມະການການເມືອງແລະກົດໝາຍສູນກາງພັກກອມມູນິດຈີນທີ່ພວມຢ້ຽມຢາມຢູ່ລາວໄດ້ເດີນທາງໄປຮອດທີ່ຄະນະຈັດຕັ້ງສູນກາງພັກປະຊາຊົນປະຕິວັດລາວເພື່ອໂອ້ລົມແລກປ່ຽນຄວາມຄິດເຫັນຮ່ວມກັບຜູ່ຕາງໜ້າການນຳພັກ-ລັດຖະບານແຫ່ງສປປລາວທີ່ເຄີຍໄປທັດສະນະສຶກສາແລກປ່ຽນບົດຮຽນຢູ່ຈີນ.
ຕາມແຜນການຮ່ວມມືແລະການແລກປ່ຽນລະຫວ່າງສອງພັກຈີນລາວ,ນັບແຕ່ປີ2000ມານີ້,ໄດ້ມີພະນັກງານແລະນັກວິຊາການພັກ-ລັດຖະບານແຫ່ງສປປລາວເກືອບ1200ຄົນໄດ້ໄປທັດສະນະສຶກສາແລກປ່ຽນບົດຮຽນໃນດ້ານຕ່າງໆຢູ່ຈີນ,ຊອກຮູ້ບົດຮຽນທາງດ້ານການປົກຄອງປະເທດຂອງພັກກອມມູນິດຈີນ,ທັດສະນະສຶກສາສະພາບການພັດທະນາເສດຖະກິດ-ສັງຄົມຂອງຈີນ.ສະຫາຍລາວ50ຄົນທີ່ເຂົ້າຮ່ວມການໂອ້ລົມແລກປ່ຽນບົດຮຽນໃນເທື່ອນີ້ຕ່າງກໍ່ມີຕຳແໜ່ງທາງພັກ-ລັດ,ກອງທັບແລະວິສາຫະກິດຂອງລາວ,ເຊິ່ງສະຫາຍເຫຼົ່ານັ້ນລ້ວນແຕ່ເຄີຍໄປຮຽນຢູ່ໂຮງຮຽນພັກຂອງສູນກາງພັກກອມມູນິດຈີນ.
ເມື່ອໄດ້ພົບພໍ້ກັບເພື່ອນລາວທີ່ເປັນມິດແລະມັກແຂກມັກຄົນ,ທ່ານໂຈ່ວ ຢົງຄ່າງໄດ້ຕັ້ງ3ບັນຫາແລກປ່ຽນ,ຂໍໃຫ້ບັນດາສະຫາຍລົມກ່ຽວກັບຜົນສຳເລັດທີ່ໄດ້ຮັບໃນການທັດສະນະສຶກສາແລະແລກປ່ຽນຢູ່ຈີນ,ປະກອບຄຳຄິດຄຳເຫັນໃຫ້ແກ່ວຽກງານການຈັດຕັ້ງທັດສະນະສຶກສາແລກປ່ຽນຂອງສະຫາຍລາວຢູ່ຈີນ,ແລະໃຫ້ຄຳຄິດຄຳເຫັນຕໍ່ວຽກງານພັກແລະລັດຖະບານຈີນ.
ໃນເວລາປະກອບຄຳເຫັນ, ຫົວໜ້າກົມສ້າງຄູກະຊວງສຶກສາທິການລາວກ່າວວ່າ,ໃນຖານະເປັນເຈົ້າໜ້າທີ່ກະຊວງສຶກສາທິການ,ຂ້າພະເຈົ້າເຫັນວ່າ,ຈຸດສຳຄັນທີ່ສຸດຂອງບົດຮຽນຈີນກໍ່ແມ່ນເອົາໃຈໃສ່ນຳການກໍ່ສ້າງພະນັກງານແລະຜູ່ມີຄວາມຮູ້ຄວາມສາມາດ.ປະເທດລາວຖ້າຢາກປ່ຽນແປງໃໝ່ແລະພັດທະນາກໍ່ຈຳເປັນຕ້ອງໄດ້ຮັບຄວາມຄືບໜ້າໃໝ່ໃນການພັດທະນາຊັບພະຍາກອນມະນຸດ,ນີ້ກໍ່ແມ່ນເປົ້າໝາຍສູ້ຊົນອັນໜຶ່ງທີ່ສະເໜີໂດຍກອງປະຊຸມໃຫຍ່ຄັ້ງທີ9ຂອງພັກປະຊາຊົນປະຕິວັດລາວ.
ຫົວໜ້າຫ້ອງການກະຊວງແຮງງານສະຫວັດດີການສັງຄົມຂອງລາວກ່າວວ່າ,ສະຫາຍເຕີ້ງສ້ຽວພິງກ່າວວ່າ,ຄວາມທຸກຍາກຫຼ້າຫຼັງບໍ່ແມ່ນສັງຄົມນິຍົມ,ທາດແທ້ຂອງສັງຄົມນິຍົມແມ່ນຕ້ອງໃຫ້ປະຊາຊົນມີຄວາມຮັ່ງມີຮ່ວມກັນ,ນີ້ມີຄວາມໝາຍສຳຄັນຫຼາຍໃນການເປັນບົດຮຽນທີ່ດີເພື່ອຊຸກຍູ້ພາລະກິດປ່ຽນແປງໃໝ່ຂອງລາວ.
ຫົວໜ້າຄະນະກຳມະການຄຸ້ມຄອງເຂດເສດຖະກິດພິເສດລາວກ່າວວ່າ"ການເປີດປະຕູສູ່ພາຍນອກຂອງຈີນແມ່ນເລີ່ມຕົ້ນຈາກການສ້າງຕັ້ງເຂດເສດຖະກິດພິເສດ,ເມື່ອໄດ້ປະຕິບັດຕົວຈິງມາເປັນເວລາ30ກວ່າປີແລ້ວໄດ້ຮັບຜົນສຳເລັດອັນໃຫຍ່ຫຼວງ,ເວົ້າສຳລັບປະເທດລາວແລ້ວ,ການສ້າງເຂດເສດຖະກິດພິເສດຍັງແມ່ນສິ່ງໃໝ່ໆ,ພວກຂ້າພະເຈົ້າຈຳເປັນຕ້ອງໄດ້ຖອດຖອນບົດຮຽນອັນປະເສີດຂອງປະເທດຈີນຢ່າງບໍ່ຢຸດຢັ້ງ."
ສະຫາຍລາວທີ່ເຂົ້າຮ່ວມການໂອ້ລົມແລກປ່ຽນບົດຮຽນຮ່ວມກັນໃນເທື່ອນີ້ໄດ້ປະກອບຄຳຄິດຄຳເຫັນຢ່າງຫ້າວຫັນທ່າມກາງບັນຍາກາດຟົດຟື້ນມ່ວນຊື່ນໂດຍອີງໃສ່ສະພາບຄວາມເປັນຈິງຂອງສອງຊາດລາວຈີນແລະວຽກງານຂອງໃຜລາວ.
ພາຍຫຼັງໄດ້ຟັງຄຳຄິດຄຳເຫັນຂອງສະຫາຍລາວແລ້ວ,ທ່ານໂຈ່ວຢົງຄ່າງກ່າວວ່າ,ການກໍ່ສ້າງແລະພັດທະນາຂອງສອງປະເທດຈີນ-ລາວ,ສຳຄັນທີ່ສຸດແມ່ນຂຶ້ນກັບພັກ,ສ່ວນການກໍ່ສ້າງພັກສຳຄັນທີ່ສຸດແມ່ນຢູ່ນຳພະນັກງງານແລະຜູ່ມີຄວາມຮູ້ຄວາມສາມາດ.ທົບທວນຄືນແລະສະຫຼຸບຂະບວນການສູ້ຊົນຂອງພັກກອມມູນິດຈີນໃນ90ປີຜ່ານມາ,ພວກຂ້າພະເຈົ້າມີຄວາມຮູ້ສຶກອັນເລິກເຊິ່ງຫຼາຍຂໍ້ຄືບັນຫາທຳອິດ,ຄວນແກ້ໄຂບັນຫາກ່ຽວກັບອຸດົມການແລະຄວາມເຊື່ອຖື,ນີ້ແມ່ນມິງຂວັນຂອງພັກ.ສອງມາແມ່ນຄວນຖືປະຊາຊົນໃນຖານະສູງສຸດໄວ້ຢູ່ໃນໃຈຂອງພວກຂ້າພະເຈົ້າ.ອັນທີສາມແມ່ນຄວນຍຶດໝັ້ນການປົດປ່ອຍແນວຄິດ,ສະແຫວງຫາຄວາມເປັນຈິງ,ກ້າວໄປໜ້າພ້ອມຍຸກສະໄໝ,ຮັບຮູ້ສະພາບຂອງໂລກ,ສະພາບຂອງຊາດແລະສະພາບຂອງພັກຢ່າງຖືກຕ້ອງ,ປົດປ່ອຍແນວຄິດຢ່າງບໍ່ຢຸດຢັ້ງຕາມສະພາບຕົວຈິງ,ຊຸກຍູ້ພາລະກິດສັງຄົມນິຍົມກ້າວໄປໜ້າ.ສ່ວນອັນສຸດທ້າຍແມ່ນຕ້ອງປົກປັກຮັກສາແບບແຜນເຮັດວຽກທີ່ດີງາມຄືການຕິດຕໍ່ພົວພັນກັບປະຊາຊົນຢ່າງໃກ້ຊິດ,ບຸກບືນສູ້ຊົນດ້ວຍຄວາມທໍລະຫົດອົດທົນ,ຕຳນິໝູ່ເພື່ອນແລະຕຳນິຕົນເອງ.
ທ່ານໂຈ່ວຢົງຄ່າງຍັງຊີ້ໃຫ້ເຫັນຄວາມຫຍຸ້ງຍາກແລະບັນຫາທີ່ມີຢູ່ໃນການພັດທະນາເສດຖະກິດ-ສັງຄົມຂອງຈີນຕາມສະພາບຕົວຈິງ,ທ່ານກ່າວວ່າ,ການຢ້ຽມຢາມເທື່ອນີ້ໄດ້ເຫັນປະເທດລາວມີສິ່ງແວດລ້ອມທຳມະຊາດທີ່ດີ,ນະຄອນຫຼວງວຽງຈັນມີຄວາມສະຫງົບສຸກ,ທັງໝົດເຫຼົ່ານີ້ເປັນສິ່ງທີ່ເປັນຕາຮ່ຳຮຽນນຳ.ການພັດທະນາຂອງຈີນຍັງມີບັນຫາຫຼາຍຢ່າງເຊັ່ນພັດທະນາບໍ່ສະໝ່ຳສະເໝີ,ບໍ່ກົມກຽວກັນແລະບໍ່ຍືນຍົງ,ຄວາມຂັດແຍງທາງສັງຄົມຍັງມີຫຼາຍສົມຄວນ,ຫວັງວ່າສະຫາຍລາວທັງຫຼາຍຈະໄປທັດສະນະສຶກສາຢູ່ແຫ່ງຕ່າງໆຂອງຈີນເພື່ອຊອກຮູ້ຈີນຢ່າງຮອບດ້ານ.
ຕາມແຜນການແລ້ວ,ງານໂອ້ລົມແລກປ່ຽນບົດຮຽນຮ່ວມກັນຈະດຳເນີນເປັນເວລາເຄິ່ງຊົ່ວໂມງ,ແຕ່ສຸດທ້າຍໄດ້ດຳເນີນໄປຊົ່ວໂມງເຄິ່ງທ່າມກາງບັນຍາກາດແຫ່ງໄມຕີຈິດມິດຕະພາບອັນສະໜິດສະໜົມແລະເປັນກັນເອງທ່າມກາງບັນຍາກາດລະດູຝົນໃນເດືອນສິງຫາ,ເດືອນແຫ່ງຄວາມສົດໃສຊຸ່ມຊືນຂອງຕົ້ນໄມ້ພຶກສາຊາດນາໆພັນທີ່ຂຽວງາມດີຂອງນະຄອນຫຼວງວຽງຈັນ.
